Nabutwilwe mu 1983. Ponadi mwanuke, nadi mwana mukomo biyampe, ino ami pa kubwanya myaka dikumi, nashilula kwivwana misanshi ngitu yonso. Kintu kya myaka ibidi pa kupita’po, nabūka’tu lubanga ino nakomenwa kuteluka. Nansha byonadi nonga bukomo bwa kujinya maulu, ino keadipo na bukomo. Tamba mu dine difuku’dya, nkyadipo kadi nekyenda. Misongo yami yaunengeje ndeke kutama. Kufika ne dyalelo, ne mushale enka bwa mwana mutyetye.

Ponadi nshikete mu njibo kijabanda mu myeji mityetye, Batumoni ba Yehova babidi baiya kumpempula. Ponso padi pāya beni kwetu, nadi mvudile kufyama, inoko nalekele bano bana-bakaji besambe nami mu dino difuku. Abo pa kwisambila pa Paladisa, navuluka byonaivwene ponadi na kintu kya myaka itano. Mu kine kitatyi’kya, Jethro, mishonele wadi ushikata mu Siriname, wadi wiya mu kyetu kibundi musunsa umo ku kweji, befunda Bible na tata. Jethro wadi unongela bintu na buswe. Nadi musenswe bininge. Kadi bankambo nabo baunselele, twaenda kukapwila na Batumoni ba mu kyetu kibundi. Ebiya, Florence, mwana-mukaji umo waile kuntala mu dine difuku’dya, waungipangula shi nsaka kwifundila’ko bivule, nami naitabija.

Florence wajoka pamo ne Justus wandi mulume, twashilula kwifunda nabo Bible. Abo pa kuyuka’mba nkiyukilepo kutanga, bamfundija kutanga. Kitatyi kityetye pa kupita’po, nayuka’byo kutanga. Difuku dimo, bano ba mulume ne mukaji baunsapwila’mba abebatume kukengidila mu Siriname. I kya bulanda, mwanda mu Orealla kemwadipo muntu wadi ubwanya kwendelela kwifunda nami Bible. Ino na bya dyese, Yehova kangidilwepo.

Kitatyi kityetye pa kupita’po, Floyd pania umo waiya mu Orealla, wauntana paadi usapula ku kitanda ne kitanda. Aye pa kunena twifunde Bible, nasepa. Waungipangula’mba “i bika byowasepa?” Namulondolola’mba, nadi nefunda kala boloshile I Kika Kisaka Leza Kotudi? ne kadi kendi mushilule kwifunda dibuku Buyuki Butwala ku Būmi bwa Nyeke. * Namushintulwila kyonkyadipo nefundila. Twapwa na Floyd dibuku Buyuki, ino kupwa nandi bamutuma kukengidila kungi. Kadi nabulwa monka muntu wa kumfundija Bible.

 Inoko mu 2004, batuma ba Granville ne Joshua, bapania babidi ba pa bula, mu Orealla. Pobadi basapula ku kitanda ne kitanda, bauntana. Abo pa kungipangula shi nsaka kwifunda, nasepa. Nebanena twifunde dibuku Buyuki tamba ku ngalwilo. Nadi nsaka kuyuka shi bakamfundija bintu bimo na byamfundije bafundiji babajinji. Granville waunsapwila amba bapwilanga mu kyetu kibundi. Nansha byonkyadipo nteluka ku njibo mu kintu kya myaka dikumi, ino naitabija kukatanwa’ko. Ebiya Granville wantekuna, wanshikatyija mu kakinga, twaenda ku Njibo ya Bulopwe wenda unsukuma.

Mwenda mafuku, Granville waunkankamika neandikije ku Masomo a Mwingilo wa Kiteokratike. Waunena’mba: “Wi mulemane, ino ubwanya kunena. Difuku dimo, ukanenanga mwisambo wa bantu bonso. Bine, ukeunena.” Binenwa byandi bikankamika byaumpele kikulupiji.

Nashilula kusapula na Granville. Inoko, mashinda mavule a mu kibundi adi na tumabwe-mabwe pa kwenda’mo na kakinga. Ebiya nanena Granville angikije mu ngolofwana, kupwa ansukume. Uno mulangwe waendeka biyampe. Mu Kweji 4, 2005, nabatyijibwa. Ne kwija mpika, batutu bamfundija kutala mabuku a kipwilo ne kwingidija binanda bya ku Njibo ya Bulopwe.

Ino kya bulanda, tata wafwa mu 2007, mu akishida ya kyombo. Kisaka kyetu kyatengwa bininge. Granville wadi ulombela netu ne kwitusenga na bisonekwa bya mu Bible. Myaka ibidi pa kupita’po, twafikilwa na kimpengele kikwabo; Granville nandi wafwa mu akishida ya kyombo.

Kipwilo kyetu kityetye kyashala’nka na mwingidi wa mingilo umo, pampikwa mukulumpe. Lufu lwa Granville lwansense bininge, mwanda wadi mulunda onsenswe. Wadi uvuija nyeke bisakibwa byami bya ku mushipiditu ne ku ngitu. Aye’tu ufwa, baumpa kutanga misango ku kifundwa kya Kiteba kya Mulami. Natanga’tu misongo ibidi mibajinji, ino nashilula kudila kadi impolo yadi’nka insūma. Natūka ku lukala.

Nashilula kwiivwana biyampe paile banabetu ba mu kipwilo kikwabo kwitukwasha mu Orealla. Kadi bilo ya musambo yatuma Kojo, pania wa pa bula. Na bya dyese, mama ne nkasami mwana-mulume bashilula kwifunda Bible, kupwa babatyijibwa. Ebiya mu Kweji 3, 2015, bauntonga bu mwingidi wa mingilo. Kitatyi pa kupita’po, nanena mwisambo mubajinji wa bantu bonso. Mu dine difuku’dya, navuluka na mimungomungo ne impolo ya nsangaji byaunenene Granville myaka mivule kunyuma’mba: “Difuku dimo, ukanenanga mwisambo wa bantu bonso. Bine, ukeunena.”

Naivwene mu mpangiko ya Televijo ya JW myanda ya banabetu Batumoni badi mu ngikadilo na yondi’mo. Ino nansha byobadi na bulema, babwanya kulonga bivule, kadi badi na būmi bwa nsangaji. Ami nami, mbwanya kulonga bintu bimobimo. Mutyima wami wa kupa Yehova bukomo bo-bonso bondi nabo, waunengeje ngikale pania wa lonso. Kadi mu Kweji 9, 2019, baunombwele myanda mipya yonkyadipo nanga! Baunombwele mu uno kweji amba abantonge bu mukulumpe mu kyetu kipwilo kya basapudi kubwipi kwa 40.

Bine, mfwijanga’ko batutu ne bakaka befundile nami kadi baunkweshe ñingidile Yehova. Ne kadi, mfwijanga’ko Yehova bininge pa kuleka kungilwa.