Ke belegwe ka ngwaga wa 1983. Ke gotše ke swana le bana ba bangwe ke phetše gabotse, eupša ge ke na le mengwaga e lesome ke ile ka thoma go kwa dihlabi mmeleng wa ka. Ke moka ka morago ga mengwaga e ka bago e mebedi, mesong e mengwe ge ke tsoga ke ile ka hwetša ke se sa kgona go šikinyega. Ke ile ka leka ka thata go šikinya maoto a ka, eupša gwa no pala. Go tloga letšatšing leo ke ile ka se sa kgona go sepela gape. Bolwetši bjo bja ka bo ile bja ntira gore ke se sa gola. Le lehono ke sa lekana le ngwana.

Ka morago ga dikgwedinyana ke babja ke ile ka se sa kgona go tšwa ka gae, ke moka Dihlatse tša Jehofa tše pedi di ile tša tla ka gae. Ge go etla baeng gantši ke be ke ikuta, eupša letšatšing leo ke ile ka dumelela basadi bao gore ba boledišane le nna. Ge ba be ba mpotša ka Paradeise, ke ile ka gopola seo ke ilego ka se kwa ge ke be ke na le mengwaga e ka bago e mehlano. Ka nako yeo moromiwa yo a bitšwago Jethro yo a bego a dula nageng ya Suriname, o be a etela motseng wa gabo rena gatee ka kgwedi ke moka a ithuta Beibele le tate. Jethro o be a ntshwara gabotse kudu. Le nna ke be ke mo rata. Le gona ka dinako tše dingwe ke be ke fela ke eya le rakgolo le makgolo dibokeng tša Dihlatse tša Jehofa, tšeo di bego di swarelwa mo motseng wa gabo rena. Ke moka ge Florence, e lego yo mongwe wa basadi bao ba bego ba nketetše letšatšing leo a be a mpotšiša gore nka thabela go ithuta Beibele, ke ile ka dumela.

Florence o ile a boa le monna wa gagwe Justus, ke moka bobedi bja bona ba thoma go nthuta Beibele. Ba ile ba bona gore ga ke kgone go bala ke moka ba nthuta go bala. Ka morago ga nakonyana ke ile ka kgona go bala. Ka letšatši le lengwe, banyalani bao ba ile ba mpotša gore ba abetšwe go yo bolela ditaba tše dibotse Suriname. Sa go nyamiša ke gore go be go se na motho yo mongwe mo Orealla yo ke bego nka tšwela pele ke ithuta le yena Beibele. Eupša sa go thabiša ke gore Jehofa ga se a ka a ntebala.

Ka moragonyana mmulamadibogo yo a bitšwago Floyd o ile a tla motseng wa Orealla, ke moka a kopana le nna ge a be a ruta batho Beibele ka ntlo le ntlo. Ge a be a kgopela go nthuta Beibele, ke ile ka semaela. O ile a mpotšiša gore: “Ke ka baka la’ng o semaela?” Ke ile ka mo araba ka gore ke šetše ke ithutile poroutšha ya Ke Eng Seo Modimo a se Nyakago go Rena? e bile ke be ke šetše ke thomile le go ithuta puku ya Tsebo e Išago Bophelong bjo bo sa Felego. * Ke ile ka mo hlalosetša gore ke ka baka la eng ke se sa ithuta. Floyd o ile a tšwela pele go ithuta le nna puku ya Tsebo, eupša le yena mafelelong o ile a abelwa go yo ruta batho ditaba tše dibotse lefelong le lengwe. Ke ile ka hloka motho yo a ka nthutago Beibele gape.

 Ka ngwaga wa 2004, Granville le Joshua e lego babulamadibogo ba ba kgethegilego ba ile ba abelwa go tlo botša batho ditaba tše dibotse motseng wa Orealla. Ba ile ba nkhwetša ge ba be ba ruta batho Beibele ka ntlo le ntlo. Ge ba be ba mpotšiša gore nka thabela go ithuta Beibele, ke ile ka semaela. Ke ile ka ba kgopela gore ba thome fase ba ithute le nna puku ya Tsebo. Ke be ke nyaka go bona ge e ba ba tla nthuta dilo tše di swanago le tšeo batho ba bangwe ba ilego ba nthuta tšona peleng. Granville o ile a mpotša gore go be go swarwa diboka tša Dihlatse tša Jehofa gona mo motseng. Le ge ke be ke feditše mengwaga e ka bago e lesome ke sa tšwe ka gae, ke be ke nyaka go ya dibokeng. Ka gona Granville o ile a tla a mpea godimo ga wheelchair, a nkgorometša ra ya Holong ya Mmušo.

