Mo’nn ne an 1983. Pandan bann premie lane mo lavi, mo ti enn zanfan an bonn sante, me kan mo ti ena di-z-an, mo ti koumans gagn bann douler bien for partou dan mo lekor. Apepre de-z-an apre, ler mo ti leve enn gramatin, mo pa ti pe kapav bouze. Ninport ki kantite zefor mo ti fer pou bouz mo lipie, mo pa ti kapav bouz zot. Depi sa zour-la, zame mo pa’nn reisi marse ankor. Akoz mo maladi, mo’nn aret grandi osi. Azordi, mo ena mem longer ki enn zanfan.

De-trwa mwa apre ki mo’nn koumans malad ek ki mo ti nepli kapav sorti kot mwa, de Temwin Zeova ti vinn lakaz. Kan bann dimounn vinn lakaz, souvan mo abitie kasiet, me sa zour-la, mo ti les sa de ser-la koz avek mwa. Kan zot ti koz lor Paradi, mo ti rapel seki mo ti tande kan mo ti ena apepre sink-an. Sa lepok-la, enn misioner ki ti apel Jethro ek ki ti res Suriname, ti pe vinn dan nou vilaz enn fwa par mwa pou etidie Labib avek mo papa. Jethro ti bien zanti avek mwa. Mo ti bien kontan li. Anplis, kan mo bann gran-paran ti al dan bann renion ki bann Temwin ti organize dan nou vilaz, zot ti amenn mwa avek zot. Alor, kan Florence, enn parmi sa de ser ki ti vizit mwa la, ti demann mwa si mo ti anvi aprann plis, mo ti reponn wi.

Kan Florence ti retourne, li ti vinn avek so mari, Justus, ek zot ti koumans etidie Labib avek mwa. Kan zot ti trouve ki mo pa ti konn lir, zot ti ed mwa pou aprann lir. Apre inpe letan, mo ti pe kapav lir par momem. Enn zour, Florence ek Justus ti dir mwa ki zot lafektasion ti sanze. Zot ti pe al servi dan Suriname. Malerezman, pa ti ena personn dan Orealla pou kontign fer mo letid. Me Zeova pa ti bliye mwa.

Inpe letan apre, enn pionie ki ti apel Floyd ti vinn dan Orealla, ek li ti zwenn mwa kan li ti pe prese. Kan li ti explik mwa seki pase dan enn letid Labib, mo ti fer enn sourir. Li ti demann mwa: “Kifer to pe riye?” Mo ti dir li ki mo ti fini etidie brosir Ki Bondye Pe Demann Nu? ek ki mo ti koumans etidie liv Konesans Ki Amenn ver Lavi pu Tuletan. * Mo ti explik li osi kifer mo letid ti arete. Floyd ti terminn liv Konesans avek mwa, me apre sa li osi so lafektasion ti sanze. Ankor  enn fwa, pa ti ena personn pou fer mo letid.

Selman, an 2004, Granville ek Joshua, de pionie spesial, ti vinn servi dan Orealla. Zot ti zwenn mwa kan zot ti pe prese. Kan zot ti demann mwa si mo ti anvi etidie Labib, mo ti fer enn sourir. Mo ti demann zot pou refer mo letid dan liv Konesans. Mo ti anvi kone si zot ti pou ansegn bann mem kitsoz ki bann lezot ansegnan ti ansegn mwa. Granville ti dir mwa ki ti pe fer bann renion dan vilaz. Mem si sa ti fer apepre di-z-an ki mo pa ti sorti kot mwa, mo ti anvi asiste bann renion. Alor, Granville ti vinn lakaz, li ti met mwa lor enn fotey roulant, ek li ti amenn mwa Lasal.

Inpe letan apre, Granville ti ankouraz mwa pou met mo nom dan Lekol Minister Teokratik. Li ti dir mwa: “To andikape, me to kapav koze. Enn zour, to pou fer enn diskour piblik. Sa pou arive.” Sa ti bien ankouraz mwa ek ti fer mwa ena konfians an momem.

Mo ti koumans prese avek Granville. Selman, dan mo vilaz, ti ena boukou sime later ki ti bien kas-kase ek sa ti bien difisil pou roul lor la dan mo fotey roulant. Alor, mo ti demann Granville pou met mwa dan enn bouret ek pous mwa. Sa metod-la ti mars bien. Mo’nn pran batem an Avril 2005. Inpe apre, bann frer ti form mwa pou okip bann piblikasion ek sono.

An 2007, mo papa ti fer enn aksidan bato ek li ti mor. Nou fami ti bien down. Granville ti priye pou nou ek li ti partaz bann verse Labib bien rekonfortan. De-z-an plitar, enn lot kitsoz ti bien boulvers nou: Granville ti fer enn aksidan bato ek li ti mor.

Anplis, nou ti nepli ena ansien dan nou lasanble, nou ti res zis enn asistan ministeryel. Granville ti enn bon kamarad ek so lamor ti les enn gran vid dan mo lavi. Li ti touletan ed mwa pou vinn pros ar Zeova ek pou gagn bann lezot kitsoz ki mo ti bizin. Prosin renion ki ti fer apre so lamor, mo ti bizin lir bann paragraf pou Latour Degard. Mo ti reisi lir ziska paragraf de, me apre sa, mo ti koumans plore. Mo pa ti pe kapav aret plore, ek mo’nn bizin sorti lor lestrad.

Mo ti koumans santi mwa pli bien kan bann frer, ki ti sorti dan enn lot lasanble, ti vinn ede dan Orealla. Biro nasional ti osi avoy enn lot pionie spesial, ki ti apel Kojo. Mo ti bien kontan kan mo mama ek mo pli zenn frer ti koumans etidie ek ti pran batem. An Mars 2015, mo ti nome asistan ministeryel. Inpe letan apre, mo ti fer mo premie diskour piblik. Sa zour-la, mo ti plore kan mo ti rapel seki Granville ti dir mwa de-trwa lane avan: “Enn zour, to pou fer enn diskour piblik. Sa pou arive.”

Gras-a Program Televizion JW, mo’nn kone ki ena lezot frer ek ser ki dan mem sitiasion ki mwa. Malgre zot andikap, zot pe reisi fer boukou kitsoz ek zot ere. Mwa osi, mo pe reisi fer sertin kitsoz. Mo ti anvi fer mo best pou Zeova. Alor, mo’nn koumans fer pionie. An Septam 2019, mo’nn gagn enn nouvel ki mo pa ti pe atann! Mo ti nome kouma ansien dan nou lasanble, kot ena apepre 40 proklamater.

Mo bien rekonesans anver bann frer ek ser ki’nn fer mo letid ek ki’nn ed mwa pou akonpli mo minister. Me pli inportan, mo bien rekonesan anver Zeova ki pa’nn bliye mwa!