Kʼiaa nga nó 1983 kitsian. Alikui jme chʼin tjínna tsakai nga tokʼia koanjchínga, tonga kʼianga kichona te nó koankjineya ngayeje yaona. Jao nó koanskanni, toxijña likui tikoan kisikjanña kʼianga jaʼána. Koanmena tsakasenndoa tonga alikui tikoan kixinyanʼioni ndso̱koa. Saʼnda nga kʼia alikui tima bʼamjeña. Alikui tikoanngʼaña tʼatsʼe chʼin xi tjínna, tojo tiʼndí kjiʼe̱.

Jela jngo jao sá nga tokʼoasʼin tijnaʼya ndʼia nga kicho je testigole Jeobá ya ndʼiana. Tobatejnaʼmaña tsakai nga ʼya xi bichó ya ndʼianajin, tonga nga kʼia tsakjakaonajmíña je testigole Jeobá. Kʼianga kui tífákaonajmínina tʼatsʼe ʼndenaxó, kʼiaa jaʼaitsjenna nga jngo misionero xi Jethro ʼmi xi ya Surinam jaʼaini, xki̱ sá bichó ya ʼndenajin kʼoa jé kitsoyale Biblia je pana, tokʼiala aon nóna nga kʼia. Nda kichobaijin kao Jethro nga̱ nʼio nda chjota. Je pajchána sakʼoaa kikaona kjoajtín xi satíole je testigole Jeobá ya ʼndena. Kʼianga kicho ya ndʼiana nga tjíotsoyason je testigole Jeobá, je xi Florence ʼmi, kʼoakitsona tsa mena skotʼaya Biblia, kʼoa kʼoakixinle nga mena skotʼaya.

Je Florence kichokao je Justus, xi xʼinle mani, kʼoa kitsoyana Biblia. Kʼianga tsabe nga tsín mana bʼexkia, kitsoyana josʼin maxkia. Nga jeki nichxin, tochaan koanna toʼan tsakʼexkia. Chaan kʼoakitsona nga ya Surinam si̱kasén nga koaitsoyason. Alikui tiʼya testigo kisʼeni ya Orealla kʼoa alikui tiʼya xi kitsoyanina Biblia. Tonga nʼio tsjoa kisʼena nga̱ tsín kisichajinna je Jeobá.

Tochoatsee jaʼato nga jngo precursor xi Floyd ʼmi kicho ya Orealla. Kʼiaa kicho ya ndʼiana nga xki̱ ndʼia xki̱ ndʼia títsoya. Tsjoa kisʼena kʼianga kʼoakitsona tsa mena skotʼaya Biblia, “ánni bijnoni” kitsona. Kʼoakixinle nga jekiskotʼaya je folleto Jméni xi síjéná Niná kʼoa nga jetsakʼetsʼiakoa nga kiskotʼaya je libro El conocimiento que lleva a vida eterna. * Kʼoakixinle ánni nga tsín tikiskotʼayaña. Je Floyd kitsoyana saʼnda nga jetʼanajin je libro Conocimiento, tonga kʼoati xin kinikasén tsanda je. Kʼoa likui tiʼya xi kitsoyangánina.

 Kʼiaa nga nó 2004 kicho ya Orealla je Granville kao Joshua, xi precursor especial sʼin tjíosíxá. Kʼiaa tsaʼbexkoan kʼianga xki̱ ndʼia xki̱ ndʼia tjíotsoyason. Tsjoa kisʼe tokoan nga kʼoakitsona tsa mena nga skotʼaya Biblia. Kʼoakixinle nga katatsoyana ngayeje je libro Conocimiento, kui xi koanmena tsaʼbe tsa tikui kuitsoyanina jme xi saje tsakʼinyana. Je Granville kʼoakitsona nga satío kjoajtín ya ʼndena. Ninga jete nó tjínle nga tsín tibitjoña ndʼiana, koanmena nga kia. Jé Granville kichokʼána kʼoa jngo silla de ruedas kisikʼéjnayana nga kikaona ya Ndʼia jña chotʼayá.

