Ngavualewe mu 1983. Mu ivo ya gudiangela, ngakhalele gami muabonga, uvi tangua ngataganesele ivo 10, ngasendesele guvua gubala guakola mu muila wagasue. Gungima dia ivo hehi nu mbadi, ngazugile gu tulo lusugu lumoshi mu gumenegena, uvi ngakhalelego nu luholo lua gudinyigisa. Ngatshitshile yagasue ha gunyigisa mabongo, uvi ngakhalelego nu ngolo nga hazonda. Sendese lusugu luene uu nu mangino, ngana wendago luko. Ukhashi wene wangukangele njila ha gukula. Uu nu mangino ngana khala gifua gana gazonda.

Ngakhalelego nu luholo lua guzoga. Mbeji jiazonda gungima, hangakhalele mu inzo yami, Matemue a Yehowa mbadi ajile gungutala. Tangua athu akhalele muza gungutala, ngakhalele mukamba gudisuega, uvi lusugu luene ngatele maga nu Matemue ene a akhetu. Tangua asendesele guzuelela ndaga yatadila Phaladiso, ngawungulugile ndaga ngavuile tangua ngakhalele nu ivo thano. Mu tangua diene, misionere mumoshi, Jéthro, yago wakhalele mujinga gu Suriname, wakhalele muza mbala imoshi mu mbeji ha gulongesa tata Biblia. Jéthro wangukalegele ndaga nu gisemo giagasue. Ngamuzumbile muavula diago. Luko, khakha wami wa yala nu wa mukhetu akhalele gungubata mu gudibungisa gua Matemue guakhalele mukalegewa mu dimbo dietu. Tangua Florence, mumoshi mukatshi dia Matemue ajile gungutala lusugu luene, wanguhudile gula ngajiya gulonguga Biblia, ngamuwambelele egi ngatshigina.

Florence nu mulumi’enji Justus ajile luko gungutala, asendesele gungulongesa Biblia. Tangua akotelesele egi ngakhalelego mujiya gutanga, angukuatesele ha gujiya gutanga. Gungima dia masugu azonda, ngasendesele gutanga muabonga. Lusugu lumoshi, phangi muene nu mukaji’enji anguwambelele egi atumiwa gu Suriname ha guya mutshita mudimo wa gulongesa. Tangua ayile, guakhalelego nu muthu wajiya gungulongesa Biblia. Uvi, ndaga yabonga idi egi Yehowa angujimbidilego nga hazonda.

Gungima, pionye mumoshi jina dienji Floyd, wajile gu Orealla, tuadimonele n’enji tangua diakhalele muene mulongesa inzo nu inzo. Tangua wanguhudile gula tuajiya gusendesa gulonguga Biblia, ngamuemuetele. Wanguhudile egi: “Mukunda natshi udi mumuemueta?” Ngamuwambelele egi ngalongugile gale gamukanda Nzambi Udi Mutulomba Gima Tshi? Ngasendesele gale nji gulonguga mukanda La connaissance qui mène à la vie éternelle. * Ngamukotelesele ndaga yatshitshile egi ngulandulago gulonguga. Floyd wasendesele luko gungulongesa  mukanda Connaissance, uvi gungima muene nji watumiwe fundo diko ha guya mulongesa. Ngakhalelego luko nu muthu wa gungulongesa Biblia.

Uvi, mu 2004, ba pionniers spéciaux, Granville nu Yoshua, atumiwe ha guza gu Orealla. Tuadimonele nawo tangua akhalele mulongesa inzo nu inzo. Tangua anguhudile gula ngajiya gulonguga Biblia, ngamuemuetele. Ngaatogele egi asendese gungulongesa mukanda Connaissance sendese mu gisendeselo. Ngakhalele mukamba gujiya gula ene nji mbaangulongesa ndaga jiangulongesele alongeshi ami akulu. Granville wanguwambelele egi akhalele mutshita gudibungisa mu dimbo. Ngatshima ngabalegesele ivo hehi nu 10 guya ndo nga fundo diko, ngatshiginyile ha guya mu gudibungisa. Granville wajile gunguzula, wanguhagele holu dia velo dia ikata (fauteuil roulant), wakhalele gungutuma gungima uu nu gu Inzo ya Ufumu.

