M bee mɛā bu zua 1983. M bee le bu kaāna nwanaloo sɔ̄ m mɛā sah, mɛ sɔ̄ m elua lop zua, loo mɛ bɔātɛ̄ ewee dumɛ. Sɔ̄ baɛ zua etɛ̄na, m bee aa daa lɔɔrɛ ziī dee sa mm dapna kia. Kaɛlɛɛ kɛ̄ m bee piiga lo edana na ekpotɔ doo, mm bee dap kia. Aā lo dee, mm bee dapna kia. Na dumɛloo edora nage kɔ m aa nyimna. Mmɛ nii’ee, m lege doodoo nwiī.

Pio enɔɔ̄ aā sɔ̄ m bee bɔātɛ̄ etɔɔ̄ tɔ nyɔɔ na dumɛloo, baɛ Pya Ekeebee Jɛhova bee mɛ lu loo. Sɔ̄ pya saanɛɛ lu, m wee gɔā, mɛ lo dee, m lɛɛbaloo kɔ baɛ lo wa a kɔ ue mɛ nɛ. Sɔ̄ ba kɔ nu akiiloo Paradais, m bee nyɛŋiabu nu m bee dā sɔ̄ m bee dap le o’oo zua. Lo sɔ̄, ziī nɛɛ a wee zue ue aā ziī edo yii ziī ye bee kura Jethro lo a bee tɔɔ̄ Suriname, wee lu i buɛ̄ ziī sɔ̄ bu ziī enɔɔ̄ sa nyɔɔnɛ na tɛ nɔ Baibol. Jethro bee mɛ aara leere. Bu mɛ wee ye ɛɛ loo kaāna. Gbaāloo wo, na kaāma le na tɛɛma wee mɛ aara siā enɔānu Pya Ekeebee a wee lu e’ɛrɛ bie i buɛ̄. Nyɔɔwo, sɔ̄ Florence lo alu ziī lo wa a bee mɛ lu loo bee mɛ bip lo a le eniage mɛ enɔ Baibol, m bee doo aiī.

Florence bee obia lu sa aara ye dam Justus, e ba bee bɔātɛ̄ enyɔɔnɛ mɛ nɔ Baibol. Sɔ̄ ba bee suā kɔ mm para ebuū nu, ba bee mɛ yerebah nɛ kɔ m dap buū nu. Sɔ̄ pio sɔ̄ etɛ̄na, m bee bɔātɛ̄ ebuū nu nyɔɔ na loo. Ziī dee, lo dam le wa bee mɛ kɔ nɛ kɔ alu eyere wa ture Suriname kɔ ba a kii wee zue ue. A bee lu ekiɛ̄nu kɔ lɔgɔ nɛɛ enyɔɔnɛ mɛ nɔ Baibol naa le Orealla. Mɛ, bu mɛ ɛɛ kɔ Jɛhova naa bee mɛ ibere.

Sɔ̄ lo sɔ̄ etɛ̄na, ziī nɛɛ sɛmdee a kura Floyd bee lu Orealla, sa a bee mɛ muɛ̄ sɔ̄ a gaa bee zue ue aā ziī tɔ yii ziī. Sɔ̄ a bee mɛ kɔ nu akiiloo nɔ Baibol nɛ, m bee kɛgɛ. A bee mɛ bip kɔ “E na anua o kɛgɛ a?” M kɔ ye nɛ kɔ m ebee nɔ kpa a kura What Does God Require of Us? E m ebee ina gaa nɔ Knowledge That Leads to Everlasting Life. * M bee ye baatɛ̄ nɛ nu anua m bee ɔbɛ lo enɔānu. Floyd bee mɛ nyɔnɛ nɔ Knowledge That Leads to Everlasting Life lɛɛ, mɛ a bee lunage enyaana ye ture dɔɔ̄na kɛ̄ lo esitam zue ue. E lɔgɔ nɛɛ enɔɛ̄ mɛ Baibol naa bee lena.

 Kerewo, bu zua 2004, Granville le Joshua, baɛ pya sɛmdee bee lu eyere nua Orealla. Ba bee zue ue aā ziī tɔ yii ziī, e ba bee mɛ zɔ̄ŋia. Sɔ̄ ba mɛ bip lo a le m gbīge enɔ Baibol, m bee kɛgɛ. M bee wa kɔ nɛ kɔ ba a nyɔɔnɛ mɛ nɔ Knowledge That Leads to Everlasting Life aā ye bɔātɛ̄. M bee gbī e’ɛp sɛh ba enɔɛ̄ge mɛ nu elua nɛɛ a wee mɛ nɔɛ̄ lo kpa a, bee mɛ nɔɛ̄ naa e. Granville bee mɛ kɔ nɛ kɔ a gaa lu esere enɔānu bie lo buɛ̄. Kere m sii bee aa na tɔ bu nu a waɛloo lop zua, m bee gbī esi. Nyɔɔwo Granville bee mɛ dana yere bu kpe kɔga sa mɛ kigere kuma Tɔ Nɔnu Buɛ̄-mɛnɛ.