Ka moragonyana Granville o ile a nkgothaletša go ingwadiša Sekolong sa Pušo ya Modimo. O ile a mpotša gore: “Le ge o sa kgone go sepela eupša o kgona go bolela. Ka letšatši le lengwe o tlo nea polelo ya phatlalatša. Letšatši leo le tla fihla.” Mantšu a gagwe a kgothatšago a ile a mpha matla.

Le nna ke ile ka thoma go ruta batho Beibele ke sepela le Granville. Eupša ka ge ditsela tše dintši mo motseng di be di se na sekontiri, wheelchair ya ka e be e sa kgone go sepela gabotse. Ke moka ke ile ka kgopela Granville gore a nkgorometše ka kiribane. Seo se be se nthuša kudu. Ka April 2005, ke ile ka kolobetšwa. Kapejana ka morago ga go kolobetšwa, bana babo rena ba ile ba nthuta go hlokomela dikgatišo ka phuthegong le tša medumo ka Holong ya Mmušo.

Ka 2007 selo se sengwe sa go nyamiša se ile sa direga. Tate o ile a hlokofala kotsing ya sekepe. Lapa la gešo le ile la kwa bohloko kudu. Granville o ile a rapela le rena, a ba a re balela le mangwalo ao a kgothatšago. Ka morago ga mengwaga e mebedi, re ile ra diragalelwa ke selo se sengwe gape seo se nyamišago. Granville o ile a hlokofala kotsing ya sekepe.

Phuthego ya gabo rena e nyenyane yeo e kwelego bohloko e be e se sa na mogolo. Re be re šetše feela ka mohlanka wa bodiredi o tee. Lehu la Granville le ile la nkweša bohloko kudu, e be e le mogwera wa ka yo mogolo. O be a nthuša gore ke dule ke na le segwera se sebotse le Jehofa, gape o be a nthuša le ka dilo tšeo ke di hlokago. Dibokeng tša mathomo ka morago ga lehu la gagwe, ke be ke na le kabelo ya go bala dirapa Thutong ya Morokami. Ke ile ka kgona feela go bala dirapa tše pedi tša mathomo, ke moka ka thoma go lla. Ke ile ka swanelwa ke go fologa sethaleng.

Ke ile ka thoma go thaba ge ke be ke bona bana babo rena ba go tšwa phuthegong e nngwe ba etla go re thuša mo Orealla. E bile gape ofisi ya lekala e ile ya re romela ngwanabo rena Kojo yo e lego mmulamadibogo yo a kgethegilego. Ke ile ka thaba kudu ge ke bona mma le moratho wa ka ba thoma go ithuta Beibele e bile ba kolobetšwa. Ke moka ka March 2015, ke ile ka kgethwa go ba mohlanka wa bodiredi. Ka moragonyana ke ile ka nea polelo ya phatlalatša ka lekga la pele. Letšatšing leo ke ile ka semaela ka ba ka ntšha megokgo ya lethabo ge ke be ke gopola mantšu ao ngwanabo rena Granville a ilego a mpotša wona mengwaga e mentšinyana e fetilego, ao a rego: “Ka letšatši le lengwe o tlo nea polelo ya phatlalatša. Letšatši leo le tla fihla.”

Ge ke bogetše mananeo a Kgašo ya JW, ke kgona go bona gore go na le bana babo rena le dikgaetšedi bao ba lego boemong bja go swana le bja ka. Le ge ba babja ba kgona go dira dilo tše dintši ka mo mokgatlong e bile ba dula ba thabile. Le nna go na le dilo tšeo ke kgonago go di dira. Ke be ke nyaka go direla Jehofa sohle seo nka se kgonago, ka baka leo ke ile ka thoma go ba mmulamadibogo wa ka mehla. Ka September 2019 ke ile ka hwetša ditaba tšeo ke bego ke sa di letela! Kgweding yeo ke ile ka kgethwa gore ke hlankele ke le mogolo phuthegong ya gabo rena yeo e nago le bagoeledi ba e ka bago ba 40.

Ke leboga bana babo rena le dikgaetšedi bao ba ilego ba nthuta Beibele, le go nthuša gore ke tšwele pele ke hlankela Jehofa. Se segolo le go feta ke leboga gore Jehofa ga se a ka a ntebala.