Ӕз райгуырдтӕн 1983 азы. Куы райгуырдтӕн, уӕд ӕнӕниз сывӕллон уыдтӕн. Фӕлӕ мыл 10 азы куы цыд, уӕд мӕ буар тынг риссын райдыдта. Уымӕй иу-дыууӕ азы куы рацыд, уӕд та мӕ уавӕр ноджы фӕфыддӕр. Иу бон куы райхъал дӕн, уӕд мӕ бон фезмӕлын дӕр нӕ уыд. Архайдтон мӕ къӕхтӕ фезмӕлын кӕныныл, фӕлӕ мӕ коммӕ нӕ кастысты. Уӕдӕй фӕстӕмӕ мӕ бон цӕуын нал уыд. Цы низ мӕм ссардтой, уый тыххӕй рӕзгӕ дӕр нал кодтон. Ӕмӕ ныр дӕр дӕн сывӕллоны йас.

Афтӕ куы фӕдӕн, уымӕй нӕм цалдӕр мӕйы фӕстӕ ’рбацыдысты Йегъовӕйы Ӕвдисӕнтӕ. Ӕнӕуи-иу нӕм исчи куы ’рбацыд, уӕд-иу сӕм мӕхи нӕ равдыстон. Фӕлӕ мӕ уыцы дыууӕ сылгоймагмӕ байхъусын бафӕндыд. Дзӕнӕты тыххӕй куы дзырдтой, уӕд мӕ зӕрдыл ӕрлӕууыд, 5-аздзыдӕй цы фехъуыстон, уый. Уӕд-иу нӕ хъӕумӕ Суринамӕй мӕй иу хатт ӕрцыд иу миссионер, Джетро, зӕгъгӕ, ӕмӕ-иу мӕ фыдимӕ Библи ахуыр кодта. Джетро-иу мыл тынг баузӕлыд, ӕмӕ йӕ бирӕ уарзтон. Стӕй ма-иу нӕ хъӕуы Йегъовӕйы Ӕвдисӕнтӕ уагътой фембӕлдтӕ, ӕмӕ мӕ фыдыфыд ӕмӕ мӕ фыдымад уыцы фембӕлдтӕм цыдысты. Ӕмӕ-иу мӕн дӕр иуӕй-иу хатт семӕ акодтой. Гъемӕ мӕ уыцы сылгоймӕгтӕй иу, Флоренс, куы бафарста, нӕ дӕ фӕндид фылдӕр базонын, зӕгъгӕ, уӕд сразы дӕн.

Иннӕ хатт Флоренс ӕрбацыд йӕ сӕрыхицау Джастасимӕ, ӕмӕ мемӕ Библи ахуыр кӕнын райдыдтой. Куы бамбӕрстой, кӕсын кӕй нӕ зонын, уӕд мын баххуыс кодтой, цӕмӕй кӕсын сахуыр уыдаин. Иу цасдӕры фӕстӕ сӕ Суринаммӕ снысан кодтой. Ӕмӕ Ореаллӕйы, мемӕ дарддӕр Библи чи ахуыр кодтаид, уый нал уыд. Фӕлӕ мӕ Йегъовӕ нӕ ферох кодта.

Фӕстӕдӕр нӕм ӕрцыд, пионерӕй чи лӕггад кодта, иу ахӕм ӕфсымӕр, Флойд, зӕгъгӕ. Йемӕ базонгӕ дӕн, хӕдзарӕй-хӕдзармӕ куы хъусын кодта, уӕд. Библи ахуыр кӕныны тыххӕй мын куы загъта, уӕд мӕ мидбылты бахудтӕн. Уый мӕ бафарста, цӕмӕн, дам, худыс. Ӕз ын загътон, Йегъовӕйы Ӕвдисӕнтимӕ Библи кӕй ахуыр кодтон ӕмӕ кӕй фӕдӕн брошюрӕ «Хуыцау нӕ цы домы?», стӕй чиныг «Ӕнусон цардмӕ кӕнӕг базонынад» * ахуыр кӕнын кӕй райдыдтон. Ӕмӕ йын бамбарын кодтон, ахуыр кӕронмӕ цӕуылнӕ фестӕм, уый. Флойдимӕ чиныг кӕронмӕ фестӕм. Фӕлӕ та уый дӕр ӕндӕр ранмӕ снысан кодтой. Ӕмӕ та ӕнӕ ахуыргӕнӕгӕй баззадтӕн.

Фӕлӕ 2004 азы Ореаллӕмӕ ӕрӕрвыстой дыууӕ сӕрмагонд пионеры, Гранвиллы ӕмӕ Джошуайы.  Уыдонимӕ дӕр базонгӕ дӕн, хӕдзарӕй-хӕдзармӕ куы хъусын кодтой, уӕд. Куы мӕ бафарстой, нӕ дӕ фӕнды Библи ахуыр кӕнын, зӕгъгӕ, уӕд бахудтӕн. Ӕз сын загътон, кӕй мӕ фӕнды чиныг «Базонынад» райдианӕй ахуыр кӕнын. Фӕндыд мӕ базонын, раздӕр мемӕ чи ахуыр кодта, уыдон мын цы амыдтой, адон дӕр мын уый амондзысты ӕви нӕ. Гранвилл мын загъта, нӕ хъӕуы ӕмбырдтӕ кӕй вӕййы. Ӕмӕ мӕн дӕр бафӕндыд ӕмбырдмӕ ацӕуын, кӕд иу-10 азы дӕргъы хӕдзарӕй никуыдӕм цыдтӕн, уӕддӕр. Гранвилл мӕм ӕрбацыд ӕмӕ мӕ Паддзахады залмӕ инвалиды коляскӕйы аласта.

