Ka̱kui̱ tá ku̱i̱ya̱ 1983. Tá ni̱xi̱yo loʼi̱ va̱ása níxi̱kuumiíi̱ kue̱ʼe̱, soo tá kúúmiíi̱ u̱xu̱ ku̱i̱ya̱ ki̱xáʼa ndeéní kúʼvi̱ ku̱ñui̱. Tá ni̱ya̱ʼa u̱vi̱ ku̱i̱ya̱ tá nda̱koi̱ xi̱ta̱a̱n va̱ása níkivika kandai̱, ni xi̱kuni̱níi̱ sakándai̱ xa̱ʼíi̱ va̱ása níxi̱yo ndeéi̱. Nda̱a̱ tiempo kán ta nda̱a̱ vitin va̱ása kívika kakai̱. Ta xa̱ʼa̱ ña̱ kúúmiíi̱ kue̱ʼe̱ yóʼo va̱ása níxaʼnui̱. Ña̱kán nda̱a̱ táki̱ʼva náʼa̱ iin ta̱ loʼo saá náʼi̱.

Xa̱a̱ ku̱a̱ʼá yo̱o̱ kúú ña̱ va̱ása kítai̱ veʼi̱ tá ki̱xi u̱vi̱ ná nána ná kúú testigo Jehová xi̱toná ndi̱ʼi̱, iinñá Florence naníñá. Tá xi̱kixi inkana veʼendi̱ xi̱chiseʼíi̱ miíi̱, soo ki̱vi̱ kán ta̱xii̱ ña̱ ná natúʼunná xíʼi̱n. Tá ni̱ka̱ʼa̱nná xíʼi̱n xa̱ʼa̱ ñuyǐví livi, nda̱ka̱ʼíi̱n ña̱ tá xi̱kuumiíi̱ u̱ʼu̱n ku̱i̱ya̱ xi̱kixi iin ta̱ misionero ta̱ naní Jethro ta̱ xi̱kee ñuu Surinam, iin yichi̱ nu̱ú yo̱o̱ xi̱kixira ñuundi̱ ta xi̱sanáʼa̱ra yivái̱ xa̱ʼa̱ tu̱ʼun Ndióxi̱. Va̱ʼaní xi̱kunii̱ tá xi̱kixi ta̱ Jethro saáchi viíní xi̱ka̱ʼa̱nra xíʼi̱n. Ta saátu, sava yichi̱ ni̱xa̱ʼi̱n xíʼin na̱ xi̱íi̱ reunión ña̱ xi̱keʼé na̱ testigo Jehová ñuundi̱. Ña̱kán, tá ni̱nda̱ka̱tu̱ʼun ñá Florence yi̱ʼi̱ á kúni̱kai̱ sakuaʼi̱ xa̱ʼa̱ Biblia, ni̱ka̱ʼi̱n ña̱ kúni̱vai̱.

Ñá Florence ndi̱kóñá xíʼin yiíñá ta̱ naní Justus, ta ki̱xáʼana káʼvina xíʼi̱n xa̱ʼa̱ Biblia. Tá ki̱ʼinna kuenta ña̱ va̱ása xínii̱ kaʼvii̱ sa̱náʼa̱na yi̱ʼi̱. Tá ni̱ya̱ʼa tiempo xa̱a̱ sa̱kuaʼa iinlá miíi̱ kaʼvii̱. Iin ki̱vi̱ ni̱ka̱ʼa̱nna xíʼi̱n ña̱ chi̱ndaʼánana chí ñuu Surinam ña̱ ku̱ʼu̱nna natúʼunna xíʼin na̱ yiví xa̱ʼa̱ Ndióxi̱. Xa̱ʼa̱ ña̱yóʼo va̱ása níxi̱yoka na̱ kivi sanáʼa̱ yi̱ʼi̱ xa̱ʼa̱ Biblia chí ñuu Orealla. Soo ni̱kusi̱íní-inii̱ tá ki̱ʼii̱n kuenta ña̱ va̱ása nínandósó-ini Jehová xa̱ʼíi̱.

