Ngabelethwa ngo-1983. Iminyaka yokuthoma yokuphila kwami bengifana nawo woke umntwana. Kwathi nangineminyaka elitjhumi, ngathoma ukuzwa ubuhlungu obukhulu emzimbenami. Ngemva kweminyaka emibili ngavuka ngingakghoni ukusikinyeka. Ngalinga ngamandla ukusikinya iinyawo zami kodwana akhenge ngikghone. Solo kwamhlokho akhenge ngisakghona ukukhamba. Ukugula kwami kungibangele nokuthi ngingasakhula, bekube kunamhlanjesi ngibonakala ngasuthi ngimntwana omncani.

Bengivaleleke ngendlini iinyangana ngesikhathi aboFakazi bakaJehova bafika ekhaya. Bengijayele ukuthi nakufika iimvakatjhi ngikhambe ngiyokubhaqa, kodwana mhlokho ngabavumela abommaba bona bakhulume nami. Njengombana bebakhuluma ngePharadesi nje, ngakhumbula izinto engafundiswa zona nangineminyaka emihlanu. Ngesikhatheso isithunywa sevangeli ibizo laso elinguJethro, besivakatjhela idorobho leSuriname, kanye ngenyanga bona sizokufunda iBhayibheli nobaba. UJethro bekanomusa kimi, bengimthanda tle. Ugogwami nobamkhulwami bebangithatha bangise esifundweni ebesisethresteni esihlala kilo. Yeke kwathi uFlorence, omunye wabodade owangivakatjhela ngelangelo nakangibuza ukuthi ngiyafuna na ukufunda okungeziweko, ngathi iye.

UFlorence wabuya nobabakwakhe uJustus bathome ukufunda iBhayibheli nami. Bathi nabalemuka ukuthi angikwazi ukufunda, bangisiza bona ngikghone ukufunda. Ngemva kwesikhathi esithileko besele ngikghona ukuzifundela. Ngelinye ilanga abatjhadikazaba bangitjela bona sele babelwe bona bayokusiza eSuriname. Okudanisako kukuthi besele angekho umuntu e-Orealla ongafunda nami iBhayibheli. Okuthabisako kukuthi uJehova akhenge angilibale.

Kungakapheli isikhathi esingangani kwafika iphayona ibizo lalo elinguFloyd e-Orealla. Lahlangana nami litjhumayela umuzi nomuzi. Lakhuluma nami ngokufunda iBhayibheli ngamomotheka, yeke wangibuza ukuthi, “Kubayini umomotheka?” Ngamtjela ukuthi besele ngithomile ukufunda incwajana ethi, Yini UNkulunkulu Ayifunayo Kithi? Efumaneka ngesiZulu. Ngathoma nokufunda incwadi ethi, Ulwazi Oluholela Ekuphileni Okumi Phakade. * Efumaneka ngesiZulu. Ngamhlathululela nokuthi khuyini eyasenza salisa ukufunda. UFloyd wafunda nami saqedelela  incwadi ethi, Ulwazi Oluholela Ekuphileni Okumi Phakade. Kodwana naye, wabelwa bona ayokusiza kenye indawo. Kwabuyelela godu ukuthi ngingasaba nomuntu ongifundisa iBhayibheli.

Ngo-2004, uGranville noJoshua, amaphayona akhethekileko, abelwa bona azokusiza e-Orealla. Batjhumayela umuzi nomuzi, kulapho abahlangana nami khona. Nabangibuzako ukuthi ngiyafuna na ukufunda, ngamomotheka. Ngababawa ukuthi bafunde nami incwadi ethi, Ulwazi, sithome nayo phasi, bengifuna ukubona ukuthi bazongifundisa izinto abotitjhere bami ebebangifundisa zona. UGranville wangitjela ukuthi kunemihlangano ebanjelwa ethresteni engihlala kilo. Ngitjho nanyana ngingakhenge ngikhambe ekhaya pheze iminyaka elitjhumi, bengifuna ukuya esifundweni. Yeke uGranville wangilanda wangitjhova nge-wheelchair waya nami eWolweni lomBuso.

Ngokukhamba kwesikhathi uGranville wangikhuthaza bona ngifake isibawo sokungena esikolweni SeKonzo EsingokweZulwini. Wathi kimi, “Urholophele kodwana uyakghona ukukhuluma ngelinye ilanga uzokunikela ikulumo. Lizokufika ilangelo.” Amezwakhe akhuthazako anginikela isibindi.

Ngathoma ukutjhumayela noGranville, kodwana iindlela ezinengi zethresteni esihlala kilo bezingasizihle bona umuntu angatjhova i-wheelchair lapho. Yeke ngabawa uGranville bona angitjhove ngengolovana. Kwasebenza kamnandi khulu ke lokho. Ngabhajadiswa ngo-Apreli ka-2005. Kungasikade abafowethu bangibandula bona ngitlhogomele iincwadi nomtjhini womdumo eWolweni lomBuso.

Okudanisako kukuthi ngo-2007 ubaba wahlongakala engozini yesikepe. Umndeni wekhaya wabetheka iduma elingophiko tle. UGranville wathandaza nathi begodu wasifundela imitlolo ekhuthazako. Ngemva kweminyaka emibili sabuya sezwa obunye godu ubuhlungu nakuhlongakala uGranville engozini yesikepe.

Ibandla lethu ebelizwa ubuhlungu khulu lasala sele lingasenaye umdala, belinenceku esizako kwaphela. Ngezwa ubuhlungu khulu nakuhlongakala uGranville. Kazi sinaye besitjhidelene. Wathembeka ekungisizeni ngikhule ngithanda uJehova begodu bekangisiza ngezinto engizitlhogako. Emhlanganweni owalandela ukuhlongakala kwakhe, ngafumana isabelo sokufunda iingaba zesiThala. Ngafunda iingaba ezimbili kuhle kodwana eengabeni ezilandelako ngabhalelwa kuzibamba iinyembezi zazehlela, ngalila. Kwafuze ngilise ukufunda.

Ngathoma ukuzizwa ngcono nakufika abafowethu abavele kwenye inarha bazokusiza e-Orealla. I-ofisi legatja labuye lathumela uKojo, iphayona elikhethekileko. Kwangithabisa khulu ukubona umma nomfowethu omncani bathoma ukufunda bebabhajadiswa. NgoMatjhi 2015 ngaba yinceku esizako, ngemva kwesikhathi esithileko nganikelwa ikulumo. Lokho kwangikhumbuza iminyaka eyadlulako, uGranville angitjela ukuthi, “Ngelinye ilanga uzokunikela ikulumo, ilangelo lizokufika.”

Ehlelweni le-JW Broadcasting^®, ngibone abanye aboFakazi esikunye nabo abasebujamweni obufana nebami, kodwana naphezu kweenqabo abahlangabezana nazo, baphila ukuphila okuthabisako. Mina kusese nezinto engikghona ukuzenzela zona. Isifiso sami sokwenzela uJehova okusemandleni, singikhuthaze bona ngibe liphayona lesikhathi esizeleko. NgoSeptemba 2019 ngafumana iindaba ezimnandi khulu. Ngabekwa bona ngibe mdala ebandleni lethu ebelinabatjhumayeli abama-40.

Ngithokoza abafowethu nabodadwethu abangisiza bona ngifunde nokuthi ngitjhumayele. Kikho koke, ngithokoza uJehova ongakhenge angilibale.