Ndidabadwa mu 1983. Pakuyamba ndikhana moyo wabwino ningati mwana ali-wentse, koma pomwe ndidapfitsa magole 10, ndidayamba kumbabva kuwawa thupi langu. Pomwe padapita magole mawiri, ntsiku inango macibese pomwe ndidamuka ndidatazira kufamba. Ndidayezera kufambisa minyendo yangu koma ndiribe kukwanisa thangwe minyendoyo ikhalibe mphanvu. Kucokera ntsiku imweyo ndiribe kudzafamba pomwe. Matenda yanguyo yadandicitisa kuti ndileke kukula msinkhu. Tsapano, napo kuti ndakula ndikuwoneka ninga ndine kamwana basi.

Pomwe padapita minyezi yakucepa, ndidadwala ndipo ndidatazira kucoka pa muyi pomwe mboni za Yahova ziwiri zidabwera kudzandizungira. Wanthu akabwera kudzandizungira inepano ndikhambabisalika koma ntsiku imweyo ndiribe kubisalika ndidasiya kuti akaziwo alewe bzomwe akhadabwerera. Pomwe iwo adalewa bza Paraizo inepano ndidakumbukira bzomwe ndidabva pomwe ndikhana magole 5 yakubadwa. Pa nthawe imweyo, misiyonario wakucemeredwa Jethro, omwe akhakhala ku Suriname, akhambazungira mzinda wathu kabodzi pa mwezi ndipo akhapfunza Bibliya na pai wangu. Iye akhambandicitira bzinthu bzabwino kwene-kwene, ndipo inepano ndikhambamufunambo kwene-kwene. Ndipo yavu wangu akhambanditenga aciyenda nande ku mitsonkhano ya Mboni za Yahova, yomwe ikhacitikira mu mzinda mwathumo. Tenepo Florence omwe ni m’bodzi mwa akazi awiri wale omwe adabwera kudzandizungira adandibvunza penu ndikufuna kudziwa bzizinji, ndidatawira kuti inde.

Florence, adabwera kumuyi kwathu pabodzi na mwamuna wace Justus, acidzayamba kundipfunzisa Bibliya. Pomwe iwo adazindikira kuti inepano ndikhadziwa lini kuwerenga, adandipfunzisa kuwerengako. Pomwe padapita nthawe ndidadzayamba kuwerenga ndekha. Ntsiku inango banjalo lidandiuza kuti lidauzidwa kuti likatumikire ku Suriname. Bzakupasa ntsisi mpsakuti ku Oreallako kukhalibe pomwe munthu unango omwe angadapitiriza kundipfunzisa Bibliya. Koma cakukondwesa n’cakuti Yahova adapitiriza kundikumbukira.

Pomwe padapita nthawe mpainiya unango wakucemeredwa Floyd, adabwera ku Orealla, ndipo iye adagumana nande pomwe akhapalizira nyumba na nyumba. Pomwe iye adandiuza kuti tipfunze Bibliya ndidakomedwa kwene-kwene. Ndipo iye adandibvunza kuti: “Kodi ukukomedwa na ciyani?” Ndidamuuza kuti ndikhadapfunza kale ka broxura ka kuti: Kodi Mulungu Amafunanji kwa ife? Ndipo ndikhadayamba kupfunza bukhu la kuti: Chidziwitso Chotsogolera ku Moyo Wosatha. * Ndidamufotokozera thangwe ranyi pfunzirolo likhadaima. Floyd akhadamaliza kupfunza nande bukhu la Cidziwiso, koma mwakusaya kutenga  nthawe iye adacinjidwambo aciyenda katumikira kunango. Ndidadzakhala ndiribe pomwe munthu wakundipfunzisa.

Tsono mu 2004, Granville na Joshua omwe akhali apainiya wakupambulika, adabwera kudzatumikira ku Orealla. Pomwe iwo akhapalizira nyumba na nyumba adagumana nande. Pomwe adandibvunza penu nin’funa kupfunza Bibliya ndidakomedwa. Inepano ndidawakumbira kuti apfunze nande bukhu la Chidziwitso kuyambira msolo wakuyamba. Ndikhafuna kuwona penu angadandipfunzisa bzinthu bzibodzi-bodzi ninga momwe apfunzisi wangu wakuyamba akhadandipfunzisira. Granville adandiuza bza mitsonkhano yomwe ikhacitika mu mzindamo. Napo kuti pakhadapita magole pafupi-fupi 10, ndikhacoka lini pamui, inepano ndikhafuna kuyenda. Tenepo Granville adandidzusa acindiikha pa njinga ya anyakulemala acindigwinya mpaka ku Nyumba ya Umambo.

