E vwiẹre mẹ ẹgbukpe 1983. Uvwre ẹgbukpe erukaro uvuẹn akpenyerẹn mẹ mi vwo omọkpokpọ, ọrẹn ọke mia ha ẹgbukpe ikpe, ọsoso ugboma mẹ nọ miame mẹ gbangbanhon. Ẹdẹ owu, ọke emrẹ ẹgbukpe eva a vrẹn hin, mia rha sabu kpare omamẹ ọke mia rhọmọ-ọ. O toro oborẹ mi damoma lele mi na kpare aghwẹ mẹ-ẹ, o vwo omẹgbanhon uvuẹn aye-e. Nẹ ẹdẹ ọrana rhe, mia rha sabu nya ghwomara-an. Emiamo mẹ ọrhọ lẹrhe mẹ do-o. Inyenana, mi ji kamu jerẹ ọmọvwerhe.

Emrẹ ibiamo ezẹko ọke mie kpomu hin, mi vwa rha sabu nẹ oghwa-a, ọke ọrana yẹ Iseri Jehova awanva e te oghwa ame. Epha i rha rhe, ni mia damoma tiomanuẹ, ọrẹn ẹdẹ ọrana ne mi ha uphẹn rẹn emẹse na tẹmro mẹ. Ọke aye a tẹmro kpahen i Paradais, ne mi karorhọ oborẹ mi rhonrin ọke mia ha emrẹ ẹgbukpe isionrin. Ọke ọrana, imishọnari owu re se Jethro, ro rhirhiẹ Suriname, ọ rhiẹ ọko ame ukwọgbọ uvuẹn ubiamo owu, jeghwai lele ọsẹ mẹ yono i Baibol na. Jethro o dje uruemru esiri mẹ. Mi vwo ẹguọlọ kpahiẹn. Habaye, izu ọrhẹ ọsẹ mẹ eduado a kpare mẹ riẹ iyono Iseri Jehova, re ruẹ uvuẹn ọko ame na. Omarana, ọke i Florence, owu usuẹn emẹse na ri rhere ẹdẹ ọrana, ọ nọ mẹ sẹ mi guọlọ yono rhọ, ni mi kweri.

Florence nọ ghwẹrioma rhe rhẹ esa ye Justus, aye awanva ne yoni mẹ i Baibol na. Ọke aye a mẹrẹnvwrurhe taghene mie rhe oborẹ e se-e, aye ni yonirin mẹ oborẹ e se. Ọke oru, mi mia sabu se. Ẹdẹ owu, aye ni ta mẹ taghene a ta rẹn aye nẹ aye i ya ga uvuẹn Suriname. Ọrẹ omemwurhọ, orho vwo ohworho rọ sabu sa me yoni mẹ i Baibol na uvuẹn Orealla-a. Ọrẹn, Jehova ọ kpariroro vrẹn mẹ-ẹ.

O jiri-i, ọkobaro owu re se Floyd nọ rhiẹ Orealla, nọ mẹrenren mẹ ọke ro ghwoghwo nẹ oghwọgbọ riẹ oghwọgbọ. Ọke rọ ta mẹ kpahen uyono i Baibol na, ne mi chẹẹre. Nọ nọren mẹ, “Mesoriẹ wa chẹẹ?” Ne mi ta riẹn taghene mi yono ibroshọ na What Does God Require of Us? hin ne, jeghwai tuẹn ọbe na Knowledge That Leads to Everlasting Life * rhọ ne. Ne mi ta riẹn oborẹ ọsoriẹ uyono na ọ dobọji. Floyd no leliri mẹ yono ekete rọ hẹrhẹre uvuẹn ọbe na, ọrẹn na ji kpariẹ riẹ ekete ọrọrọ. Ọgbọ ọrọrọ, mie rhe vwo ohworho ro no yoni mẹ i Baibol na-a.

 Ọrẹn, uvuẹn ẹgbukpe 2004, ne dje Granville ọrhẹ Joshua, ri rhiẹ ekobaro oghẹnrensan awanva rhiẹ Orealla. Ọke aye e ghwoghwo nẹ oghwọgbọ riẹ oghwọgbọ, aye ni mẹrenren mẹ. Ọke aye a nọ mẹ sẹ mi guọlọ yono, ne mi chẹẹre. Ne mi ta rẹn aye nẹ aye i ha ọbe na Knowledge That Leads to Everlasting Life, yoni mẹ nẹ ọtonrhọ. Mi guọlọ rhe sẹ aye ine yoni mẹ jerẹ oborẹ imizu erava na i yonirin mẹ. Granville nọ ta mẹ taghene ene ruẹ uyono ukoko uvuẹn ọko na. Dedevwo mie ji nẹ oghwa mẹ emrẹ ẹgbukpe ikpe-e, mi guọlọ riẹ uyono na. Omarana, Granville no rhiẹ oghwa jeghwai kpare mẹ rhẹ aga ukpolo riẹ Aghwẹlẹ Uvie na.

