Nmaxuˈunkˈäjtyëts 1983. Oy mëkëts nmutskˈäjty, per kotsë njëmëjt mäjk, tats njäˈäwë ko nëgooyëtsë nniniˈkx ngëbäjk pyëjktääynyë. Ets kyum majtsk jëmëjt, tats tëgok njäˈäwë ko kyajts mbäät nˈokˈyuˈkxnë kots ojts njotwijy. Njayajˈyuˈkxanëts ja ndeky, per kyajts xynyekymyaay. Desde jaa, kyajts mbäät nekyyoˈoy. Tyäˈädë päˈäm, duˈunyëts ojts xyyajwëˈëmë, kyajts ojts nˈokˈyaˈknë. Pääty, duˈunëts ndanë extëmë ënäˈkuˈunk.

Naa majtsk poˈojëtsë nety kujk nˈijnë kuˈaduky mätsë ndëjk, kots xynyimiindë nimajtskë toxytyëjkjäˈäy diˈib Testiigë, niduˈuk txëwˈaty Florence. Xëmëts ijty nnayuˈutsyëty ko jäˈäy myiny mätsë ndëjk, per mä taabë xëëw nmëtmaytyakëts. Kots xytyukmëtmaytyaktë ja it lugäärë tsujpë, tats njamyejtsy ko ja ndeetyëts poˈoboˈo ijty yaˈëxpëkyëtyë Jethro, tuˈugë misioneerë diˈib tsoˈomp Surinam, jatsë netyë njëmëjt naa mëgoxkën. Nmëyujpyëts ijtyë Jethro mët ko xytsyojkpëts. Ets nan xywyoownëjkxtëbëts ijtyë nanwelë ndatwelë näˈäganäˈäty mä tyuˈukmuktë Testiigëty. Pääty, kotsë Florence xyyajtëëy pën nˈaknijawëyaambyëtsë Biiblyë, tats nˈanmääy ko oy.

Florence, ta jyëmbijty mëdë myëmëjjäˈäy diˈib xyëwˈäjtypy Justus, ets tats xyyaˈëxpëjktsondaktë. Ko tpëjktë kuentë ko kyajts njatyë letrë, tats xytyukniˈˈijxëdë. Ets ko waanë yˈijty, tats naytyuˈuk nletrëkäjpxnë. Per tëgok, tats xyˈanmääytyë ko japë nety të yajkaxtë Surinam. Tats ojts nwëˈëmnë naytyuˈuk, kyajts pën ojts xyˈokˈyaˈëxpëjknë, pes mätsë ngäjpnnuˈunk kyaj nety pënë Testiigë. Per nbëjkëtsë kuentë ko Jyobaa ninäˈäts xykyajäˈäytyëgooy ets kots duˈun nˈijxy, jantsy jotkujkëts xyyajnayjyäˈäwë.

Ko waanë yˈijty, ta jyajty mätsë ngäjpn tuˈugë prekursoor diˈib xyëwˈäjtypy Floyd. Kots xypyaty, ëwäˈkx käjpxwäˈkxpë nety mäjaty ja mëëytyëjk. Ets kots xyyajtëëy pën nˈëxpëkaambyëtsë Biiblyë, tats nmëtxiky. Floyd, tats xyˈanmääy: “¿Tiko mxiˈiky?”. Tats nˈatsooy ko tëtsë nety nˈëxpëjktäˈäyë foyetë ¿Ti Dios tsyojkypy ets nduˈunëm? ets të nyajtsondaˈagyëtsë liibrë El conocimiento que lleva a vida eterna, * per kyajts ojts nˈokˈyajkëjxnë ets tats ndukmëtmaytyaky tiko kyaj. Floyd, yëˈëts mëët nˈëxpëjktääyë liibrë Conocimiento, per ta nanduˈun yajkejxy wiinktsoo. Tats jatëgok ojts nwëˈëmgojpë naytyuˈuk.

Per mä jëmëjt 2004, ta yap jyäjttë nimajtskë  prekursoor espesial, Granville mëdë Joshua. Ets kots xypyattë, nanduˈunë nety yˈëwäˈkx kyäjpxwäˈkxtë mäjaty ja mëëytyëjk. Kots xyyajtëëwdë pën nˈëxpëkaambyëtsë Biiblyë, tats nxiky. Per tats nˈanmääytyë parëts jatëgok ëxˈäjp nyajtsondäˈäktët ja liibrë Conocimiento. Yëˈëtsë nety nˈixaampy pën nanduˈun yaˈëxpëktë extëm ja diˈibëts jawyiin xyyaˈëxpëjktë. Granville, tats xyˈanmääy ko yä käjpnoty yajtuumbë reunyonk. Ets ëjts nnëjkxanëts, oyëtsë nety kyaj mä nekynyijkxy nyaa mäjk jëmëjtëp. Tatsë Granville xynyinäjxy etsëts ojts xyyajnëjkxy mä siyë de rueedë.