Gungima, Granville wanguwambelele ha gusonega jina gu Khalasa dia Mudimo wa Teokrasi. Wangudijigile egi: “Wajiyilego guwenda, uvi wajiya guzuela. Gudi nu lusugu mbawumutshita diskur. Idi yadiago mbawumutshita diskur.” Mbimbi jienji jianguhanele diago gikhesa.

Ngasendesele gulongesa hamoshi nu phangi Granville. Uvi, njila (ibendo) jiavula jia mu dimbo diene jiakhalele jiabola diago ha guwenda ha velo dia ikata. Ngawambelele Granville ha gungumba mu brouette ha gungutuma gungima. Gutshita ngenyi guangukuatesele diago. Ngabatijiwe mu avril 2005. Gungima, aphangi anguhanele formasio ha gutshita gu mikanda nu gu sonorizasio mu Inzo ya Ufumu.

Uvi, ndaga ya gikenene idi egi, mu 2007 tata wami wafile mu aksida a masuwa azonda. Ndaga yene yahanele diago enya fami yetu gikenene. Phangi Granville watshitshile gisambu hamoshi nu esue, watutangele nji verse ha gutuhana gikhesa. Ivo mbadi gungima, ndaga iko ya gikenene yatubuidile luko; phangi Granville wafile gu aksida a masuwa azonda.

Hungu dietu diakhalele diazonda. Diasalele ngenyi nga mukulu mumoshi ndo phamba mukuateshi mumoshi wa mudimo. Gufua gua phangi Granville guanguhanele gikenene giavula handaga wakhalele futa diami diakola. Wakhalele gungukuatesa ha gusuena hehi nu Yehowa nu ha gutagenesa nzala jia ima iko ngakhalele nayo funu. Mu gudibungisa gualanduile gungima dia gufua guenji, angutombele ha gutanga Inzo Yaleha ya Mutaledi. Ngatangele (ngabalele) phamba paragrafe mbadi, uvi ngasendesele gudila nu masoji gu meso. Ngakatugile gu estrade.

Ngadivuile muabonga tangua aphangi a mu hungu diko akhalele muza gutukuatesa gu Orealla. Luko, Betele yatumine pionye spesiale mumoshi, jina dienji Kojo. Ndaga ya gusuanguluga idi egi, mama wami nu galengele gami wa yala alongugile Biblia, gungima abatijiwe. Mu mars 2015, ngabuile mukuateshi wa mudimo. Gungima, ngakalegele diskur diami dia thomo. Mu lusugu luene ngamuemuetele, uvi ngadidile tangua ngawungulugile mbimbi jianguwambelele phangi Granville egi: “Gudi nu lusugu mbawumutshita diskur. Idi yadiago mbawumutshita diskur.”

JW Télédiffusion^® yangukuatesele ha gujiya egi aphangi ako a Matemue a Yehowa ana tagana nji nu ndaga jia luholo lumoshi nu ame. Ikhale ngenyi, ana tshita ndaga jiko, ana khala nu gusuanguluga mu monyo wawo. Ame nji ngudi naye gutshita ngenyi. Luholo ngakhalele nu nzala ya guhana ngolo jiami gudi Yehowa, ngabuile pionye. Mu septembre 2019 ngasuangulugile nu ndaga imoshi! Mu mbeji yene ngatombewe ha gubua mukulu mu hungu dietu diakhalele nu alongeshi 40.

Ngudi muhana mersi gudi aphangi a mala nu a akhetu angulongesele Biblia nu anyi angukuatesele ha gukombelela Yehowa. Ngudi muhana mersi avula gubalega gudi Yehowa, handaga gangujimbidilego nga hazonda.