Nevyalika mu 1983. Penenze mtontho, nenze na thanzi iweme, koma penekwanisha vyaka 10 neyamba kumvwa muŵili wonse kuŵaŵa. Pavuli pa vyaka viŵili, siku iyakine m’mawa nedabwa kuti nukangiwa kuyenda. Neyesa kuti niyende koma nekangiwa. Kufumila siku yamene iyo, niliyokwanishe soti kuyenda. Matenda aŵa ecitisha soti kuti nileke kukula cakuti olo masiku ŵano nikaluoneka monga ni ka mwana.

Kufumila peneyamba kulwala nenzonkhala tyala pa ng’anda. Pavuli pa miyezi itontho kwewela a Mboni za Yehova. Kanyinji nenzokonda kufisama kukawela alwendo koma siku iyi neŵalola kuti alaŵile nane. Peciyamba kulaŵila za Paladaiso, nekumbukila zenecimvwa nili na vyaka 5. Panthawi iyi, m’mishonale muyakine wa zina yakuti Jethro wa ku Suriname, enzokonda kuwela ku munzi kwasu kamozi pa mwezi kuzophunzila Baibo na atata. Mkwasu Jethro enzocita nane zinthu mwacifundo, tetyo nenzomukonda ngako. Kuyangizhyila apo, ambuya na asikulu enzonitola pakuya ku misonkhano iyakine ya Mboni za Yehova yamene yenzocitikila m’munzi mwasu. Tetyo kalongosi Florence wamene ni m’mozi mwa a Mboni za Yehova enze ewela, enikonsha ngati ningakonde kuziŵa zinyinji, ndipo nevomela.

Kalongosi Florence ewela soti na mulume wake Justus, ndipo eyamba kuphunzila nane Baibo. Pecizindikila kuti nuziŵa lini kuŵelenga, eyamba kuniphunzisa kuŵelenga. Pavuli pa nthawi, neyamba kuŵelenga neka. Siku iyakine banja iyi yeniuzhya kuti etumiwa kuti akatumikile ku Suriname. Zacisoni n’zakuti m’munzi mwasu mwenzeve munthu wakuti angapitilizhye kuphunzila nane Baibo. Koma cosangalasa n’cakuti Yehova aliyoniluŵe.

Pakaliyopita nthawi itali, mpainiya wa zina yakuti Floyd ewela kuzotumikila ku Orealla, ndipo enipeza peenzolalikila ng’anda na ng’anda. Tetyo, pecilaŵila nane zophunzila Baibo, nemwetulila. Yove enikonsha kuti, “Ndawa yanji umwetulila?” Nemuuzhya kuti nephunzila kale buku yakuti Kodi Mulungu Amafunanji Kwa Ife? ndipo neyamba kuphunzila buku yakuti Chidziŵitso Chotsogolera Ku Moyo Wosatha. * Nemufotokozela cifukwa cake neleka kuphunzila Baibo. Mkwasu Floyd ephunzila nane mbali zenze zesala mu buku ya Chidziŵitso, koma pavuli pake naye etumizhyiwa kuyotumikila kuyakine. Tetyo, nesala soti niliye woniphunzisa Baibo.

 Olo n’tetyo, mu 2004 apainiya apadela aŵili amene ni Granville na Joshua ewela kuzotumikila ku Orealla. Enipeza peenzolalikila ku ng’anda na ng’anda. Pecinisenga kuti akoniphunzisa Baibo, nemwetulila. Neŵasenga kuti tiyambe soti kuphunzila buku ya Chidziŵitso kuyambila poyambila. Nenzofuna kuona ngati vaanganiphunzise vingalingane na veciniphunzisa enzoniphunzisa Baibo kale. Mkwasu Granville eniuzhya kuti misonkhano yeyamba kucitikila m’munzi mwasu. Olo kuti nenkhala pa ng’anda kwa vyaka pafupifupi 10, nenzofunishisha kupezeka pa misonkhano. Tetyo, mkwasu Granville eniika pa kanjinga ka olemala noluta nane ku Ng’anda ya Ufumu.

M’kuluta kwa nthawi, mkwasu Granville enilimbikisha kuti nilembeshe mu Sukulu ya Utumiki. Yove elaŵila kuti: “N’cendi kuti niwe wolemala koma ukwanisha kulaŵila. Siku iyakine ukalaŵile nkhani ya ŵanthu onse. Zikacitike cendi.” Mau ŵake acilimbikiso yenipasa cidalilo.

Neyamba kulalikila pamozi na mkwasu Granville. Njila za kwasu zenze lini bwino cakuti cenze covuta kupitamo na kanjinga ka ŵanthu olemala. Tetyo, nesenga mkwasu Granville kuti akoniyendesha mu wilibala. Njila iyi yeseŵenza luweme. Ndipo mu April 2005, nebatizika. Pavuli pa nthawi itontho, akwasu eniphunzisa mwaningasamalilile mabuku na vokuzhyila mau va pa Ng’anda ya Ufumu.

Zomvwisha cisoni n’zakuti mu 2007 atata emwalila pa ngozi ya pamanzi, ndipo banja yasu yekhuziwa ngako na imfwa iyi. Tetyo, mkwasu Granville epemphela nase notiŵelengela malemba olimbikisha. Pavuli pa vyaka viŵili, cenze cocitisha cisoni ngako kuti mkwasu Granville ecifwa pa ngozi ya pamanzi.

Mpingo wasu utontho wesala uliye akulu koma mtumiki woyavya m’mozi. Imfwa ya mkwasu Granville yeniŵaŵa ngako cifukwa enze muyangu wa pa mtima. Enzoniyavya ngako mwauzimu na pa vinthu vofunikila pa umoyo wangu. Pa msonkhano wokonkhapo kufumila pa imfwa yake, nenze nepasiwa mbali yoŵelenga ndime pa Phunzilo ya Nsanja ya Mulonda. Pavuli poŵelenga ndime ziŵili, neyamba kulila cakuti nefumapo pa pulatifomu.

Neyamba kumvwako luweme pamene akwasu a ku mpingo uyakine eyamba kuwela kuzotiyavya ku Orealla. Ndipo ofesi ya msambo yetumizhya mkwasu Kojo wamene enze mpainiya wapadela. Cokondwelesha n’cakuti amama na msaza wangu eyamba kuphunzila Baibo ndipo ebatizika. Ndipo mu March 2015, neyamikiliwa kunkhala mtumiki woyavya. Pavuli pa nthawi itontho, nelaŵila nkhani ya ŵanthu onse yoyamba. Pa siku yamene iyi nemwetulila nolila penekumbukila mau ya mkwasu Granville yakuti: “Siku iyakine ukalaŵile nkhani ya ŵanthu onse. Izi zikacitike cendi.”

Kupitila m’mapulogilamu ya JW Broadcasting^® naphunzila za akwasu na azilongosi amene ali na vuto monga yangu. Mosasamala kanthu za vuto yao, okwanisha kucita zinyinji potumikila Yehova ndipo onkhala acimwemwe. Nane ningakwanishe kucita zinyinji potumikila Yehova. Nufuna kucita zilizonse zaningakwanishe potumikila Yehova. Tetyo, neyamba kutumikila monga mpainiya wanthawi zonse. Mu September 2019, nedabwa kumvwa kuti neikiwa kunkhala mkulu mu mpingo wasu wamene uli na ofalisa pafupifupi 40.

Nuyamikila ngako akwasu na azilongosi amene eniyavya kuyamba kutumikila Yehova. Ndipo kupambana vonse, nuyamikila Yehova wamene aliyoniluŵe.