Nja semukile mu 1983. Mu miaka ya katete ya muono uange, nja kele na cihindu ca cili, vunoni mu nja puisile miaka likumi, nja putukile ku ivua ku vavala ca kama mu muvila uose. Kaha tangua limo ku cimene, tele njili na miaka 12, ka nja hasele ku hinduka cipue ku lininganga. Vutuhu nja lingile ndzili yose mu ku ninganga mikono yange, vunoni ka nja hasele muomu ya tontuele. Tunde tangua lize, ka nja hasele kuenda na lelo lino. Musongo uaco ua nji kimbitisa naua muvila, ka nje ku kola. Na lelo lino, kasi nje ku soloka ngue kanike.

Ka nja hasele ku tunda ha ndzivo mu vingonde vivali. Kaha tangua limo Vakaleho va Yehova vezile ku ndzivo yetu. Nga hembo lietu heza vangendzi, nja kele na ku vanda, vunoni tangua lize, nja tavesele vaze vampuevo Vakaleho va Yehova va handeke nange. Mu va putukile ku handeka via citungu, nja vulukile vimo vi nja vuile tele njili na miaka itanu. Muomu kua kele umo misionaliu lizina lieni Jethro, ua ku Suriname, ua kele na ku iza-iza kuimbo lietu lumo lika mu ngonde mu ku lilongesa Mbimbiliya na vatate. Jethro, ua kele na ku nji muesa ngozi ya kama. Ngeci nja mu lemene cikuma. Kaha naua, vakuku va sema vatate vakele na kuya nange ku vimo viuano via Vakaleho va Yehova via kele na ku hitila vene muimbo lietu. Ngeci mukemuo, omo Florence umo ua vaze vampuevo vavali vezile hembo lietu, ua nji huile nga nji tonda ku tantekeya mizimbu ikuavo ku tuala ha Mbimbiliya, nja tavele.

Mu nima ya ntsimbu, Florence uezile naua na yalieni Justus, kaha va putukile ku lilongesa nange Mbimbiliya. Mu va muene ngecize, ka nji tantekeyamo ku tanda, va nji longesele. Mu nima ya imo ntsimbu, nja tantekeyele ku tanda. Tangua limo, vaze vampuevo na yala va nji lekele ngecize va na va tumu ku ka pangela ku Suriname. Ca vusiua ku handeka ngecize, muimbo lietu ka mua kele naua ueka ue ku tualeleleho ku lilongesa nange Mbimbiliya. Vunoni Yehova ka nji suvile.

Ka mua hitile ntsimbu ya kama, umo pionero ua lizina Floyd uezile muimbo lietu mu Orealla, kaha ua ku tulukuile ha ndzivo yetu mua kele na ku ambuluila ku ndzivo na ndzivo. Mua nji lekele via ku lilongesa Mbimbiliya, nja zolele. Kaha ua nji hula ngueni, vika u zola? Nja mu kumbuluile nguange, nja lilongesa laza mukanda, O Que Deus Requer de Nós? Kaha nja putukile ku lilongesa mukanda, O Conhecimento Que Conduz A Vida Eterna. * Muanetu Floyd ua manusuile ku lilongesa nange Livulu Conhecimento, vunoni mu nima yaco, va mu tumine ku ka pangela kueka. Nja kele naua ca ku hona mulongisi ua Mbimbiliya lua mu civali.

 Vunoni mu 2004, va tumine vapionero vavali va ku lifuila ku Orealla. Mazina avo, Granville na Joshua. Navo naua va ambuluile ku ndzivo na ndzivo kaha va nji tulukuile hembo. Mu va nji lekele nga nji tonda ku lilongesa Mbimbiliya, nja zolele. Kaha nja vundilile va lilongese nange Livulu O Conhecimento tunde ku vuputukilo. Nja tondele ku mona nga navo va nji longesa mpundu viuma vi va nji longesele valongisi vange va ku nima. Granville ua nji lekele ngecize, va na putuka ku likungulula muimbo lietu. Vutuhu tele nja kala miaka likumi ca ku hona ku tunda ha ndzivo, nja tondele kuya mu ku kunguluka. Ngeci Granville ua nji kakuile na ku nji tumbika mu cituamo ca ku sindumuna, kaha ua nji sindumuine na ku Ndzivo ya Vuangana.

