Ngwasemukile mu 1983. Ngwakolelenga namujimba wakulikangula, oloze omu ngwahetele myaka yakusemuka 10, ngwaputukile kwivwa kukola mujimba wosena. Kaha likumbi limwe omu ngwapwile namyaka yakusemuka 12, ngwahonene kutambuka omu ngwahindukile chimene. Numba tuhu ngwalishinjilile ngwami ngutambuke, oloze kangwahashileko. Kufuma likumbi vene lize, kanda ngutambukengaho lyehi. Kaha ngwakivile mwomwo yakuviza. Noholyapwa nguchili nakusoloka nge ngukanyike.

Ngwapwilenga kaha hembo omu ngwavijile, kahomu mwahichile tukweji vavandende, Vinjiho jaYehova vavali vangutambukilile. Kakavulu nge hembo haneza vangeji, ngwaswaminenga. Oloze halwola kana kangwaswamineko, kaha twashimutwilile. Omu vangulwezele vyaPalachise, vangwanukishile vyuma vize ngwevwile omu ngwapwile namyaka kafwe 5. Halwola kana, Jethro uze apwile kamishonali muSuriname, ejilenga nakwambulwila mungalila yetu kamwe mukakweji, kaha aputukile kunangula tata Mbimbiliya. Angusolwelelenga likoji, kaha ngwamuzangile chikuma. Kaha nawa lwola lumwe ngwayilenga nakaka wapwevo nakaka walunga kukukunguluka chaVinjiho chize chapwilenga mungalila yetu. Florence, pwevo umwe hali vaze mapwevo vavali, anguhulishile evwenga nge nguli nakusaka kulinangula vyavivulu, kaha ngwetavilile.

Florence ejile cheka nalunga lyenyi Justus, kaha vaputukile kungunangula Mbimbiliya. Omu vatachikijile ngwavo kangwejivile kutangako, vaputukile kungunangula kutanga. Mukuhita chalwola, ngwaputukile kutanga. Likumbi limwe vangulwezele ngwavo vanavatumu kuya nakuzachila kuSuriname. Chaluvinda, muOrealla kamwapwile mutu atwalileho kungunangula Mbimbiliyako. Chipwe ngocho, Yehova kanguvulyamineko.

Nakushimbula chiku, payiniya umwe walijina lyaFloyd ejile muOrealla, kaha anguwanyine omu apwile nakwambulwila kuzuvo hizuvo. Omu anguhulishile nge nangusaka kulinangula Mbimbiliya, ngwamwesele kukanwa. Anguhulishile ngwenyi: “Uli nakumwesa ika?” Ngwamulwezele ngwami kwapwile vatu vangunangwilenga mumbuloshuwa yakwamba ngwavo Vyuma Muka Asaka Kalunga Kuli Etu? natupetulu vamwe mumukanda wakwamba ngwavo Chinyingi Chize Cheji Kutwaminyinanga kuKuyoya chaHaya Myaka Yosena. * Ngwamulumbunwinyine ovyo vyangulingishile ngwechenga kulinangula, ngocho atwalileho kungunangula mumukanda waChinyingi. Chaluvinda, naikiye nawa  vamutumine kuya nakuzachila kuchihela cheka. Kangwapwile cheka namuka-kungunangulako.

Kuheta mu 2004, kwejile vapayiniya vakulipwila vavali, Granville naJoshua. Vanguwanyine omu vapwile nakwambulwila kuzuvo hizuvo. Omu vanguhulishile nge nguli nakusaka kulinangula Mbimbiliya, ngwamwesele kukanwa. Ngwavalwezele vaputuke cheka kungunangula mumukanda waChinyingi. Ngwasakile kutachikiza nge navangunangula vyuma vyovimwe navize ngwalinangwilenga kunyima. Granville angulwezele ngwenyi kwapwilenga kukunguluka mungalila yetu. Ngwafwililile kuya nakukunguluka numba tuhu ngwatwamine hembo kafwe hamyaka 10. Anguhakile muchitwamo chakushindumuna nakungutwala kuZuvo yaWangana.

