Mbandele mu 1983. Ku buana mvua ne makanda a mubidi mimpe, kadi pangakakumbaja bidimu 10, ngakabanga kumvua mubidi wanyi wonso mujima unsama. Bu bidimu bibidi pashishe, dimue dituku pamvua mubike ku tulu, tshiakakumbana bua kuenda to. Meme kuenza muonso mua kuenza, mikolo katshia anu miteketangane. Katshia anu dituku adi, meme kushala mutshibukile panshi. Kusama aku nkunshawishe. Too ne lelu ntshidi meme anu bu muana.

Nkavua anu panshi. Mumane kushala nanku munkatshi mua ngondo ndambu, Bantemu babidi bakalua kuntangila. Pa tshibidilu pavua bantu balua kuntangila, mvua mbasokoma; kadi dituku adi ngakitaba bua bantu bakaji bayukile nanyi. Pakangambilabu bualu bua Mparadizu, ngakavuluka malu amvua mumvue pamvua ne bidimu bitue ku 5. Tshikondo atshi, misionere mukuabu diende Jethro, uvua musombele mu Suriname uvua ulua mu musoko wetu musangu umue ku ngondo bua kulonga Bible ne tatu. Uvua ungenzela malu ne bulenga bua dikema. Mvua mumunange be! Bakaku bavua baya nanyi mu bimue bisangilu bia Bantemu ba Yehowa anu mu musoko wetu amu. Nanku pavua Florence, umue wa ku bantu bakaji bavua balue kuntangila dituku adi abu mungebeje ni mvua musue kulonga malu a bungi, ngakitaba ne: eyowa ndi musue.

Florence wakalukila ne bayende, Justus, bobu kutuadija kundongesha Bible. Pakamonabu ne: tshivua mumanye kubala, bakabanga kundongesha mua kubala. Matuku makese pashishe, meme kubanga kudibadila. Dimue dituku bakangambila ne: bavua babatume mu Suriname. Ngakumvua bibi bualu kakuvua muntu mukuabu mu Orealla uvua mua kutungunuka ne kundongesha Bible to. Kadi diakalenga, Yehowa uvua nanyi mu meji.

Abidi mmale asatu mmîpi, mpanda-njila mukuabu diende Floy kulua mu Orealla. Wakatuilangana nanyi pavuaye uyisha ku kamutanda ne ku kamutanda. Pakangashilaye tshilumbu tshia kundongesha Bible, ngakatuadija kufukisha mimuemue. Yeye kungebeja ne: “Bua tshinyi udi ufukisha mimuemue?” Meme kumuambila ne: nkadi mulonge broshire wa Ntshinyi tshidi Nzambi utulomba? ne mutuadije kulonga mukanda wa Dimanya didi difikisha ku muoyo wa kashidi. * Ngakamumvuija bua tshinyi dilonga divua dimane. Tuakalonga nende nshapita ya mu mukanda wa Dimanya ivua mishale. Kadi bakalua kumutuma pende muaba mukuabu, meme kushala kabidi tshiyi ne mulongeshi wa Bible.

 Kadi mu 2004, bakatuma bampanda-njila ba pa buabu babidi mu Orealla, ke Granville ne Joshua. Bakatuilangana nanyi dimue dituku pavuabu bayisha ku kamutanda ne ku kamutanda. Pakandombabu bua kundongesha Bible, ngakafukisha mimuemue, kubalomba bua tulonge nabu mukanda wa Dimanya kutuadija ku mbangilu kuawu. Mvua musue kumona ni bavua mua kundongesha malu a muomumue ne avua balongeshi banyi ba kumpala bandongeshe. Granville wakangambila ne: bisangilu bivua bienzekela anu mu musoko wetu amu. Nansha munkavua mulue tshia panshi munda mua bidimu bitue ku 10, ngakapeta muoyo wa kuyamu. Ke Granville kulua ku mbelu, kunteka mu kakalu ka balema, kumpusaye too ne ku Nzubu wa Bukalenge.

Mu kupita kua matuku, Granville wakankankamija bua meme kudifundisha mu Kalasa ka mudimu wa Nzambi. Wakamba ne: “Udi mulema, kadi udi wakula. Dimue dituku, funda ulame, newenze muyuki.” Mêyi avuaye munkankamije nawu akankolesha ku muoyo.

Ngakabanga kuya mu buambi ne muanetu Granville. Kadi bu muvua njila ya bungi ya muetu amu mikale ne biniina, ngakalomba Granville bua ikale ungambula mu tshinkalu. Tukavua tuyisha nende amu nanku, bimpe be! Mu ngondo 4 wa 2005, ngakabatijibua. Matuku makese pashishe, bana betu bakanteka ku mikanda ne ku biamu bia mêyi bia ku Nzubu wa Bukalenge. Bakandongesha mua kuenza midimu ayi.

Kadi diakabi, mu 2007 tatu wakafuila mu mâyi pavuabu mu buatu. Biakatonda bena mu dîku dietu bikole. Granville wakasambila netu, yeye kutubadila mvese ivua itukolesha. Bidimu bibidi pashishe, tuakapeta bualu bukuabu buakatunyingalaja bikole menemene, ke lufu lua Granville; uvua mufuile pende mu mâyi pavuabu mu buatu.

Tshisumbu tshietu tshivua ne bantu bakese tshiakashala anu ne musadidi umue wa mudimu, katshiyi ne mukulu nansha umue. Mvua ne dibungama dia bungi bua lufu lua muena dianyi Granville. Uvua udifila ne muoyo mujima bua kutabalela majinga anyi a mu nyuma ne a ku mubidi. Mu bisangilu biakalonda lufu luende, meme ke uvua ne bua kubala Nsentedi. Ngakabala bikoso bibidi bia kumpala bimpe, kadi pashishe meme kutuadija kudila, kudila kua binsonji bipueka anu kupueka. Biakakengela bua ngumbuke ku tshiakuidi.

Ngakatuadija kumvuaku bimpe pakatuadija bana betu ba mu bisumbu bikuabu kulua kutuambuluisha mu Orealla. Betele wakatuma kabidi mpanda-njila mukuabu diende Kojo. Mamu ne muakunyanyi wa balume bakatuadija kulonga Bible, bobu kubatijibua. Bualu abu buakansankisha be! Pashishe, mu ngondo 3 wa 2015 bakanteka musadidi wa mudimu. Panyima, meme kuenza muyuki wanyi wa patoke wa kumpala. Dituku adi, ngakavuluka mêyi avua Granville mungambile a ne: “Dimue dituku, funda ulame, newenze muyuki.” Ngakafukisha mimuemue eku mpuekesha binsonji bua bungi bua dianyisha dimvua nadi kudi muanetu au.

Mu ndongamu ya ku TV wa JW, ndi mulonge malu a bungi kudi bena Kristo nanyi badi pabu ne lutatu lua buena luanyi. Kadi nansha mudibu ne bulema, badi benza malu a bungi ne badi ne disanka. Meme panyi ndi mua kuenza amue malu. Dijinga dianyi dia kupesha Yehowa tumakanda tuntshidi natu ndinsake bua kulua mpanda-njila. Mu ngondo wa 9 wa 2019, bakampesha lumu lumvua tshiyi mutekemene to, lua ne: bavua banteke mukulu! Dîba adi tshisumbu tshietu tshikavua ne bamanyishi batue ku 40.

Bana betu bonso bavua bandongeshe Bible ne bangambuluishe bua kuenzela Yehowa mudimu, ndi mbela tuasakidila wa bungi. Ndi ngela nangananga Yehowa tuasakidila bua muvuaye anu nanyi mu meji.