Mu nima ya ntsimbu Granville, ua nji kaniamesele nji kovele mu Sikola ya Vipanga via Teoklasi. Ua nji lekele ngueni: “Vutuhu ka mu hasa kuenda, vunoni mu hasa ku handeka. Tangua mu ka hana cimpande ca mbunga, nji mi leka vusunga.” Mezi eni, a nji kaniamesele cikuma na ku nji kuasa ku likulahela.

Nja putukile ku ambulula na muanetu Granville. Vunoni cingi ca vitapalo muimbo lietu, via kele na vina via vingi, ka ca tavele ku hitamo na cituamo ca ku sindumuna. Ngeci nja vundilile Granville a nja mbatele mu kangulu. Ku pangesa kangulu, ca kuasele cikuma. Mu Abril ya 2005 va nji mbatizile. Kaha ka mua hitile ntunda ya kama, vamuanetu va nji longesa ku panga ku mikanda ya mu cikungulukilo, na ku nji longesa ku panga ku visandzi via mu Ndzivo ya Vuangana.

Kaha mu 2007, vatate vatsile ku mponde ya vimbapolo. Tu vose mu vusoko tua tsile cintsima. Muanetu Granville ua vundilile hamo lika netu na ku tu tandela vinimbu via ku lembezieka via mu Mbimbiliya. Mu nima ya miaka ivali tua lisimuokele naua, muomu muanetu Granville neni naua ua tsile mu mponde ya vimbapolo.

Ngeci kacikungulukilo ketu ka salele naua ca ku hona na umo mukuluntu uahi, vunoni ka salele lika na mukua ku kuasa vipanga umo lika. Ku-tsa ca muanetu Granville ca nji vavala cikuma, muomu ua puile kavusamba kange ua ha mutima. Ua nji kuasele na lukakatela luose, ku kolesa vusamba vuange na Yehova na ku nji kuasa mu vinjila vikuavo. Ciuano ca hateleko, mu nima ya ku-tsa ceni, va nji hanguile ku ka tanda vinanga via Vutala. Nja hasele ku tanda vinanga vivali via katete, vunoni nja putukile ku lila, kaha misozi ya kele na ku lihitila lika. Ngeci va pandele ku nji tundisa ha mutula.

Ndzolela yange ya putukile ku hiluka, omo vamuanetu va ku cikungulukilo ceka vezile mu ku tu kuasa mu Orealla. Kaha naua Mbetele ya tumine pioneiro ueka ua ku lifuila, lizina lieni Kojo. Kaha nja vuile ndzolela ya kama, omo vanana na ntsongo yange ua mumala va putukile ku lilongesa Mbimbiliya kaha va va mbatizile. Kaha mu Março ya 2015, va nji hanguile ku pua mukua ku kuasa vipanga. Mu nima ya ntsimbu, nja hanene cimpande ca mbunga ca ku lifuila, ca ku livanga mu muono uange. Tangua lize, nja vulukile na ndzolela na misozi ya ku santsela mezi a nji lekele muanetu Granville ngueni: “Tangua mu ka hana cimpande ca mbunga nji mi leka vusunga.”

Ku hitila mu JW Broadcasting^®, nja tantekeya via mizimbu ya yingi ya vamuanetu, va kala mu visoti ngeci muevi vi nje ku pinda navio yange. Kaha vutuhu va kala na vumo vulema ku muvila, vunoni ve ku fuitangana, kaha va yoya mu ndzolela. Nange kasi kuli vimo vi nji hasa ku linga. Cizango cange ca ku hana nkala ndzili i nja lisupa nayo kuli Yehova, ca nji sindiyile ku pua pionero ua ntsimbu yose. Kaha mu Setembro ya 2019, nja tambuile muzimbu ka nja lavelelele. Mu ngonde yaco, va nji lekele ngecize, va na nji hangula ku pua mukuluntu mu cikungulukilo cetu ca kala na vakua ku ambulula va ku pua 40.

Nje ku santsela cikuma kuli vamuanetu na vandumbuetu va lilongesele nange Mbimbiliya, na ku nji kuasa ku puisamo cipanga cange ca ku ambulula. Kaha helu lia viose, nje ku santsela cikuma-kuma kuli Yehova, muomu ka nji suvile.