Mi born lo 1983. Taem mi smol mi healthy nomoa olsem olketa nara pikinini, bat taem mi ten years old, mi start for feelim olketa pain lo body blo mi. Samting olsem tufala year bihaen, mi wekap lo wanfala morning bat mi no savve muvim leg blo mi. Leg blo mi no strong nao. Start from datfala day, mi no savve wakabaot. Datfala sik mekem mi for no savve grow. Kasem distaem, mi smol nomoa olsem wanfala pikinini.

Bihaen samfala month wea mi sik mi no savve lusim haos, tufala Jehovah’s Witness visit kam. Staka taem, taem olketa visitor kam mi savve haed, bat lo datfala day mi letem datfala woman for story. Taem olketa story abaotem paradaes, datwan mekem mi for tingim bak wanem mi herem taem mi faev years old. Lo datfala taem wanfala missionary wea nem blo hem Jethro wea hem stap lo Suriname, savve visitim vilij blo mifala wantaem insaed lo month and hem studyim Bible witim dadi blo mi. