Nabutawa oko mwaka 1983. Omo myaka yʼerimbere ya maisa waghe, nabya ininakalire ndeke, aliwe nabere naghonerya emyaka ikumi, monatsuka eryowa obulumi obukalire kutsibu bw’omo mubiri wosi. Enyuma sy’emyaka ibiri, monabuka omo tututu nguma, neryo monitasyatoka erikola mwatsi wosi-wosi. Nomo nanayikasa erilambya kutse erikunya amaghulu, abya isyakiri mo kaghala kosi-kosi. Erilua ekiro ekyo, sinirisyatoka eribasula. Kandi obukoni bwaghe obo mobwaleka initasyakula. Na lino, nyikine muke ngo mwana mulere.

Habere habilaba misi milebe inine hawumerera omo kibute kusangwa isinangasyatoka erihuluka, aBimiri ba Yehova babiri mobasyanilenderera. Nabya inabiribya ngayibisa omughulu abagheni bakahika, aliwe ekiro ekyo monaligha niti abakali abo bakanaye naghe. Babere ibanemukania oko mwatsi w’eParadiso, mobyanibukya ebyo nabya inabiriowa omughulu nabya n’emyaka itano. Omughulu oyo, omumisionere oyukahulawa mo Jethro, oyo wabya ikere eSuriname, mwabya akalenderera omulongo wetu n’erigha eBiblia haghuma na tata waghe. Jethro abya akanibetekerera n’obubuya bosi. Nabya nimwanzire kutsibu. Kandi, sokulu na mukaka banabya bakanitwala oko mihindano y’aBimiri eyabya ikakoleka omo mulongo wetu. N’omughulu Florence, omughuma w’oko bakali abasyanibana ekiro ekyo, anibulaya nga nangananza erigha bingyi, monaligha.

Florence na mwira wiwe, yo Justus mobasyanibana, neryo mobatsuka erigha eBiblia yo haghuma nayi. Babere balangira ngoko sinasi erisoma, mobaniwatikya erigha erisoma. Habere halaba mughulu mulebe, monatoka erisoma. Kiro kighuma, omukali oyo na mwira wiwe mobanibwira bati bamatumwa eriyatula engulu mbuya y’eSuriname. Omwatsi w’obulighe, sihabya wundi mundu wosi-wosi e Orealla oyo wanganyiwatikirye erilola embere n’erigha eBiblia. Aliwe, omwatsi w’obutseme, Yehova mwatanyibirirwa.

Mughulu muke enyuma waho, omupainia oyukahulawa mo Floyd mwahika e Orealla, neryo omughulu abya omo mubírí w’eritulira akalaba oko buli nyumba mwanisunga. Abere akania naghe okwigha eBiblia, monaseka. Mwanibulya ati “Ukaseka busanaki?” Monamusubirya niti nabya inabirigha akatabu oMungu akaturondakoki? Kandi nabya inabiritsuka erigha ekitabu Ujuzi Uongozao Kwenye Uzima wa Milele. * Monamubwira ekyaleka erigha iritalola embere. Floyd mwabughirira erigha nayi ekihande ekyabya ekikisiya kye kitabu Ujuzi, aliwe naye mwatumwa eriyatulughania engulu y’ahandi. Kandi monasyasighala butsira oyukanighisaya.

 Nomo byanabya bitya, oko mwaka 2004, yo Granville bana Joshua, abapainia b’embaghane babiri, mobatumwa e Orealla. Mobatulughania engulu yuwene bakalaba oko manyumba wosi, neryo ko banisunga batya. Babere banibulya nga nangananza erigha, monaseka. Monabasaba niti kisi bighe nayi ekitabu Ujuzi erilwa oko nzuko yakyo erihika oko nduli. Nasonda erilangira nga banemwendinighisya emyatsi mighumerera nga bakangirirya baghe b’erimbere. Yo Granville mwanibwira ati emihindano yinemukoleka omo mulongo wetu. Nomo nanabya isindinatahuluka ihamabilaba emyaka ikumi, monanza eriya oko muhindano. Neryo yo Granville mwasa amanikalya oko kitumbi ekiri kw’ebiringo n’erinikuna erihika oko Kisenge ky’oBwami.