Tá ni̱ya̱ʼa loʼo tiempo ki̱xaa̱ iin ta̱ precursor ta̱ naní Floyd ñuu Orealla. Iin ki̱vi̱ tá xíkara nátúʼunra veʼe tá veʼe nda̱ni̱ʼíra yi̱ʼi̱. Tá ni̱nda̱ka̱tu̱ʼunra yi̱ʼi̱ á kúni̱i̱ sakuaʼi̱ xa̱ʼa̱ Biblia, ni̱xa̱ku̱i̱. Ta ni̱nda̱ka̱tu̱ʼunra yi̱ʼi̱ nda̱chun xáku̱i̱, ni̱ka̱ʼi̱n xíʼinra ña̱ xa̱a̱ sa̱ndíʼii̱ ka̱ʼvii̱ folleto ña̱ naní ¿Qué exige Dios de nosotros?, ta saátu xa̱a̱ ki̱xáʼíi̱ káʼvii̱ libro ña̱ naní El conocimiento que lleva a vida eterna. * Ta ni̱ka̱ʼi̱n xíʼinra nda̱chun kúú ña̱ va̱ása níkivika kaʼvii̱ Biblia. Ta̱ Floyd kúú ta̱ ka̱ʼvi xíʼi̱n tasaá sa̱ndíʼi̱ ka̱ʼvii̱ libro Conocimiento, soo saátu ta̱yóʼo chi̱ndaʼánara ku̱a̱ʼa̱nra inka ñuu ña̱ va̱ʼa kachíñura nu̱ú Ndióxi̱. Xa̱ʼa̱ ña̱yóʼo va̱ása níxi̱yoka na̱ sanáʼa̱ yi̱ʼi̱.

Tá ku̱i̱ya̱ 2004 ki̱xaa̱ u̱vi̱ na̱ precursor especial ñuu Orealla, ta̱ Granville xíʼin ta̱ Joshua.  Tá xíkana nátúʼunna veʼe tá veʼe nda̱ni̱ʼína yi̱ʼi̱. Tá ni̱nda̱ka̱tu̱ʼunna yi̱ʼi̱ á kúni̱i̱ sakuaʼi̱ xa̱ʼa̱ Biblia, ku̱si̱íní-inii̱. Ta ni̱ka̱ʼi̱n xíʼinna ña̱ ná kixáʼandi̱ kaʼvindi̱ libro Conocimiento. Xi̱kuni̱i̱ kunda̱a̱-inii̱ á inkáchi koo ña̱ sanáʼa̱na yi̱ʼi̱ xíʼin ña̱ xi̱sanáʼa̱na yi̱ʼi̱ tá ya̱chi̱. Ta̱ Granville ni̱ka̱ʼa̱nra xíʼi̱n ña̱ xi̱keʼéna reunión ñui̱. Ni xa̱a̱ u̱xu̱ ku̱i̱ya̱ kúú ña̱ ta̱ʼán kitai̱ veʼi̱ soo xi̱kunii̱ ku̱ʼi̱n. Tasaá, ta̱ Granville ni̱ya̱ʼara xa̱ʼíi̱ ta nu̱ú iin tayi̱ tú ñúʼu llanta xa̱ʼa̱ ni̱xi̱yoi̱ ña̱ va̱ʼa ni̱xa̱ʼi̱n xíʼinra nda̱a̱ salón.

Tá ni̱ya̱ʼa tiempo ta̱ Granville ni̱ka̱ʼa̱nra xíʼi̱n ña̱ ná kaʼyíi̱ ki̱víi̱ ña̱ va̱ʼa ya̱ʼi̱ ti̱xin Escuela del Ministerio Teocrático. Ta ni̱ka̱ʼa̱nra xíʼi̱n: “Ña̱ nda̱a̱ kúú ña̱ va̱ása kívi kakaún, soo va̱ʼava káʼún. Ta nda̱a̱ kivi taxiún iin discurso, kuchiñuvaún keʼúnña”. Ña̱ ni̱ka̱ʼa̱nra chi̱ka̱a̱níña ndee̱ xíʼi̱n ta nda̱sandakúña-inii̱.

Ki̱xáʼíi̱ xáʼi̱n xíʼinra ña̱ va̱ʼa natúʼunndi̱ xíʼin na̱ yiví xa̱ʼa̱ Ndióxi̱, soo xa̱ʼa̱ ña̱ kininí káa yichi̱ ña̱ íyo ñui̱ va̱ása níkivi ku̱ʼi̱n xíʼin tayi̱ tú ñúʼu llanta xa̱ʼa̱. Ña̱kán ni̱ka̱ʼi̱n xíʼinra ña̱ va̱ʼaka xíʼin iin carretilla ku̱ʼi̱n, ta va̱ʼaníva xi̱xa̱ʼa̱nndi̱. Ta tá yo̱o̱ abril ña̱ ku̱i̱ya̱ 2005 nda̱kuchii̱. Tá ni̱ya̱ʼa loʼo tiempo na̱ hermano sa̱náʼa̱na yi̱ʼi̱ ña̱ kiʼi̱n kuenta xíʼin tutu ña̱ tává na̱ ñuu Ndióxi̱ ña̱ xíniñúʼu na̱ congregación, ta saátu ña̱ kuniñúʼi̱ sonido ña̱ íyo ti̱xin salón.

