Navwalikili mu 1983. Kufuma tuhu kuwansi wami, nadiña wakola kumujimba, ilaña chinashikijili yaaka 10, natachikili kutiya kukata mujimba wejima. Chimwahitili yaaka yiyedi, ifuku dimu chinahindukili nakañenyi kwenda. Nesekeli kunyamuna nyendu, ilaña nakañenyi. Kufuma dina ifuku, nendahu cheñi wanyi. Muloña wanichi chikatu, nalekeli kukula. Niyinu mpinji nichidi kumwekana neyi mwana wanyanya.

Chimwahitili tukweji twantesha kufuma hinakatili, nalekeli kwenda nawa aYinsahu jaYehova ayedi enjili nakunwana. Mpinji yejima nelileña neyi kunenzi antu nadiña nakuswama, ilaña idi ifuku netejeli kuhanjeka nanawa ambanda. Chahosheliwu haParadisa, añanukishili yuma yinatiyili hinadiña nayaaka 5. Hayina mpinji, mishonali wumu wejina daJethro wadiña nakushakama kuSuriname, wenjileña mumukala wetu kamu mukakweji nakudiza Bayibolu nawatata. Jethro wadiña chiwahi. Namukeñeli nankashi. Cheñi ankaka adiña nakunsenda kukupompa kwawaYinsahu kwadiña mumukala wetu. Dichi chelili Florence wenjili hanidi ifuku yañihuli neyi nikukeña kudizilahu yuma yikwawu, netejeli.

Muhela Florence wenjili nanfumwindi, Justus, nawa wejima wawu atachikili kundizisha Bayibolu. Chelukiliwu nawu neluka wanyi kutaña, andizishili chakutaña. Mukuhita kwampinji, natachikili kuditañila. Ifuku dimu, awa adisumbula anlejeli nawu anayitumi kuya nakuzatila kuSuriname. Chawushona, hikwadiña cheñi muntu mukwawu muOrealla wateleleli kutwalekahu kundizisha Bayiboluku. Ilaña Yehova hanvulameneniku.

Hashimbwili wanyi, payiniya wejina daFloyd wenjili muOrealla nawa wanwanini hampinji yadiñayi nakushimwina kwitala nikwitala. Chañihwiliyi neyi nateli kudiza Bayibolu, naseheli. Dichi wañihwili nindi, “Wunakusehadi?” Namulejeli nami nadiza dehi broshuwa yaChumanyi Chakeñañayi Nzambi Kudi Etu? nawa natachikili kudiza mumukanda waUkwishiba Uko Kutungulula Ku Mweo Wa Muyayaya. * Nalumbulwili chuma chaletesheli nileki kudiza. Natwalekelihu kudiza namanakwetu Floyd mumukanda waUkwishiba, ilaña niyena amutumini kuya nakuzatila kwacheñi. Nashalili cheñi chakadi muntu wakundizisha Bayibolu.

Hela chochu, mu 2004, Granville naJoshua, apayiniya adimena ayedi enjili nakuzatila  kuOrealla. Adiña nakushimwina kwitala nikwitala, dichi anwanini. Chañihwiliwu neyi chakwila nukukeña kudiza, natumbili chimwemweta. Nayilejeli nami tutachiki cheñi kudiza mukanda waUkwishiba. Nakeñeleña kumona neyi chakwila akundizishaña yuma yoyimu neyi yandizishileña antañishi jami akusambila. Manakwetu Granville wanlejeli nindi kukwikalaña kupompa mumukala wetu. Hela chakwila nafuminihu wanyi hetala kwakwihi nayaaka 10, nakeñeleña kuya nakupompa. Dichi manakwetu Granville wenjili nakunsenda nawa wanshili mukakinga kawayifwayi nakuya Kwitala daWanta.

Chimwahitili mpinji, manakwetu Granville wankolesheli nindi nisonekeshi muShikola Yawakwakushimwina. Wahosheli nindi: “Wendaña wanyi, ilaña kuhosha wahoshaña. Ifuku dimu wakahana mpanji yawanta amavulu. Dichikamwekana.” Mazu anlejeliyi ankolesheli chikupu.

Natachikili kushimwina namanakwetu Granville. Hela chochu, nyikwakwa yayivulu yamumukala wetu yadiña yatama kwendelamu nakakinga kawayifwayi. Dichi namulejeli manakwetu Granville kunsendela mungolofwana. Iyi njila yazatikili chiwahi. Dichi muApril 2005 napapatisheweli. Hashimbwili wanyi amanakwetu andizishili mudimu wakuzatila kunyikanda nikuyihoshelu yaMwitala daWanta.

Chawushona, mu 2007 atata elili maposu nawatu nawa afwili. Twaneñeli nankashi. Manakwetu Granville walombeli nawa watukundejeli namazu amuBayibolu. Chimwahitili yaaka yiyedi, manakwetu Granville niyena wafwili mumaposu amuwatu, dichi twaneñeli nankashi.

Chipompelu chetu chashalili chakadi mukulumpi, ilaña mwashalili hohu nkoñi wakuzatila. Naneñeli nankashi chafwili ibwambu dami Granville. Wankwashili nankashi kuswina kwakwihi naYehova nikunkwasha muyuma yikwawu yinakeñeleña. Ifuku ditwapompeleña hanyima yakufwa kwindi, nadiña namudimu wakutaña maparagilafu muKaposhi Kakutalila. Natañiliku hohu maparagilafu ayedi, dichi natachikili kudila nawa madilu atwalekelihu kuwulumuka chakwila nafumini hachinañamu.

Natachikili kutiya chiwahi chelili amanakwetu akuchipompelu chikwawu enzi nakutukwasha kuOrealla. Cheñi kasanji kamutayi katutemesheleli manakwetu Kojo, payiniya wadimena. Nazañaleli nankashi chelili amama nimwanyikami weyala atachiki kudiza Bayibolu nawa apapatishewi. Kuhiñahu, muMarch 2015, atondeli kwikala nkoñi wakuzatila. Chimwahitili mpinji, nahanini mpanji yami yawantu amavulu yatachi. Adina ifuku nazañaleli nawa nadilili chinanukili mazu anlejeliyi manakwetu Granville nindi: “Ifuku dimu wakahana mpanji yawanta amavulu. Dichikamwekana.”

Kuhitila mumaprogiramu aha JW Broadcasting^®, nadizi yuma yayivulu hadi akwetu aYinsahu adi nakukala neyi kunikweti. Ilaña hichidi namuloña nakukala kukwetiwuku, anatwalekihu kudikita nawa adi namuzañalu. Ninami nateli kwila chochimu. Inakukeña kumuzatila Yehova hakumina ñovu jami, dichaletesheli nitachiki wupayiniya. Mu September 2019, natambwilili nsañu yinabulili kukuhwelela. Munaka kakweji antondeli kwikala mukulumpi muchipompelu chetu mwadiña akwakushimwina 40.

Nayisakililaña amanakwetu niahela andizishili nawa ankwashili kutwalekahu kumukalakela Yehova. Chuma chasweja kulema, nasakililaña muloña Yehova hanvulameneniku.