Ko nyajxyë tiempë, tatsë Granville xyˈanmääy parëts nyajkujayët mä Yajniˈëxpëkë Diosë Tyuunk. Duˈunëts xyˈanmääy: “Tëyˈäjtën ko kyaj oy mëk myajpääty, per mgäjpxp. Jäˈtäämbë tiempë mä mdiskursaratäˈäny, ta xyˈoktimˈixët”. Xyjotmëkmooyëts kots duˈun xyˈanmääy.

Tats ogäˈän ojts mëët nëjkxy käjpxwäˈkxpë, per jantsy tsip ja nëˈë tuˈu parëts xypyadijët mä siyë de rueedë. Tats nˈanmääy ko nik oyëts xymyënëjkxët karretiyoty, ets oybyëtsëëm duˈun. Abril 2005, tats nnëbejty. Ko waanë yˈijty, tats nyajtukniˈˈijxë wiˈixëts ndunët mä yajˈyaky ets mä yaˈˈamdooyë ëxpëjkpajn ets wiˈixëts ndunët mä soniidë.

Mä jëmëjt 2007, nbatëts tuˈugë mëj ayoˈon, kënäjxëts ja ndeety barkoty ets yëˈë yajtsayujtë mä yˈawdity ja motoor. Ko nyajxy tuk xëëw majtsk xëëw, ta yˈoˈky. Mëk mon mëk tukëtsë nfamilyë ojts wyeˈemy. Granville nuˈkxtak mët ëëtsëty ets xyjotkujkmooytyëts mëdë Biiblyë. Per kyum majtsk jëmëjt, tats jatëgok nbattë mëj ayoˈon, Granville mëgiinë tuˈugë barkë ets ko yajpaty kyum majtsk xëëw, të nety yˈoˈknë.

Ja nmëguˈukˈäjtëm mëk mon mëk tuk ojts wyëˈëmdë, pes yëˈëyë nety naytyuˈuk diˈib tuump mëjjäˈäy ets jeˈeyë tuˈuk diˈib pyudëjkëbë mëjjäˈäy. Kajaatsë jäj jëmuˈumën nyajnäjxy ko Granville yˈoˈky, pes yëˈëtsë nety tuˈugë nmëtnaymyaayëbë diˈibëts xëmë xypyudëjkë parëts nmëwingoonyë Jyobaa ets kots tijaty nyajtëgoyˈajty. Ja tim jawyiimbë reunyonk diˈibëts nduundë mä netyë Granville të yˈooky, yëˈëts xypyat ngäjpxëdë parrafo mä rebistë Diˈib Xytyukˈawäˈänëm, per jeˈeyëts nmadaky ngäjpxët majtsk parrafo, tats ndëjkë jëëy yaxpë. Ets kom kyajts ojts nˈokˈamoonë, tats njënajky mä plataformë.

Per jats ogäˈänë nˈääw njot ojts kyujkë ko jyäjttë nmëguˈukˈäjtëm parëts xypyudëkëyäˈändë Orealla. Betel nan kyajx tuˈugë prekursoor espesial diˈib xyëwˈäjtypy Kojo. Jantsy jotkujkëts nnayjyäˈäwë kots ja ndääk mëdëtsë nˈutsy tyëjkëdë ëxpëjkpë ets nyëbajttë. Marsë 2015, tats nyajtuunkmooy extëmë pyudëjkëbë mëjjäˈäy. Ok, tats nyajnäjxy ja tim jawyiimbëtsë ndiskursë. Mäts jam nyajnaxy, käˈäjëtsë nwinëë ets xikëts kots njamyejtsy wiˈixëtsë Granville xyˈanmääy: “Jäˈtäämbë tiempë mä mdiskursaratäˈäny, ta xyˈoktimˈixët”.

Ko pyëtsëmyë JW Broadcasting^®, tats të nˈixyˈatyë nmëguˈukˈäjtëm diˈib nanduˈun yaˈijx yajpattëp extëm ëjts. Oy kyayajpäättë oy mëk, jantsy tuundëp ets agujk jotkujk jyukyˈattë. Ëjts nan mbäädëts tijaty nduny. Kots nmoˈoyaˈanyë Jyobaa nuˈunëtsë njot nmëjääw nmëdaty, tats nduundëjkë prekursoor regulaar. Ets septiembrë 2019, tats nyajtukˈawäˈänë diˈibëtsë nety kyaj ndimˈawixy ndimjëjpˈixy: ndunëdëts mëjjäˈäy mäts jeˈeyë nyajpäättë naa 40 publikadoor.

Nguˈëˈëw ngukäjpxëbëts ja nmëguˈukˈäjtëm diˈibëts xytyukniˈˈijxëdë ja tëyˈäjtën ets diˈibëts xypyudëjkëdë parëts nmëdunëdë Jyobaa. Per pënëts mas niˈigyë nguˈëˈëw ngukäjpxëp, yëˈë Jyobaa diˈibëts kyaj të xyjyaˈaytyëgoy.