Ọke oru, Granville no jiririe mẹ ne mi vwobọrhọ Isukuru Uvie na. Nọ ta mẹ: “Dedevwo we vwo omọkpokpọ-ọ, wa ji sabu tẹmro. Ẹdẹ owu, wu na ha ẹmro otu phia. Ọnọ ghini phia.” Ẹmro urhebro erana i yẹre mẹ uduefigbere.

Ne mi tuẹn owian aghwoghwo rhọ rhẹ Granville. Ọrẹn, izede na buebun uvuẹn amwa na e rhomu, ra na ha aga ukpolo nya-a. Omarana, ne mi ta rẹn Granville nọ kpare mẹ rhẹ iwibaro no ghorin mẹ. Ọrana ọ wianren omamọ. Uvuẹn April 2005, ne mi bromarhame. Ọke oru, imizu na ni yonirin oborẹ a hẹrote ẹbe ukoko na ọrhẹ ekwakwa ikpekporo ra ha ruiruo uvuẹn Aghwẹlẹ Uvie na.

Ọrẹ omemwurhọ, uvuẹn ẹgbukpe 2007, ọsẹ mẹ no hwuru ọke rọ ghwa owọ. Ọnana ọ hobọte ekrun ame omamọ. Granville no leliri ame nẹrhomo jeghwai se ekete i Baibol ri ha udu rhẹ ame aghwẹ. Ẹgbukpe eva a vrẹn, omiamiamo ọrọrọ no teri ame oma, Granville no ji hwu ọke rọ ghwa owọ.

Ukoko ame orho vwo ọkpako ukoko owuorowu-u, odibo owian owu ọvo nọ yọ havwiẹ. Uhwu Granville ọ dare mẹ omamọ; ọye ugbehian mẹ ọghoghanren. Ọye yọ ha userhumu mẹ tikẹrẹ i Jehova rhọ, jeghwai ha userhumu mẹ vwo ekwakwa mi guọlọre. Uvuẹn uyono ukoko re ruru ọke ro hwu hin, mẹmẹ ye se Oghwa Odẹrẹ na. Ọke mie se idjaghwẹ eva erukaro na hin, ni mi tuẹn oviẹ rhọ, mia sabu suie-en. Ne mi nẹ ubiukpe na.

Oma nọ merhen mẹ ọke imizu e nẹ ukoko ọrọrọ sa, nẹ aye i ha userhumu rẹn amẹ uvuẹn Orealla. Habaye, oghọn ukoko na no dje Kojo rhe, ọye ọkobaro oghẹnrensan. Oma ọ merhenren mẹ omamọ ọke izu mẹ ọrhẹ omizu mẹ ọhworhare ọkokamu a tuẹn uyono i Babiol rhọ, jeghwai bromarhame. Ọke oru, uvuẹn March 2015, na hare mẹ mwu ẹrhẹ odibo owian. O jiri-i, ne mi ha ẹmro otu ọrukaro mẹ phia. Ẹdẹ ọrana, ne mi karorhọ rhẹ oviẹ kugbe omamerhomẹ, ẹmro i Granville ọ ta mẹ vrẹn ne: “Ẹdẹ owu, wu na ha ẹmro otu phia. Ọnọ ghini phia.”

Mi yono ekwakwa buebun mie imizu erọrọ ri ha aruẹ erhirhiẹ mẹ na, nyoma ẹkwaphiẹrhotọre JW Broadcasting^® ne. Ọrẹn, udabọ ebẹnbẹn aye, aye e ji ruẹ ekwakwa buebun, oma ọ ji merhen aye. Harẹn omẹmẹ, mia ji sabu ruẹ ekwakwa ezẹko. Oruru mi ne ruẹ ekete omẹgbanhon mẹ o teri rẹn Jehova, no mwurun mẹ vwobọrhọ ọkobaro ọke ephian. Uvuẹn September 2019 ne mi rhon omamọ iyẹnrẹn! A hare mẹ mwu ẹrhẹ ọkpako ukoko uvuẹn ukoko ame ro vwo ighwoghwẹmro ri te 40.

Mi kpẹmẹ imizu eghoghanren ri leliri mẹ yono i Baibol na, jeghwai ha userhumu mẹ sabu ga i Jehova. Ọrọ mai ghanren, mi kpẹmẹ i Jehova omamọ rọ vwọ kpariroro vrẹn mẹ.