Miyo ndibaliwile yawa ya 1983. Maromelo ndali mwana wapamene. Mbwenye ndangana vyawa 10 ndatoroma uvwa upa manungwanga othene. Vangavirile vyawa viili, dambo limbo-i namaebe-i ira ndivenyati ndatoimwanana vitekenya vyavilimbi-edha miyo ira ndivitekenye namendodhangadhene dhatovaela uma neri-a kandana forsa. Dambo lo-arela kandaweleleve okoka wenda, urenda ween’na utondiimwanani-a ira ndiulukule, e-ni ndinaimo ninga mwana.

Miyo vandhe kandakumechavo vangavirile medi miili a-iyana ambili a Mboni dha Yohova tatodha dhandiona, hora dhothene mutu afiya vandhe miyo nderecha tawa dhowa mavithala. Mbwenye ndambolenle, ndatorumela tapanya naaliwa a-iyana ambinlale. Aliwa tatoroma oonga vya parandaizo. Miyo ndatothuulela vyavwide miyo ndangana vyawa 5. Va hora yen’ne, mixonale unango unoromoliwa Jethro, wenuo akala Suriname, anodhecha tatamoni wi-u fendo umbo-i vamwendi dhamfunji-a babanga. Jethro anondisamalila pama vinjinji, thitho miyo ndanomdhiveliwana liye. Evyo vingalive e-no ambwiyanga tatonditukula ndidhowana migumanoni ya Mboni dha Yohova yeniyo yaireya tatamoni wi-u. Adhaire e-no Florence, i-yana m’mbo-i wa Mboni dha Yohova atodha dhandiona mbwenye liye atondifuka akala miyo dinofuna funjedha vinjinji miyo ndatorumela ira ee ndinofuna.

Florence vambo-i na man’nee, Justus, tatowela aliwa tatoroma ndifunji-a ee-no aliwa tatozindiyela ira miyo kandaidhi leri, thitho tatondikami-a vondifunji-a leri. Vangavirile hora vang’ono miyo ndanooda leri mekene. Dambo lo-arela, Florence na Justus tatondiwadela ira aliwa tatotumiziwa ira tamalabenga wu Suriname. Vyosukwali-a ali ira wu Orealla kwaali mutu mwinango afuna dhowana ndifunji-a Bibilya. Mbwenye vyova-a imwerumweru ali ira Yohova kaandidiwalile.

Kavavirile hora injinji painiya unaromoliwa Floyd atofiya wu Orealla. Liye alaleela nyumba, na nyumba thitho atondifwanya liye angaromile ndifunji-a Bibilya, miyo ndatoroma theela. liye atondifuka ira: “N’nga unatheya n’ni”? Miyo ndatom’mwadela ira nditoroma funjedhavo boroxura la Kodi Mulungu Amafunanji kwa Ife? Thitho ndatoroma funjedha bukhu la Chidziŵitso Chotsogolera ku Moyo Wosatha. * Miyo ndatom’mwandela mwasa waimelele miyo funjedha. Floyd atodhowanave ndifunji-a na bukhu la Chidziŵitso Chotsogolera ku Moyo Wosatha, Adhaire ee-no liye atotumiziwa  ira amalabenga limburo linango. Yen’na ali fendo yanambili miyo kaati akaana ondifunji-a.

Yawa ya 2004, apainiya ambinli avakundu aongiwa Granville na Joshua, tatotumiziwa wu Orealla. Aliwa talaleela nyumba nanyumba, thitho tatondifwanya. Aliwa tatondifuka akala miyo ndanofuna funjedha Bibilya, miyo ndatotheela adhaire ee-no miyo ndatoavepa ira tarome ndifunji-a bukhu la Chidziŵitso Chotsogolera ku Moyo Wosatha. Romela maromelo miyo ndafuna ndione akala tangandifunji-idhe ninga vyandifunji-echa anamafunji-anga oroma. Granville atodiwandela ira mingumano dhinoireya tatamoni wanga. Vali vangavirile vyawa 10 miyo vandhe nda-akumangavo, mbwenye miyo ndanofuna onalela migumano. Ee-no, Granville atofiya mudhi na kadela ya maroda liye ndi-ela vakandelanivo liye roma ndunya kadelile i-yo fiyedha Nyumbani ya Umwene.