Nga jeki nichxin, je Granville kʼoakitsona nga koa̱n kjoaʼa̱ Skuela xi síchjine choʼndale Niná. I kitsona: “ʼBeña nga tsín ma ʼmi, tonga mali nokjoai. Kuicho nichxin nga chan kʼoai kjoanokjoaya. Jchalaxóni”. Nʼio kitsjoanganʼiona jmeni xi kitsona.

Chaan ñatjen kitjokʼinyasuinjin, tonga nga chʼao chon ndiaa alikui ma nga silla de ruedas fikoa. Kʼoakixinle nga tosa carretilla katasíkʼéjnayana. Kʼiaa nga sá abril nó 2005 kisʼe̱nngindá. Nga jekoanni, an tsakánena je ndsʼee nga tsjoa je xo̱n xi Énle Niná yʼangini ya jinjtín kʼoa kʼoati an tsakatejnaʼnda je sonido.

Kʼiaa nga nó 2007 kʼien je pana nga chitso tíjnaya. Tsee kjoaba tsakiyojinjin. Je Granville tsakʼétsʼoantjainajin kʼoa kisinʼio tokuinjin nga tsakʼéxkianajin jmeni xi tso Biblia. Jao nó koanskanni ijngo kjoa tikitjatojingánijin, sajé Granville kʼienngá nga tíjnaya chitso.

Je jtín xi tíjna ʼndena alikui tiʼya kisʼeni xi chjotajchínga sʼin tsakʼejna, tojngosa siervo ministerial tsakʼejna. Nʼio aon koanna nga kʼien je Granville nga̱ nʼio nda kichobaijin kʼoa ntsjaintsjai tsakasenkaona nga tsaʼbesa xi tʼatsʼe Niná. Kʼoati tsakasenkaona nga ñʼai mana nga bʼamje. Nga kisʼejnanajin kjoajtín nga jekʼien ndsʼee jebi, an tsʼakaona nga tsakʼexkia je Xo̱n xi Bájinkonná. To jao párrafo xi koan tsakʼexkia, kʼoa xijekoan tokitjokjiʼndáña. Chaan kitjoje̱n ya plataforma nga̱ tsín tijyó tsakatejnaña.

Tokʼiaa nda kisʼe tokoan nga kicho kʼa ndsʼee xi xin jtín tjío nga kichokinyakaonajin ya Orealla. Kʼoa je sucursal jngo precursor especial kisikasén xi Kojo ʼmi. Nʼio tsjoa kisʼe tokoan nga je mana kao ndsʼe xi maʼndí kiskotʼaya Biblia kʼoa kisʼenngindá. Kʼianga sá marzo nó 2015, siervo ministerial koan. Nga jeki nichxin, chaan kitsjoa kjoanokjoaya ya jinjtín. Tsjoa koanna kʼoa kinroajen ndáxkoan nga jaʼaitsjenna nga i̱ kitsona je Granville: “Kuicho nichxin nga chan kʼoai kjoanokjoaya. Jchalaxóni”.

Nga kotsenle jmeni xi faʼa ya JW Broadcasting^®, tiʼbeña nga tjín ndsʼee xi kʼoati kui kjoa tjíofaʼatojin joni an. Ninga kui kjoa tjíojin, tsjoa tjío kon kʼoa nda tjíosíxále Niná. Kʼoati koa̱nna an nga kʼoasʼian. Precursor regular sʼin tisixá nga̱ mena sixále Jeobá jokji tjen kʼoakoa̱nna. Kʼianga sá septiembre nó 2019, nʼio tsjoa kisʼe tokoan nga chjotajchínga sʼin tsakatejna, ya jtín jñani tijna ñachanla mani publicador.

Tsjoale kjoanda je ndsʼee kao tichjaa xi tsakinyakaona nga kitsoyana Énle Niná kʼoa nga tjíobinyakaona nga tosi tonda tisixále Jeobá. Tonga jé Jeobá xi ngisa tsjoale kjoanda nga̱ tsín tísíchajinna.