Soo tá ku̱i̱ya̱ 2007 íyo iin ña̱ ndo̱ʼo barco tú ku̱a̱ʼa̱n yivái̱ xíʼin ta ni̱xi̱ʼi̱ra. Ku̱suchíní-ini na̱ veʼi̱ xa̱ʼa̱ ña̱yóʼo. Ta̱ Granville xi̱xiniñúʼura tu̱ʼun Ndióxi̱ ña̱ va̱ʼa sandíkora-inindi̱ ta xi̱ka̱ʼa̱nra xíʼin Ndióxi̱ xa̱ʼa̱ndi̱. Tá ni̱ya̱ʼa u̱vi̱ ku̱i̱ya̱ ndo̱ʼondi̱ inka tu̱ndóʼo: ta̱ Granville ni̱xi̱ʼi̱ra tá ku̱a̱ʼa̱nra xíʼin iin barco.

Ku̱suchíní-ini na̱ congregación xa̱ʼa̱ ña̱yóʼo saáchi kǒo nda̱a̱ ni iin na̱ anciano ta iinlá kuití siervo ministerial ni̱xi̱yo. Ku̱suchíní-inii̱ xa̱ʼa̱ ña̱ ni̱xi̱ʼi̱ ta̱ Granville, saáchi va̱ʼaní xi̱kitáʼanra xíʼi̱n ta xi̱chindeétáʼanra xíʼi̱n ña̱ kuyatinkai̱ nu̱ú Jehová ta saátu xi̱chindeéra yi̱ʼi̱ ña̱ keʼíi̱ inkaka ña̱ʼa. Reunión ña̱ nu̱ú ni̱xi̱yo tá xa̱a̱ ni̱xi̱ʼi̱ra, yi̱ʼi̱ kúú ta̱ kaʼvi párrafo ña̱ va̱xi nu̱ú La Atalaya. Ku̱chiñui̱ ka̱ʼvii̱ u̱vi̱ párrafo soo tándi̱ʼi ki̱xáʼíi̱ xákui̱. Tasaá va̱ʼaka nu̱i̱ nu̱ú plataforma saáchi va̱ása níkivika kaʼvii̱.

Ta va̱ʼaka ki̱xáʼa ku̱nii̱ tá ki̱xi inka na̱ hermano na̱ ke̱e inka congregación ña̱ chindeétáʼanna xíʼinndi̱. Ta saátu na̱ Betel chi̱ndaʼána iin ta̱ precursor especial ta̱ naní Kojo. Ku̱si̱íní-inii̱ saáchi siʼíi̱ xíʼin ñanii̱ ta̱ loʼo ki̱xáʼana káʼvina Biblia ta nda̱kuchina. Tá yo̱o̱ marzo ña̱ ku̱i̱ya̱ 2015 ni̱ka̱ʼa̱nna xíʼi̱n ña̱ koi̱ siervo ministerial, ta tá ni̱ya̱ʼa tiempo ta̱xii̱ iin discurso. Ki̱vi̱ kán ku̱si̱íní-inii̱, ta ki̱xáʼi̱ xákui̱ tá nda̱kaʼíi̱n xa̱ʼa̱ ña̱ ni̱ka̱ʼa̱n ta̱ Granville xíʼi̱n ku̱a̱ʼá ku̱i̱ya̱ chí sa̱tá: “Ta nda̱a̱ kivi taxiún iin discurso, kuchiñuvaún keʼúnña”.

Tíxa̱ʼvi programa ña̱ JW Broadcasting^®, xa̱a̱ kúnda̱a̱-inii̱ xa̱ʼa̱ na̱ hermano na̱ ndóʼo táʼan ña̱ ndóʼo yi̱ʼi̱ chi ni kúúmiína kue̱ʼe̱ chíka̱a̱na ndee̱ ña̱ kachíñuna nu̱ú Ndióxi̱ ta kúsi̱í-inina. Ta saátu yi̱ʼi̱ kiviva keʼíi̱ sava ña̱ʼa. Xa̱ʼa̱ ña̱ kúni̱níi̱ kachíñui̱ nu̱ú Jehová ki̱xáʼíi̱ kúi̱ precursor regular. Tá yo̱o̱ septiembre ña̱ ku̱i̱ya̱ 2019 ni̱kusi̱íní-inii̱ saáchi ni̱ka̱ʼa̱nna xíʼi̱n ña̱ koi̱ anciano ti̱xin congregación, ña̱ kúúmií 40 publicador.

Táxiníi̱ tíxa̱ʼvi ndaʼa̱ na̱ hermano xíʼin ná hermana na̱ sanáʼa̱ yi̱ʼi̱ xa̱ʼa̱ ña̱ nda̱a̱, ta saátu chi̱ndeétáʼanna xíʼi̱n ña̱ kachíñui̱ nu̱ú Jehová. Soo táxiníkai̱ tíxa̱ʼvi ndaʼa̱ Jehová saáchi va̱ása nándósó-inira xa̱ʼíi̱.