Onineski itech 1983. Kuali onimoskaltijtoka pero ijkuak onikpiaya majtlaktli xiuitl, opejki nechkokoua nochi notlalnakayo. Opanok kanaj ome xiuitl uan se tonal ayakmo ueli onimolini. Oniknekiaya nikinmolinis nokxiuan pero amo onitlaxikouaya uan ayakmo ueli oninejnenki. Ken ijkon onechpanok, ayamo ueli onimoskalti. Ik non, nimota ken se chokotsin.

San onikatka nokalijtik pero se tonal otechtlajpalotoj sekimej siuamej iTlaixpantijkauan Jehová. Amo onechpaktiaya nimotlapouis iuan akinmej otechtlajpalouayaj. Pero non tonal onikinkauili ma nechtlapouikan. Yejuan onechiluijkej yetos se xochitlali, ijkuakon onikilnamik ijkuak onikpiaya makuili xiuitl, se misionero tlen ochantiaya Surinam uan itoka Jethro, oualaya sejse metstli toaltepe uan okimachtiaya notajtsin. Oniktlasojtlaya Jethro porque okatka yolkuali. Nokojkoluan onechuikayaj ijkuak omonechikouayaj iTlaixpantijkauan Jehová ompa toaltepe. Ik non, ijkuak se siuatl tlen motokayotia Florence onechilui kox oniknekiaya nimomachtis, onikilui kema.

Florence oksepa onechtlajpaloko iuan inamik tlen itoka Justus uan opejki nechmachtiaj Biblia. Noijki onechmachtijkej ken niktlajtoltis se amatl porque okitakej amo onikmatiaya. Satepan yonikmatiaya nikintlajtoltis amatlajkuilolmej. Se tonal nonmej tokniuan onechiluijkej okintitlankej ma tetlapouitij altepetl Surinam. Satepan ayakmo ikaj onechmachti. Pero oniyolpakik porque Jehová amo keman onechilka.

Satepan oajsito toaltepe se precursor tlen itoka Floyd. Se tonal ijkuak otetlapouiko opanok nokalijtik. Ijkuak onechilui kox oniknekiaya nimomachtis Biblia oniixuetskak. Ye onechtlajtlani: “¿Tleka tiixuetska?”, onikilui yonimomachti amatlajkuilol ¿Tlen kineki toTajtsin Dios ma tikchiuakan? Uan opejki nimomachtia amochtli El conocimiento que lleva a vida eterna. * Noijki onikilui tleka ayakmo onimomachti. Ijkuakon Floyd oksepa opejki nechmachtia ika amochtli Conocimiento, pero oksekan okititlankej ma tetlapouiti uan ayakmo ikaj onechmachti.

 Pero itech 2004 oajsikoj Granville uan Joshua tlen okatkaj precursores especiales. Tekalijtik otetlapouiayaj uan oajsitoj nokalijtik. Ijkuak onechtlajtlanijkej kox oniknekiaya nimomachtis oksepa oniixuetskak. Onikinmilui ma nechmachtikan ika amochtli Conocimiento. Oniknekiaya nikitas kox nechmachtiskia tlen oksekimej onechmachtijkej. Granville onechilui ik kanin nichanti omonechikouayaj iTlaixpantijkauan Jehová. Maski yokipiaya kanaj majtlaktli xiuitl amo onikisaya, oniknekiaya nimonechikos. Ik non, Granville onechnotikiski uan ika se silla de ruedas onechuikak kanin otimonechikojkej.

Satepan Granville onechilui uelis nipanoskia itech Tlamachtil para Akinmej Tetlapouiaj. Ye onechilui: “Amo ueli tinejnemi pero ueli titlajtoua. Nikmati se tonal titlamachtis”. Onechyolchika tlen onechilui.

Opejki iuan nitetlapouia pero ken ojtli amo kuali okatka, amo ueli onechuikaya ika silla de ruedas. Ik non, onikilui ma nechuika ika se carretilla uan ijkon ueli otitetlapouijkej. Onimoapolakti abril 2005. Satepan onechmachtijkej ken uelis nikinmakas tokniuan amatlajkuilolmej uan ken niktlalis sonido ijkuak otimonechikouayaj.

Itech 2007 notajtsin oixpoliuik ijkuak oyaya itech se lancha. Sapanoua otimoyolkokojkej. Tokni Granville touan ochokaya uan otechyolchikauaya ika textos bíblicos. Pero ijkuak opanok ome xiuitl, oksepa otitlajyouijkej. Tokni Granville noijki oixpoliuik ijkuak oyaya itech se lancha.

Tokniuan sapanoua omoyolkokojkej uan ayakmo okatka nion se tlayekanki uan san okatka se siervo ministerial. Sapanoua onimoyolkoko ijkuak oixpoliuik tokni Granville. Ye onechpaleuiaya ma nimouika iuan Jehová uan onechpaleuiaya ika okseki tlamantli. Ijkuak yikin oixpoliuik Granville uan otimonechikojkej, omonekiaya nikintlajtoltis párrafos itech revista Akin Tetlapouijtok. San oniktlajtolti ome párrafos uan opejki nichoka. Sapanoua onichokak, ayakmo ueli onikintlajtolti párrafos uan onitemok.

Kuali onimomachili ijkuak oksekimej tokniuan tlen oksekan omonechikouayaj oualajkej nikan Orealla. Akinmej otlapaleuiayaj Betel okiualtitlankej se tokni precursor especial, itoka Kojo. Oniyolpakik ijkuak nonantsin uan nokni tlen xokoyotl omomachtijkej uan satepan omoapolaktijkej. Itech marzo 2015 opejki nitlapaleuia ken siervo ministerial. Satepan oniktemakak se tlapoualistli itech tlanechikol. Ijkuakon onikilnamik tlen yiuejkika onechilui tokni Granville: “Nikmati se tonal titlamachtis”.

Itech JW Broadcasting^® yonikinmitak tokniuan tlen mokokouaj ken ne. Maski mokokouaj yolpakij kitekichiuiliaj Jehová. Onikitak ne noijki uelis niktekichiuilis. Ik non, axkan niprecursor regular. ¡Oniyolpakik itech septiembre 2019 ijkuak onechiluijkej niyetoskia tlayekanki itech tlanechikol! Ompa tikatej kanaj cuarenta tlen titetlapouiaj.

Nikintlasojkamatilia nochtin tokniuan tlen onechmachtijkej Biblia uan onechpaleuijkej ma niktekichiuili Jehová. Pero okachi niktlasojkamatilia Jehová porque nochipa nechpaleuia.