Ngazalwa ngo-1983. Ngisesemncane ngangiziphilele, kodwa ngathi sengileminyaka elitshumi ngaqalisa ukuzwa ubuhlungu obuzwayo emzimbeni. Ngelinye ilanga sekwedlule iminyaka engaba mibili ngavuka ngingenelisi ukunyakaza. Ngazama sibili ukunyakazisa inyawo zami, kodwa kwala. Kusukela mhlalokho kangizange ngiphinde ngihambe. Umkhuhlane wami wabangela lokuthi ngingasakhuli. Kuze kube khathesi lokhu ngilomzimba omncane njengowomntwana.

Kwathi sekudlule inyanga ezilutshwana ngiqalise ukugula, kwafika abesifazana ababili abangoFakazi bakaJehova ngekhaya. Ngalesosikhathi ngangingasaphumi endlini ngenxa yokugula. Ngangijayele ukucatsha nxa kubuye abantu bemzini, kodwa mhlalokho kangicatshanga. Ngesikhathi abesifazana labo bekhuluma ngePharadayisi ngakhumbula engangikuzwe ngileminyaka engaba mihlanu. Ngalezonsuku umnali owayethiwa nguJethro owayehlala eSuriname, wayebuya esigabeni sethu kanye ngenyanga futhi wayefunda lobaba iBhayibhili. Wayelomusa njalo ngangimthanda kakhulu. Kanti njalo ugogo lokhulu babejayele ukuhamba lami kweminye imihlangano yebandla yaboFakazi eyayisenziwa esigabeni sethu. Yikho omunye wabesifazana ababengivakatshele okwakuthiwa nguFlorence wathi engibuza ukuthi ngiyafuna yini ukufunda okunengi, ngavuma.

UFlorence waphenduka eselomkakhe uJustus futhi baqalisa ukufunda lami iBhayibhili. Bananzelela ukuthi angenelisi ukubala yikho bangifundisa. Ngokuhamba kwesikhathi ngasengisenelisa ukubala. Ngelinye ilanga uFlorence loJustus bangitshela ukuthi sebesiya eSuriname ukuyatshumayela khona. Manje okudanisayo yikuthi e-Orealla kwakungaselamuntu owayezangifundisa iBhayibhili. Kodwa okuthokozisayo yikuthi uJehova kazange angikhohlwe.

Kungakayi ngaphi kwafika iphayona okuthiwa nguFloyd e-Orealla futhi langithola ngesikhathi litshumayela endlini ngendlu. UFloyd wathi engibuza ukuthi ngiyafuna yini ukufunda iBhayibhili ngabobotheka. Wangibuza wathi: “Kungani ubobotheka?” Ngamtshela ukuthi ngasengifunde ibhukwana elithi Yini UNkulunkulu Ayifunayo Kithi? lokuthi ngasengiqalisile ukufunda ibhuku elithi Ulwazi Oluholela Ekuphileni Okumi Phakade. * Ngamchasisela ukuthi kungani ngangime ukufunda. UFloyd waqedisa ukufunda lami ibhuku leli  kodwa laye watshintshwa wahanjiswa kwenye indawo futhi ngasala ngingaselamuntu ongifundisayo.

Ngo-2004, kwabuya amaphayona aqakathekileyo okuthiwa nguGranville loJoshua. Bathi betshumayela endlini ngendlu bangithola. Bangibuza ukuthi ngiyafuna yini ukufunda iBhayibhili ngabobotheka ngasengibacela ukuthi sifunde ibhuku elithi Ulwazi sisukela ekuqaliseni. Ngangifuna ukubona ukuthi babezangifundisa izinto ezifanana lalezo engangizifundiswe ngabanye engake ngafunda labo. UGranville wangitshela ukuthi imihlangano yebandla yayisenziwa esigabeni. Ngangifuna ukuhamba lanxa ngasengileminyaka engaba litshumi ngingaphumi ngekhaya. Yikho uGranville wangiphakamisa wangifaka ku-wheelchair wasengifuqa saya eWolu yoMbuso.

Ngokuhamba kwesikhathi uGranville wangikhuthaza ukuthi ngibhalise eSikolo Senkonzo SamaKhristu. Wathi: “Ukhubazekile kodwa uyenelisa ukukhuluma. Ngelinye ilanga uzenza inkulumo kazulu wonke. Uzayenza sibili.” Amazwi akhe angikhuthaza kakhulu.

Ngaqalisa ukutshumayela loGranville. Kodwa endleleni ezinengi kwakungahambeki nge-wheelchair. Yikho ngacela uGranville ukuthi abehamba engifuqa ngebhara. Lokhu kwasebenza sibili. Ngabhabhathizwa ngo-April 2005. Kungakadluli isikhathi eside abazalwane bangiqeqetsha ukuthi ngikhangele amabhuku ebandla kanye lemitshina ye-sound eWolu yoMbuso.

Ngo-2007 ubaba wafela engozini yesikepe. Imuli yangakithi yezwa ubuhlungu kakhulu. UGranville wathandaza lathi wasesibalela amavesi aduduzayo. Ngemva kweminyaka emibili uGranville laye wafela engozini yesikepe futhi lokhu kwasitshiya sidabukile.

Ibandla lethu elincane lasala selilenceku ekhonzayo eyodwa kodwa lingaselamdala. Ukufa kukaGranville kwangizwisa ubuhlungu ngoba wayengumngane wami oseduze. Wayehlala engincedisa ukuthi ngisondele kuJehova lokuthi ngithole izinto engizidingayo empilweni. Emhlanganweni webandla esaba lawo ngemva kokufa kwakhe ngangibala iNqabayokulinda. Ngabala izigaba ezimbili zokuqala kodwa ngasengiqalisa ukukhala. Ngacina sengisehla eplathifomu.

Ngaqalisa ukuzwa ngcono ngesikhathi abazalwane abavela kwelinye ibandla sebebuye ukuzosincedisa e-Orealla. Igatsha laphinda lathumela omunye umzalwane oliphayona eliqakathekileyo okuthiwa nguKojo. Ngathokoza ngesikhathi umama lomnawami beqalisa ukufunda iBhayibhili futhi bebhabhathizwa. NgoMarch 2015 ngaba yinceku ekhonzayo. Ngokuhamba kwesikhathi ngenza inkulumo yami yokuqala. Ngalelolanga ngabobotheka futhi ngakhala ngikhumbula amazwi engangiwatshelwe nguGranville eminyakeni eyadlulayo: “Ngelinye ilanga uzenza inkulumo kazuku wonke. Uzayenza sibili.”

Inhlelo ze-JW Broadcasting^® zingenze ngabona abanye abafowethu labodadewethu abaphakathi kwesimo esihambelana lesami. Lanxa bekhubazekile bayenelisa ukwenza izinto ezinengi njalo bayathokoza. Lami ngiyenelisa ukwenza ezinye izinto. Ngangifuna ukwenzela uJehova okunengi yikho ngaqalisa ukuphayona. NgoSeptember 2019 ngamangala kakhulu ngitshelwa ukuthi sengizakuba ngumdala ebandleni elilabamemezeli abangaba ngu-40.

Ngiyababonga abafowethu labodadewethu abangifundisa iBhayibhili njalo bangincedisa ukuthi ngikhonze uJehova. Engimbonga kakhulu nguJehova ngoba kazange angikhohlwe.