Njasemukile mu 1983. Njapwile wa kulikangula ku bwanike, oloni munjakele na myaka 10, njashangumukile kuziba kubabala mubila woshe. Munima ya myaka ibali, litangwa limo munjendukile, njonowele kwenda. Njesekele munjaselele mwoshe kujundula mendi ange ngwange njende, oloni njonowele. Kushwa bene lije litangwa kweta na lelo, kunjesi na kwenda. Co lalo, ou mushongo unanjonowesa kukola. Na lelo lino, anga njiwamwihi ngwe mwanike.

Njakele lika ha njubo mwafwa ya uje mushongo. Co mukwetile bingonde byabindondo, Bakaleho ba Yehova babali batwendelele. Kakangi, njakele na kulishweka nga kunaija bangenzi, oloni mubatwendelele baje banakazi, njabatabesele basimutwiye nange. Mubakele na kwendeka bya Paradaisi, njanukile binjazibile munjakele na myaka itanu. Kamishinali wa lizina lya Jethro uje wakele mu Suriname, wakele na kwija hembo lyetu lumo ha ngonde kwa kulilongesa Mbimbiliya na batate. Jethro wakele na kunjimwesa ngozi, co njamuzemene manene. Co lalo, simbu imo bakuku bakele na kuya nange ku biwano bya Bakaleho bije bibakele na kulingila hembo lyetu. Ngeci, Florence umo wa baje banakazi banjendelele wanjihwile indi njishaka kulilongesa Mbimbiliya, co njatabele.

Florence mwezile lwa mu cibali, wezile na munalume wendi Justus, co bashangumukile kulilongesa nange Mbimbiliya. Mubanangukile ngwabo kunjizibuka kutanda, banjilongesele. Mu kwita kwa simbu, njazibukile kutanda. Litangwa limo, banjilekele ngwabo banabatumu kukapangela ku Suriname. Ngeci, wahi wasele kutwalelelaho kunjilongesa Mbimbiliya mu Orealla. Oloni Yehova kanjibalele.

Munima ya simbu yaindondo, painiya umo wa lizina lya Floyd wezile mu Orealla. Co litangwa limo mwakele na kwambulwila ku njubo na njubo, wanjiwanene. Mwanjilekele ngwendi ashaka kulilongesa nange Mbimbiliya, njamweswile. Wanjihwile ngwendi: “Bika umwesula?” Njamulekele ngwange njamanesa kulilongesa kalibulu ka Ki Sifi Seo Mulimu A Tokwa ku Luna? co njashangumuka kulilongesa mu libulu lya Zibo ye Isa kwa Bupilo bo Bu Sa Feli. * Njalekele Floyd byuma byanjonowesele kutwalelelaho. Co wamanesele kulilongesa nange libulu lya Zibo, oloni nendi lalo bamutumine  kukapangela kweka. Ha simbu eyi kukwakele munu wa kunjilongesa Mbimbiliya.

Oloni mu 2004, Granville na Joshua baje bapwile bapainiya ba kulitila bezile mu Orealla. Mubakele na kwambulwila ku njubo na njubo, banjiwanene. Mubanjilekele ngwabo bashaka kulilongesa nange Mbimbiliya, njamweswile. Njabalombele ngwange balilongese nange libulu lya Zibo kushwa ku maputukilo. Njashakele kuzibuka indi byuma bibanjilongesa bilifwa na byuma bibanjilongesele bakwabo. Granville wanjilekele ngwendi biwano bakele na kubilingila hembo lyetu. Nameme kunjasele kutunda ha njubo ha myaka ya kweta ku 10, oloni njashakele kuya ku biwano. Ngeci, Granville wakunjitwile, co wanjisindumwine mu citwamo ca mawili na kuya nange ku Njubo ya Bumwene.

Mu kwita kwa simbu, Granville wanjishongangeyeye kulisonekesa mu Sikola ya Kulilongesa Kwambulula. Wendekele ngwendi: “Nameme uciyanga oloni wasa kusimutwiya. Litangwa limo ukendeka ñanda ya mbunga. Tangwa ukayendeka bene.” Awa majwi anjitakamesele.

Njashangumukile kwambulwila hamo na Granville. Oloni bingila byetu byabingi byabihile, ngeci twecelele kupangesa citwamo ca mawili. Njalombele Granville anjisindumune kupangesa wilimbala. Kupangesa wilimbala kwatukwasele manene. Mu April 2005 banjimbwitikile. Munima ya simbu yaindondo, bandolome banjilongesele kupangela ku mabulu na ku makina mu Njubo ya Bumwene.

Calubinda mu 2007 batate batsile ku monde ya mu bwato. Naanga yetu yakele mu busiwa. Granville walombelele netu na kututandela bisoneka bya mu Mbimbiliya bije byatuzembelekele. Munima ya myaka ibali, twaliwanene na bukalu bukwabo lalo. Granville wabombelele mu ndonga, co watsile.

Mu cikungulukilo cetu mwasalele lika muka-kupangela umo kwa kujeneka mukulunu. Kutsa kwa Granville kwanjizibisile manene kubabala ku mbunge, mwafwa wapwile kabusamba kange wakama. Wanjikwasele manene ku sipilitu hamo lika na ku mubila. Mutwakungulukile munima ya kutsa kwendi, banjanene cipangi ca kutanda mapalagilafu ha simbu ya cilongesa ca Kaposhi ka Kukengela. Njesekeleko kutanda mapalagilafu abali a kulibanga, oloni njashangumukile kulila, co misozi yatwaleleleho kunjululuka. Ngeci, njatundile ha butenda.

Njalizibile mwamubwa omwo bandolome ba ku cikungulukilo ceka bezile na kutukwasa mu Orealla. Co lalo ofisi ya munango yatumine painiya wa kulitila wa lizina lya Kojo. Njabwahelelele manene omwo banana na shongo yange bashangumukile kulilongesa Mbimbiliya kweta na ha kubambwitika. Co mu March 2015, banjangwile kupwa muka-kupangela. Mu kwita kwa simbu, njendekele ñanda ya mbunga ya kulibanga. Lije litangwa njanukile majwi anjilekele Granville omwo wendekele ngwendi: “Litangwa limo ukendeka ñanda ya mbunga. Tangwa ukayendeka bene.”

Ha mapulogilamu aha JW Broadcasting,^® njalilongesa ngwange kuli bakwetu Bakaleho baje bapwa biyanga. Nameme ngoco, bali na kupanga bipangi byabingi, co bapwa ba kubwahelela. Nange kuli bimo binjasa kulinga. Lishungu lyange lya kupangesa nzili injili nayo mu bipangi bya Yehova lyanjishongangeyeye njipwe painiya wa simbu yoshe. Co mu September 2019, njatambwile muzimbu uje wanjikomokesele manene. Banjangwile kupwa mukulunu mu cikungulukilo cije cakele na baka-kwambulula 40.

Njakandelela manene kuli bandolome na bandokazi baje bananjilongesa Mbimbiliya na kunjikwasa njipangele Yehova. Co lalo, njakandelela kuli Yehova uje kanjibalele.