Sɔ̄ sɔ̄ gaa kiisī, Granville bee mɛ yere mɛm loo kɔ m yere bee loo Tɔkpa Esiatam Buɛ̄-mɛnɛ. A bee kɔ: “O ɛrɛ boh, mɛ o dap kɔ ue. Ziī dee, o nɛ ekɔaue taɛkɛ̄. O doo.” Pya ye ue yere mɛm loo bee mɛ agɛrɛloo.

M bee bɔātɛ̄ enyɔɔnɛ Granville si uwe zue ue. Kerewo, gbɛnɛ-edo dee a le lo buɛ̄ bee lu banabana sa kpe kɔga naa dap tɛɛ̄. Nyɔɔwo, m bee bara Granville kɔ a yere mɛ bu wheelbarrow sa mɛ kigere. Lo nɔɔnɔɔnu bee lee kaāna. Bu Nia Enɔɔ̄ bu zua 2005, m bee liamaā. Sɔ̄ a esaa, pya wuga nɛɛdam bee mɛ kpɔā lokwa m dap kuūdɛɛ̄loo kpa bu bɔŋanaloo le aara nu kɔ ue bu bie Tɔ Nɔnu Buɛ̄-mɛnɛ.

Mɛ, alu ekiɛ̄nu kɔ bu zua 2007, na tɛ bee u bu bugia siranu bie nyɔɔ maā. I butɔ bee le bu gbɛnɛ ekiɛ̄nu. Granville bee i nyɔɔnɛ yere kara sa buū pya dɔ Baibol egbɔ̄ i nyiɛ i nɛ. Sɔ̄ baɛ zua etɛ̄na, bee i kiɛ̄ kaāna sɔ̄ dɔɔ̄na pɔrɔ siranu bee sinagekɛ̄ sira, Granville bee u bu bugia siranu bie nyɔɔ maā.

I nwīgbagbara bɔŋanaloo bee le bu ekiɛ̄nu, e lɔgɔ nɛɛ kanɛɛ naa bee le, aba ziī nɛɛ yerebahtam na a bee bia a. Luh Granville bee mɛ kiɛ̄ kaāna nyɔnɛbee a bee le na le gbo. A ebee mɛ yerebah nɛ kɔ m tɔɔ̄ waɛloo Jɛhova sa mɛ nɛ pya dɔɔ̄na nu a mɛ bɛɛ̄. Bie enɔānu i bee sikɛ̄ si sɔ̄ a u sah, bee lu enɛ mɛ nu edoo, e a bee lu ekɔ m buū pya barakpaɛ̄ a le bu Enɔānu Tɔ Baɛloo. M buū ye tua barakpaɛ̄ lɛɛ, mɛ m bee bɔātɛ̄ eto sa maā wee mɛ aa dɛɛ̄. M bee aa kɛ̄ kɔ ue aā.

Bu mɛ bee bɔātɛ̄ e’ɛɛ sɔ̄ pya wuga a aa dɔɔ̄na bɔŋanaloo bee lu Orealla wee yerebah i enɛ. Gbaāloo wo tɔ naa tam bee yere Kojo, nɛɛ a le bu esiatam sɛmdee alu keebee nua. Dɔɔ̄na nu a bee mɛ ɛɛrɛ nage bu na kɔ na ka le na gbagbara wuga nɛɛdam bee bɔātɛ̄ enɔnu lɛɛ ba liamaā. Sɔ̄ a esaa, bee lu etubo mɛ baloo nua nɛɛ yerebahtam bu Taa Enɔɔ̄ bu zua 2015. Sɔ̄ pio sɔ̄ etɛ̄na, m bee nɛ na tua ekɔaue. Lo dee, m bee kɛgɛ sa tonage sɔ̄ m nyɛŋiabu ue Granville bee mɛ kɔ nɛ pio zua akii adumɛ kɔ: “Ziī dee a ee, o nɛ ekɔaue taɛkɛ̄. O doo.”

Tɛ̄maloo JW Broadcasting^®, m enɔā nu akiiloo gbɛnɛ-edo pya wuga nɛɛdam le nɛɛwa ba le bu dua kɛ̄tɔɔ̄ a bee lo mda. Mɛ kere ba ɛrɛ boh, ba gaa doo gbɛnɛ-edo nu sa le bu ɛɛbu. Kiiloo mda, m dap doo pio nu. Taɛ m ɛrɛ lo esu na mɛm daā ɛrɛgeba nu m dap doo nɛ Jɛhova bee mɛ zū kɔ m lu nɛɛ sɛmdee dɛ̄dɛɛ̄ sɔ̄. E a ɛrɛ ziī gbɛnɛ le nu mm gaa bee ɛmadɛɛ̄ lo a bee sira bu Ɛrɛnia Enɔɔ̄ bu zua 2019. Bu lo enɔɔ̄, bee lu etubo mɛ baloo kɔ m si tam doodoo nɛɛ kanɛɛ bie i bɔŋanaloo a ɛrɛ nu a dap lu 40 pya zue ue.

M doo yaa pya wuga nɛɛdam le nɛɛwa ba bee mɛ nyɔɔnɛ nɔnu sa mɛ yerebah nɛ kɔ m si uwe zue ue. E lo a eetɔɔ̄, m doo yaa Jɛhova kɔ a naa ibere mɛ.