Kutwala muze, Granville angukolezezele ngulisonekese muShikola yaMulimo waTeokalasi. Ambile ngwenyi: “Numba tuhu uchitonji, oloze weji kuhanjikanga. Likumbi limwe naukahanjika chihande chalikungumbuwa. Chuma kana nachikasoloka chikupu.” Mazu ahanjikile angukolezezele chikuma.

Ngwaputukile kuya naGranville muwande. Oloze jijila jajivulu mungalila yetu japwilenga jamandulya mandulya, ngocho chapwilenga chachikalu kungushindumuna muchitwamo. Shikaho, ngwamulwezele angumbachile mungolofwana. Kahomu mukiko twazachilenga hatando yayisuku. Kuheta muApril 2005, vangumbapachishile. Nakushimbula chiku, vandumbwetu vangunangwile kuzachila kumikanda nakumakina amuZuvo yaWangana.

Chaluvinda, kuheta mu 2007 tata avombele nawato, ngocho afwile. Kufwa chatata chahombesele tanga yosena. Granville ejile hembo nakutulombelako, nakutuvendejeka kuzachisa Mbimbiliya. Omu mwahichile myaka yivali kwasolokele chuma chikwavo chaushona. Granville afwile hameya.

Muchikungulwilo chetu mwasalile muka-kuzachila umwe, kaha kamwapwile mukulwaneko. Kufwa chaGranville changukolele kumuchima mwomwo apwile sepa lyami wahamuchima. Angukafwile ngupandame kuli Yehova nakungulingila vyuma vyavivulu mukuyoya chami. Omu twapwile nakukunguluka kufuma kaha hakufwa chenyi, ngwapwile nakutanga jipalangalafu haChilongesa chaKaposhi Kakutalila. Ngwatangileko kaha jipalangalafu jivali, kaha ngwaputukile kulila. Masoji atwalileho kuulumuka, ngocho ngwafumine hautenda.

Ngwaputukile jino kwivwako kanawa omu vandumbwetu vakuchikungulwilo cheka vaputukile kwiza muOrealla nakutukafwa. Kaha nawa ofesi yamutango yatumine Kojo uze apwile payiniya wakulipwila. Ngwevwile nawa kuwaha omu mama nasongo yami walunga vaputukile kulinangula Mbimbiliya nakuvambapachisa. Kuheta muMarch 2015, vangutongwele kupwa ngumuka-kuzachila. Mukuhita chalwola, ngwahanjikile chihande chami chatete chalikungumbuwa. Halikumbi kana, ngwamwesele nakusotola masoji, hakwanuka mazu ahanjikile Granville ngwenyi: “Likumbi limwe naukahanjika chihande chalikungumbuwa. Chuma kana nachikasoloka chikupu.”

Mwomwo yakutalanga jipolongalamu ja JW Broadcasting^®, ngunatachikiza vandumbwami vavavulu vaze vapwa ngana mwayami. Oloze chamokomoko nautonji wavo, vali nakuzata milimo yayivulu kaha nawa vapwa vakuwahilila. Nayami nawa kuli vyuma vimwe ngweji kulinganga. Shikaho ngwaputukile kuzata upayiniya washimbu yosena mwomwo yakufwila kuzachila Yehova nangolo jami josena. Kaha kuheta muSeptember 2019, kwasolokele chuma chize kangwashinganyekele ngwami nachisolokako. Vangutongwele kupwa ngumukulwane muchikungulwilo chize chapwile navaka-kwambulula 40.

Ngwavasakwilila vandumbwami vaze vangunangwilenga Mbimbiliya nakungukafwa nguzachile Yehova. Chachinenenyi nguli nakusakwilila Yehova mwomwo kanguvulyamako.