Na kupita kwa nthawe Granville adandilimbikisa kuti ndinembese Xikola ya Utumiki bwa Mulungu. Iye adandiuza kuti: “Napo kuti iwepo umbakwanisa lini kufamba koma ungakwanise kulewalewa. Ntsiku inango iwepo un’dzafotokoza nkhani ya wentse. Khulupira kuti bzimwebzi bzin’dzacitika.” Mafala yaceya yadandilimbikisa kwene-kwene.

Ndidayamba kucita basa la kupalizira pa bodzi na Granville. Koma miseu mizinji ya mu mzindamo ikhadacereka-cereka. Ndipopa bzikhali bzakunesa kufamba na kanjinga ka anyakulemala. Tenepo ndidakumbira Granville kuti andiikhe mu cibara acindigwinya. Nzeru imweyi ikhali yakuthandiza. Ndipo ndidabatizidwa mu Abril 2005. Mwakusaya kucedwa abale adandipfunzisa momwe ningasamalirire mabukhu ya gwere na momwe ningasamalirire bzakukuzira mafala bza Nyumba ya Umambo.

Koma cakupasa ntsisi n’cakuti mu 2007, pai wangu adalubzika na mwadiya m’madzi acifa. Banja lathu lidasunama kwene-kwene. Granville adapemba nafe ndipo adatitsangalaza mwa kutiwerengera nkhani za m’Bibliya. Pomwe padapita magole mawiri, padacitika pomwe cinthu cinango cakusunamisa—Granville adalubzikambo na mwadiya ndipo adafa.

Gwere lathu ling’ono lidasunama kwene-kwene thangwe lidakhala liribe ne mkulu wa gwere ne mtumiki wakuthandiza. Infa ya Granville idandiwawa kwene-kwene thangwe iye akhali xamwali wangu wa pa mtima. Iye nthawe zentse akhandithandiza kufendererana na Yahova, ndipo akhandipasa bzinthu bzizinji bzomwe ndikhafunikira. Pa mtsonkhano wakutewera pambuyo pakuti iye wafa, ndidapasidwa mbali yakuti ndiwerenge Nsanza ya Mulindiri Yakupfunza. Inepano ndidandowerenga ndime ziwiri zokha, ndipo patsogolo pace ndidayamba kulira ndipo misozi idayamba kuyerera. Tenepo ndidabuluka pa pulatifomu.

Ndidayamba kubzibva bwino pomwe abale wa ku gwere linango adayamba kumbabwera kudzathandiza ku Orealla. Ndipombo mthambi yathu idatumiza mpainiya wakupambulika wakucemeredwa Kojo. Cidakhala cikondweso kwa ine thangwe mai wangu na ng’ono wangu adayambambo kupfunza Bibliya ndipo adabatizidwa. Mu Março 2015, ndidakhala mtumiki wakuthandiza. Ndipo na kupita kwa nthawe ndidafotokoza nkhani yangu ya wentse yakuyamba. Ntsiku imweyo ndidakumbukira mwakukomedwa na mwakutenda mafala yomwe Granville akhadandiuza magole mazinji mbuyomu, yakuti: “Ntsiku inango iwepo un’dzafotokoza nkhani ya wentse. Khulupira kuti bzimwebzi bzin’dzacitika.”

Kucokera mu programa za Broadcasting inepano ndidapfunza bza abale na mpfumakazi zathu omwe akugumanambo na mabvuto yakundendemerana ninga yanguya. Napo kuti mbakulemala, iwo ambacita bzinthu bzizinji ndipo mbakukondwa. Ndipo inepanombo ndikufunikirambo kucita bzibodzi-bodzi. Cakulinga cangu cakufuna kuphatisa basa mphanvu zomwe ndinazo kwa Yahova candicitisa kukhala mpainiya wakukhazikika. Ndipo mu Setembro 2019, ndidauzidwa nkhani yomwe ndikhaidikhirira lini! Mwezi umweyo ndidaikhidwa kukhala mkulu wa gwere lomwe lina apalizi wakukwana 40.

Ndiri kutenda abale na mpfumakazi omwe adandipfunzisa na kundithandiza kukwanirisa utumiki bwangu pa kutumikira Yahova. Ndipo kuposa bzentse ndiri kutenda kwene-kwene Yahova thangwe ra kundikumbukira.