Miyo gibaliwe yaka ya 1983. Gibaliwaga galigana ni ahima amodhaya. Mbwenye nganna ya 10 miyo obajha woona widdela mwili watene, nganna yaka 12, mambesi gavennye gihandaga widdiginya. Naari gilibiheraga kaganda oddiginya mweddo dhaaga, mweddo dhaaga kadhanna kopolo. Okuma labo nenno ofiyedha peeno, kaginanda weedda. Oredda ola ohugeriha wihina gihunnuwe. Ofiyedha peeno ginakala ninga mwana.

Dhahivira mwana mweridhene gihivenyaga vaade, mudhidhi yoyo Anamona ogipaada. Mbwenye mudhidhi watene muthu adhiiye vaade miyo geresa wipita. Labo nenne miyo orumedha othapanya naahiyana ale abili Anamona a Yehova, aliwa obajha owoga wodhela parayizu, miyo wubuwela ethu giwalimi nganna yaka tanu. Mudhidhi yoyo Misiyonariyu ithaniwa Jethro akalesa oSuriname odheesa murudda wehu viyaje modha vamwerini wihina ahudhihe apapa, Jethro kaginyoza, miyo goomudhivela vanlubale. Ohiya eyo avovwaga yogithukulelesa omutugumanoni dha Anamona a Yehova dhereyesa murudda wehu. Vano Florence ni namona a Yehova yadhele ogipaada labo nenne yagikonhiwa akala goofuna odhowaganave ohudhera, miyo wera hee.

Florence ohogolowa ni mamune Justus, aliwa obajha ogihudhiha Bibliya, aliwa woona wihina miyo kaganda wileri vano ogihudhiha wileri. Nuuvira mudhidhi miyo gowanda wileri meeka. Labo nimodha Florence ni Justus ogaddela wihina yere otamihedhiwa murudda wo Suriname. Mowukuliha kaavo muthu mmodha a murudda wo Orealla ahale agihudhihaga Bibliya. Mbwenye Yehova kagidduwalile.

Kuvinre mudhidhi wowinjhivene Piyonero onithaniwa Floyd odha murudda wo Orealla. Alaleyaga nyumba ni nyumba oliye ogifwanya, awogiliye wodhela ogihudhiha Bibliya miyo obajha oteya. Oliye ogikoha egi: “Onateya ddi?” Miyo omwaddela wihina ganna omuhudhera buruxura O Que Deus Requer de Nós? Ni gahibajha ohudhera livuru Conhecimento Que Conduz à Vida Eterna. * Vano miyo omwaddela ethu yagerinhe ohiya ohudhera, Floyd obajha ogihudhiha Conhecimento. Nuwindo oliye othomiwa wihina aye murudda mmodhaya, miyo gihala gihina muthu oogisuziha Bibliya.

 Vano yaka ya 2004, mapiyonero avayekiwa yithaniwa Granville ni Joshua othomeliwa murudda wo Orealla, elaleyaga nyumba ni nyumba aliwa ogifwanya ogikoha akala goofuna omuhudhera Bibliya, miyo oteya. Miyo oloba wihina ebajhe ogihudhiha livuru Conhecimento. Gafuna goone akala yere ogihudhiha dhithu dhimodhave yagihudhihile anamahudhihaga akale. Granville ogaddela wihina muruddaga wahikala wego watugumaniwa, dhahivira yaka dhowakwana 10 gihivenyaga vaade, mbwenye miyo goofuna woona mutugumano. Vano Granville ogidhela vaade ogithukula ni karinya ogidhowana Nyumba Yomwene.

Nuuvira mudhidhi Granville ogikongomedha wihina giilebihe mu Escola do Ministério Teocrático. Oliye owoga egi: “We kunanda wedda, mbwenye onowanda owoga. Labo nimodha onere owoga mwaha wa vathaddo. Miyo gihikanna ebaribari!” Madhu ala yahigilibiha vanlubale. Miyo obajha olaleya ni Granville, mbwenye dila dha murudda waaga dhari dhotibeyadhene yoorusa weedda ni kaarinyu. Nuwindo miyo omuloba Granville wihina agihelege kaarinyu ya mmadani wi agithunyege, eyo yahikavihera vanlubale. Mweri wa Abril a 2005 miyo obaddiziwa. Mudhidhi vang’ono addibila ogixagiha wihina gisamalelege malivuru ni omusamalela radiyu a mmulogoni.

Mowukuula yaka ya 2007 papaga obwina ni baruku okwa. Amudhi aaga yahisimwela vanlubale. Vano Granville olobela ni onlibiha ni dholebela dha mBibiliyani. Nuuvira yaka bili opadduwa ng’ovi emodha, Granville obwina ni baruku okwa.

Mulogo wehu wanna wunla, kuwanna namaholela wanna mudhari okavihera mmodha. Okwa wa Granville wahigukula vanlubale, mwaha aali mukwaga gamuroromelimi. Ali muthu anna odhivela ohunamala, agisamalela epaddi yomwilini ni yomuzimuni. Nuukwa miyo gaali namileri a Namasugwera, gandile wileri ddima bili baahi, vano miyo obajha wunla kaganda omala.

Gabanjhe woona embwenye-mbwenye yaadhiliwa addibila amulogo mmodha o Orealla wihina enikavihere. Ohiya eyo Beteli omuruma Piyonero avayeka anithaniwa Kojo wihina akaviherege murudda wehu. Ethu yohagalasa mamaga vamodha nddibilaga amung’ono obajha omuhudhera Bibliya, vano ehibaddiziwa. Mweri wa Março a 2015 miyo othomiwa ninga mudhari okavihera, nuuvira mudhidhi vang’ono miyo owoga mwaha wa vathaddo. Labo nenne miyo wubuwela awogile Granville yaka mundduli egi: “Labo nimodha onere owoga mwaha wa vathaddo. Miyo gihikanna ebaribari!” Miyo oteya teto wunla mwaha ohagalala.

Gimoonaga porogarama a JW Broadcasting® gihoona dhopadduwa dha addibila enna makathamiho ninga yala ginnimina. Naari ni makathamiho ala, aliwa ehikanna egumi yapama ni yohagalasa. Ni miyowa ginowanda werana dhithu dhimodha. Miyo ginofuna omwerela Yehova dhithu ginandimi, bumwahaya miyo okala piyonero a mudhidhi wamutene. Yaka ya 2019 gahihagalala vanlubale! Miyo othomiwa ninga namaholela mulogo wa murudda wehu wanna anamalaleya owakwana 40.

Ginowatamalela vanlubale addibila vamodha naarogola egihudhinhe ni egikavihere mmabasani aaga a Yehova. Mwadhatedhene ginomutamalela Yehova ahigidduwalile.