Navilwe umu 1983. Pa kutandika, ivintu vyali sile ningo, nomba lino nafisizye imyaka 10, natandike ukuvwa sana ukuwaya mu mwili. Lino papisile imyaka iili, nizile inzyuka imfilwa ukukatuka. Nezizye na maka ukukatuka, lelo ntaakweti amaka mu makuulu. Kufuma uwanda kwene uwa, ntatala napitapo. Ulwale uwa walenzile ukuti ntaakula. Na ndakai kwene, nkaloleka sile wa mwance.

Imyezi inono ukufuma pano nalwaliile nupya ntafumanga pa ng’anda, ya Nte Yakwe Yeova yaili yantandaliile. Aenyi nga iza, ilingi nafisamanga, nomba uwanda uwa ntafisime nupya twalanzyanyizye na anaci yaya yaili. Lino yalanzile pali Paladaise, niwisye vino nuvwilepo ala ndi sile ni myaka 5. Pa nsita iya, misyonali uwi zina lyakuti Jethro, uwikalanga umu Suriname, watandalilanga umuzi witu umuku onga umu mwezi nupya wasambililanga Baibo na ya tata. Ya Jethro yali ni cikuuku. Nayatemilwe sana. Nupya, kuuku na mama yansendanga umu kulongana pamwi na ya Nte ukwayelile mu muzi witu. Fwandi lino ya Florence aantandalile uwanda uwa yanguzizye ndi cakuti ningatemwa ukumanyilapo na vyuze, nazumile.

Ya Florence yawezile na ya iya, nupya yatandike ukunsambilizya Baibo. Lino yaweni ukuti ntamanyile ukubelenga, yansambilizye ukumanya ukubelenga. Lino papisile insita, nizile intandika ukuibelengela. Wanda umwi, atwalane yaa yanenyile ukuti iyayatuma uku kuombela ku Suriname. Icaulanda i cakuti, kutaali ali wensi umu Orealla uwali nu kutwalilila ukulansambilizya Baibo. Nomba, Yeova ataatazile anjilile.

Lino patatala palengela, painiya uwi zina lyakuti Floyd wizile umu muzi witu, nupya wanzanyile pa ng’anda lino wasimikilanga uku ng’anda ni ng’anda. Lino wanenyile pa kusambilila Baibo, namwentwile. Wanguzizye ati: “U mulandu ci uno ukumwentula?” Naswike inti namala akabuku kakuti What Does God Require of Us? nupya natandika ni buku lyakuti Knowledge That Leads to Everlasting Life. * Nalondolwile umulandu uno nalekela ukusambilila. Twamazile ukusambilila nayo ibuku lyakuti Knowledge, nomba nayo kwene izile iyapita lino yayatumile umu kuombela kuze. Nupya kwene nizile insyala ukwaula uwa kunsambilizya Baibo.

Nomba, umu 2004, ya painiya yaili aiyele ya Granville na ya Joshua yayatumile ku kuombela  kuno kwene ku Orealla. Izile iyanzana lino yasimikilanga uku ng’anda ni ng’anda. Lino yanguzizye ndi cakuti ningatemwa ukusambilila, namwentwile. Nayanenyile ukuti yatandike sile ukunsambilizya umwi buku lyakuti Knowledge. Nalondanga ukulola ndi cakuti nayo kwene yamansambilizyanga wakwe vivi kwene vino ansambilizyanga mpiti yansambilizye. Ya Granville yanenyile ukuti kwali nu kuya ukulongana mu muzi. Nanti icakuti ntaatazile imfumepo pa ng’anda umupipi ni myaka 10, nalondesyanga ukuzanwako. Fwandi ya Granville izile iyansenda pa ng’anda iyankunkulusya pa kajinga ka yalemale mpaka uku Ng’anda ya Wene.

Lino papisile insita, ya Granville yankomelizye ukulembesya umwi Sukulu lya Mulimo Wakwe Leza. Yanenyile ukuti: “Walemala, nomba ungalanda. Wanda umwi ulalanda ilyasi ku yantu yonsi. Ulasuka ulande.” Vino yanenyile vyankomelizye sana.

Natandike ukusimikila pamwi na ya Granville. Nomba, umu miseo iingi mwali viwina fwandi cali icitale ukupisya kajinga. Fwandi nanenyile ya Granville ukuti yankunkulusya muli wiluba. Kucita vivyo kwaomvile ningo sana. Mu Epuleo 2005, nabatiziwe. Lilyo kwene sile, aina yansambilizye ukusunga impapulo zya cilongano nu kuombela ku viombelo vya mazwi umu Ng’anda ya Wene.

Ica ulanda i cakuti, umu 2007, ya tata yafwile mu uzanzo wa pa manzi. Ulupwa lwitu lwali sana nu ulanda. Ya Granville yapepiile pamwi naswe nu kutubelengelako malembelo ya kututeekezya. Lino papisile imyaka iili, icintu na cuze iciipisye cizile icicitika, ya Granville izile iyafwa umu uzanzo wa pa manzi.

Icilongano citu icinono casiile sile nu muomvi aakatumikila wenga ukwaula eluda. Nali sana nu ulanda pa mulandu wakuti ya cuza yane ya Granville yafwile. Yangazwile ukupalama sana kuli Yeova nu kungazwa muli vino nalondekwanga. Pa kulongana ukwalondelilepo pa cisila ca mfwa yakwe ya Granville, nene nabelenganga Lupungu Lwa Mulinzi. Nabelenzile sile mapalaglafu yaili, lyene intandika ukulila na minsozi iyaiponela sile. Nizile imfuma pa pulatifomu.

Nizile intandika ukuyako ni nsansa lino aina ukufuma uku cilongano cuze izile umu kutwazwa umu Orealla. Nupya iofesi lya musambo lyatutumiile ya Kojo ya painiya aiyele. Ni calenzile naya sana nu luzango i cakuti ya mayo nu mutowane izile iyatandika ukusambilila Baibo nu kubatiziwa. Lyene umu Maaci 2015, nasonsilwe ukuya muomvi aakatumikila. Lino papisile insita, nizile indanda ilyasi ku yantu yonsi lya kutandikilako. Uwanda uwa, namwentwile nu kulila lino niwisye vino ya Granville yanenyile imyaka imwi uku cisila ukuti: “Wanda umwi ulalanda ilyasi ku yantu yonsi. Ulasuka ulande.”

Mu mapuloglamu aapa JW Broadcasting^®, nasambilila pa ina na ya nkazi aakwata intazi wakwe zino nakwatako. Asi mulandu yalemala, yakaombesya nupya yaya sana ni nsansa. Nani kwene, ningacitako vimwi. Nalondanga ukupeela Yeova vino ningakwanisya, ali mulandu kwene uno natandikiile upainiya wa nsita yonsi. Kwali na cuze icanzungwisye umu Sepetemba 2019! Nizile insontwa ukuya eluda mu cilongano icakweti ya kasimikila 40.

Nkataizya sana aina na ya nkazi ansambilizyanga na pali vino yangavwile ukutwalilila ukuombela Yeova. Ni cicindamisye i cakuti, nkataizya sana Yeova pano ataatazile anjilile.