Enyuma waho, Granville mwanihira m’omutima ati niyihandikisaye oko Kalasi k’oMubírí w’eKiteokrasi. Mwabugha ati: “Ulehemire, aliwe wanganatoka eribugha. Kiro kighuma, ukasyalabya omukania w’embere sy’abandu bosi. Ekyo kikasyakoleka.” Ebinywa biwe by’erinisubya mutima mobyaleka inasikya omutima.

Monatsuka eritulughania engulu yuwene yo haghuma na Granville. Ekindi kiriho, esyonzira nyingyi sy’omulongo syabya mw’ebikunguli-bikunguli n’eryo erilabya mw’ekitumbi ekiri kw’ebiringo irikalire. Neryo monabwira Granville niti anihire omo riburete n’erinikuna. Eriyira tutya molyawatikya. Oko mwisi wa kani w’omwaka 2005, monabatisibwa. Habere habilaba biro bike, baghala betu mobanibegherya eriteya ebitabu by’endeko n’eriteghekania ebinimba by’omo Kisenge ky’oBwami.

Erilua aho, omwatsi w’obulighe, oko mwaka 2007 tata waghe mwahola omo kisida inyanemughendya obwato. Ekihanda kyetu mokyabya n’obwaghali obukalire. Granville mwatusabira kandi mwatusomera omo Biblia mw’amasako aw’eritusubya omutima w’omonda. Habere hasyalaba myaka ibiri, owundi mwatsi w’obulighe mw’atuhikira​—Granville naye mwahola omo kindi kisida omo bwato.

Endeko yetu nyike, omo bulighe bunene obo moyasighala butsira musyakulu w’endeko, yabya m’omughombe muwatikya mughuma musa. Monabya n’obulighe bunene kutsibu busana n’oluholo lw’omunywani waghe mwanza yo Granville. Abya akaniwatikya ebiro byosi nitoke eriyitunda hakuhi n’oMungu kandi n’eriniwatikya eribana ebindi ebyo niyisunzire kinya-mubiri. Oko muhindano w’erimbere enyuma sy’oluholo lwiwe, mobabugha ambu niwatikaye erisoma Akaleberyo k’Omuteya Ak’erigha. Monasoma esyonungu ibiri sy’erimbere, neryo monatsuka erilaka n’emisonia eritoghonga. Monakyima erilwa oho bakalabiraya emikania.

Monatsuka eriyowa ndeke n’eritsangira abandu omughulu abaghala betu abalua omo yindi ndeko bahika e Orealla busana n’erisyatuwatiya. Kandi, eBeteli moyatuma yo Kojo, omupainia w’embaghane. Munatsema, mama waghe na mulere waghe omughulu batsuka erigha eBiblia erihika okwibatisibwa. Neryo, oko Mwisi wa kasatu 2015, monayirwa mo mughombe muwatikya. Mughulu muke enyuma waho, monalabya omukania w’embere sy’abandu bosi. Ekiro ekyo, monaseka n’erilira ly’erisima ngibuka ebyo Granville abugha omo myaka eyalaba ati: “Kiro kighuma, ukasyalabaya omukania w’embere sy’abandu bosi. Ekyo kikasyakoleka.”

Omo programe ye JW Teledifizio^®, nabirilangira mw’abandi baghala betu n’abali betu abali omo mibere eyiri nge yaghe. Nomo banalwere, bakatoka erikola myatsi mingyi n’eribya n’obutseme. Naghe, bikinatokekene erikola emyatsi milebe. Eriyitagha lyaghe ly’eriha Yehova akaghala kaghe kosi, mokyanikuna eritsuka obupainia. Neryo mobanitulira omwatsi owaniswekaya oko Mwisi 9, 2019! Oko mwisi oyo mobanibwira ambu nabiriyirwa mo musyakulu w’omo ndeko yetu eyiri mw’abatuliri hakuhi 40.

Ngaha ewasingya yo kutsibu abaghala betu n’abali betu banzwa abigha naghe eKinywa ky’oMungu n’eriniwatikya erikolera Yehova. Ekikulu kutsibu, ngaha ewasingya nene yo Yehova kundi syalyatanyibirirwa.