Mi a nase na 1983. Mi infansia tabata normal, pero ku mi dies aña mi a kuminsá sinti doló fuerte rònt mi kurpa. Mas o ménos dos aña despues, mi a lanta un mainta sin por a move. Ni maske kuantu mi a purba, mi no por a move mi pianan, nan a pèrdè forsa. For di e dia ei, mi no a kana mas. E malesa a pone tambe ku mi a stòp di krese. Ainda mi tin tamaño di mucha.

Mi tabatin dos luna será den kas ora dos Testigu di Yehova a bishitá nos. Normalmente ora bishita bini, mi tabata skonde. Pero, e dia ei mi a laga e señoranan papia ku mi. Segun ku nan tabata papia di Paradeis mi a kòrda ku, tempu mi tabatin sinku aña, un misionero ku yama Jethro tabata bishitá nos pueblo un biaha pa luna for di Sürnam i tabata studia Beibel ku mi tata. Jethro tabata masha amabel ku mi. Ademas, mi welo i wela parti di tata tin biaha tabata bai ku mi na e reunionnan ku Testigunan tabata tene den nos pueblo. P’esei ora Florence, un di e señoranan Testigu ku a bishitá mi e dia ei, a puntra mi si mi kier a sa mas tokante Beibel, mi a bis’é sí.

Florence a bini bèk ku su esposo, Justus, i huntu nan a kuminsá studia Beibel ku mi. Ora nan a ripará ku mi no por a lesa, nan a siña mi lesa. Despues di un tempu, mi mes por a lesa. Un dia, nan a bisa mi ku nan a haña asignashon pa sirbi na Sürnam. Lamentablemente, no tabatin niun hende na Orealla ku por a sigui studia ku mi. Pero, mi tabata kontentu ku Yehova no a lubidá mi.

No a dura mashá ku un pionero ku yama Floyd a yega Orealla. Un dia, el a topa mi ora e tabata prediká di hùt pa hùt. Ora el a papia ku mi tokante un estudio di Beibel, mi a smail. El a puntra mi: “Dikon bo tin smail?” Mi a kont’é ku ya mi a studia e foyeto Kico Dios Ta Rekerí di Nos? i ku mi a kuminsá den e buki Conocimentu cu Ta Hiba na Bida Eterno. * Anto mi a splik’é dikon e estudio no a sigui. Floyd a studia ku mi e partinan ku mi tabata falta den e buki Conocimentu, pero e tambe a haña asignashon pa sirbi na un otro lugá. Atrobe mi a keda sin maestro.

 Pero na 2004, dos pionero spesial, Granville i Joshua, a haña asignashon pa sirbi na Orealla. Nan tabata prediká di hùt pa hùt, i a haña mi. Ora nan a puntra mi si mi ke studia, mi a smail. Mi a pidi nan pa studia e buki Conocimentu for di kuminsamentu ku mi. Mi tabata ke wak si nan lo a siña mi e mes kosnan ku mi maestronan anterior. Granville a bisa mi ku tabatin reunion den e pueblo. Aunke mi tabatin kasi dies aña sin sali for di kas, mi kier a bai. Pues, Granville a bini ku un ròlstul na mi kas i a hiba mi Salòn di Reino.

Ku tempu, Granville a animá mi pa skirbi mi nòmber den Skol di Ministerio Teokrátiko. El a bisa: “Ta bèrdat ku bo tin un desabilidat, pero bo por papia. Un dia, lo bo duna diskurso públiko. Wak bo ta mira.” Su palabranan a duna mi ánimo i konfiansa.

Mi a kuminsá prediká ku Granville. Pero, e kamindanan den e pueblo tabata muchu malu pa un ròlstul. Pues, mi a pidi Granville pa e kore mi den un krenwá, i esei a duna bon resultado. Na aprel 2005, mi a batisá. Poko tempu despues, e rumannan a siña mi atendé ku literatura di kongregashon i e sistema di zonido na Salòn di Reino.

Lamentablemente, na 2007 mi tata a muri den un aksidente ku boto. Nos famia tabata kibrá. Granville a hasi orashon ku nos i a usa Beibel pa konsolá nos. Dos aña despues, nos a haña nos ku un otro tragedia: Granville tambe a muri den un aksidente ku boto.

Nos kongregashon chikitu a keda desolá, sin niun ansiano i ku un sirbidó ministerial so. Granville su morto a dal mi duru, e tabata un bon amigu. Semper e tabat’ei pa yuda mi atendé mi nesesidatnan spiritual i físiko. Na e reunion despues di su morto, mi tabatin ku lesa e paragrafnan den Estudio di Toren di Vigilansia. Mi a logra lesa nèt e promé dos paragrafnan so, despues mi a kuminsá yora sin stòp. Mi mester a baha for di plataforma.

Mi a kuminsá sinti mi mas mihó ora algun ruman for di un otro kongregashon a bini pa yuda nos na Orealla. Ademas, sukursal a manda un pionero spesial ku yama Kojo. Mi a keda masha kontentu ku mi mama i mi ruman hòmber mas chikitu a kuminsá studia i a batisá. Na mart 2015, mi a ser nombrá komo sirbidó ministerial. Un tempu despues, mi a duna mi promé diskurso públiko. E dia ei, mi a kòrda ku un smail i lágrima di gratitut loke Granville a bisa mi añanan atras: “Un dia, lo bo duna diskurso públiko. Wak bo ta mira.”

E programanan di JW Broadcasting^® a laga mi sera konosí ku vários ruman ku ta den mesun situashon ku mi. Pero apesar di nan desabilidat, nan ta aktivo i felis. Ami tambe por hasi algun kos ainda. Mi deseo di duna Yehova tur loke mi por a motivá mi pa bira pionero regular. I mi a haña sorpresa na sèptèmber 2019 ora mi a ser nombrá komo ansiano di nos kongregashon di 40 publikadó.

Mi ta gradisí e rumannan stimá ku a studia ku mi i yuda mi sirbi Yehova. Mas ku tur kos, mi ta gradisidu ku Yehova no a lubidá mi.