Vangavirile hora, Granville atondilibi-a ira ndimafwanyeye va Sukulu ya Utumiki wa Mulungu. Liye atoonga ira: “Weyo wenda kunaoda, mbwenye unoonda onga. Dambo nango unodha onga mwasa wavatando miyo nditokaana isikimizo!” Miyo kandinokaikela madhu enala tatondilimbi-a vinjinji.

Ndatoroma inda basa lolaleela na Granville. Voi ndhila ya tatamoni wanga yali yothimbeya vinjinji ali vyorucha ira ndiwendena kadela yamaroda, ee-no ndatovepa Granville ira adi-elenga karinyani ira niode wenda mamburo o-iyana-iyana volaleela. Evi vyatoodeya. Mwedi wa abril yawa ya 2005, miyo ndatobadiziwa. Vangavirile hora, abali tatondifunji-a samalila mabuku na vyovwei-edha madhu vyavapingoni.

Yawa ya 2007, ali vyosukwali-a babanga atokwa na ngovi ya mwadeya. Banjalanga latokuzeya vinjinji. Granville atolobela vambo-i na i-yo nididili-a na malemba o-iyana-iyana. Vangavirile vyawa viili, i-yo natokuzeya na masoka avilengo. Granville atokwa na ngovi ya mwadeya.

Pingwi-u ali osowa vinjinji, kwaana ndimuwa wanave rumiwi okami-a m’mbo-i. Ukwa wa Granville watokuza rimanga vinjinji; liye ali fwanga waudhivela vinjinji liye ali xamwali ororomeleya anondisamalila mwauzimu thitho na tutuni. Vagumanoni vanduli va ukwawee miyo ndali namaleri Nsanja ya namaing’anela. Mbwenye ndaodile leri ndima mbiili dhoroma adhaire ee-no ndatoroma ula voi kandaodile miyala va hora yeniyo ndanofwanela chita sogolo.

Miyo ndatoroma vivwa pama abali apingo unango tangadhidhe Orealla ira tadhanikami-e. Vyevyo vingali e-no, Beteli yatotumiza painiya wavakundu airiwa Kojo ira adhalabe tatamoni wi-u. Ndatokala waimwerumweru vinjinji, m’manga na balanga wa kirikiti tangaromile funjedha fiyedha badiziwa. Adhaire e-no, mwedi wa março yawa ya 2015, miyo ndato-eliwa kala rumiwi okami-a. Vangavirile hora vang’ono, miyo ndatoonga mwasa wavatando oroma ndambo lenle ndatothuulela madhu aongilenga Granville vyawa vya ndulimu ira: “Dambo n’nango weyo unodha onga mwasa wavatando. Miyo nditokaana isikimizo miyo kandinokaikela!” Miyo ndatokala waimwerumweru ndatofiyedha lana no simba ulukulu.

Onela maporogarama a-va JW Broadcasting®, Nditoidhiwa mastoriya aabali ana vyorucha vyolandanana vyangavi. Masiki angalive ira aliwa borangala ingumiwa njonganyali-a thitho mbaimwerumweru. Miyo thitho ndinoonda laba vyongo vinango. Ndinofuna ndilabele Yohova mwemo munofuna miyo odela. Ngumwasiwa, yawa ya 2019 mwedi wa setembro ndatokala painiya okaatheya , thitho ndatokaana ngari yo-eliwa kala ndimuwa wavapingoni vanga wenuo una anamalaleya okwakwana 40.

Ndili osimba vinjinji abali na arongola enao afunjedhile namiyo vondikami-a basa la Yohova, vyevi vyangalive e-no ndimnosimba Yohova wenuo a-andidiwaale.