Фӕстӕдӕр мын Гранвилл загъта, мӕ бон кӕй у мӕхи Хуыцауы Ныхас хъусынгӕнджыты скъолайы ныффыссын. Загъта мын: «Дӕ бон цӕуын нӕу, фӕлӕ дзурын дӕ бон у. Иу бон дын уыдзӕн ӕргом раныхас. Уый ӕнӕмӕнг уыдзӕн!» Гранвиллы ныхӕстӕ мӕ стыр ныфс бауагътой.

Ӕз Гранвиллимӕ райдыдтон хорз хабар хъусын кӕнын. Фӕлӕ хъӕууон фӕндӕгтыл инвалиды коляскӕйыл цӕуын тынг зын уыд. Ӕмӕ Гранвиллӕн загътон, цӕмӕй мӕ тачкӕйы сбадын кодтаид ӕмӕ мӕ ластаид. Афтӕмӕй нын бирӕ ӕнцондӕр уыд. 2005 азы апрелы донаргъуыд райстон. Гыццыл фӕстӕдӕр мын ӕфсымӕртӕ бацамыдтой, Паддзахады залы аппаратурӕимӕ архайын куыд хъӕуы, уый, стӕй, литературӕйӕн дзуапп чи дӕтты, уый зонын цы хъӕуы, уыдӕттӕ.

2007 азы нӕ бинонтыл стыр зиан ӕрцыд. Мӕ фыд лодкӕйыл куыд фӕцӕйцыд, афтӕ доны ныххауд. Уӕззау цӕфтӕ фӕци, ӕмӕ цалдӕр боны фӕстӕ амард. Уыцы рӕстӕг Гранвилл уыд нӕ фарсмӕ. Немӕ-иу куывта ӕмӕ-иу нын Библийӕ зӕрдӕфидаргӕнӕн ныхӕстӕ каст. Дыууӕ азы фӕстӕ та ӕндӕр ӕвирхъау хабар ӕрцыд. Гранвилл ӕхсӕвы йӕ лодкӕйыл куы фӕцӕйцыд, уӕд йӕ лодкӕ фӕдӕлдон. Дыууӕ боны фӕстӕ Гранвиллы мардӕй ссардтой.

Нӕ гыццыл ӕмбырд баззад ӕнӕ хистӕр нӕлгоймагӕй, уыди нӕм ӕрмӕстдӕр иу кӕстӕриуӕггӕнӕг ӕфсымӕр. Мӕ зынаргъ ӕмбал кӕй нал уыд, уый мын тынг зын уыди. Гранвилл мын алкӕддӕр ӕххуыс кодта, цӕмӕй Йегъовӕмӕ ӕввахсдӕр кодтаин. Стӕй-иу мӕм ӕнӕуи дӕр тынг фӕкаст. Зианы фӕстӕ фыццаг цы ӕмбырд уыд, уым хъуамӕ кастаин статья «Хъахъхъӕнӕн мӕсыджы» ахуыры рӕстӕг. Мӕ бон сси фыццаг дыууӕ абзацы бакӕсын, фӕлӕ стӕй мӕ кӕуын нал баурӕдтон, ӕмӕ мӕ бахъуыд сценӕйӕ ӕрхизын.

Ӕндӕр ӕмбырдӕй нӕм ӕфсымӕртӕ ӕххуыс кӕнынмӕ куы ’рцыдысты, уӕд мӕ ныфс бацыд. Стӕй ма нӕм филиал снысан кодта Коджойы, сӕрмагонд пионеры. Мӕ циныл ма цин бафтыд, мӕ мад ӕмӕ мӕ кӕстӕр ӕфсымӕр Библи ахуыр кӕнын куы райдыдтой ӕмӕ донаргъуыд куы райстой, уӕд. 2015 азы мартъийы мӕ снысан кодтой кӕстӕриуӕггӕнӕг ӕфсымӕрӕй. Цасдӕры фӕстӕ мын ӕфсымӕртӕ фыццаг хатт бахӕс кодтой ӕргом раныхас. Раныхас мын цы бон уыд, уыцы бон цин дӕр кодтон ӕмӕ кӕугӕ дӕр, уымӕн ӕмӕ мӕ зӕрдыл ӕрлӕууыдысты, Гранвилл мын цалдӕр азы размӕ цы ныхӕстӕ загъта, уыдон: «Иу бон дын уыдзӕн ӕргом раныхас. Уый ӕнӕмӕнг уыдзӕн!»

Нӕ интернет-телеуынынады фенын, мӕ уавӕры хуызӕн уавӕрты чи ис, ахӕм хоты ӕмӕ ’фсымӕрты. Кӕд рынчын сты, уӕддӕр бирӕ аразынц ӕмӕ сты амондджын. Мӕнӕн дӕр нырма мӕ бон у цыдӕртӕ аразын. Мӕн фӕндыд, цы хъарутӕ ма мӕм ис, уыдон Йегъовӕйӕн дӕттын, ӕмӕ райдыдтон пионерӕй лӕггад кӕнын. 2019 азы сентябры та ӕрцыд, ӕнхъӕл кӕмӕн нӕ уыдтӕн, ахӕм хабар – хистӕр нӕлгоймагӕй мӕ снысан кодтой! Ныртӕккӕ не ’мбырды ис 40 хъусынгӕнӕджы бӕрц.

Мемӕ Библи чи ахуыр кодта ӕмӕ мын Йегъовӕйӕн лӕггад кӕнынӕн чи ӕххуыс кодта, уыцы зынаргъ хотӕ ӕмӕ ’фсымӕртӕй тынг бузныг дӕн. Ӕппӕты тынгдӕр та Йегъовӕйӕ дӕн бузныг, кӕй мӕ нӕ ферох кодта, уый тыххӕй!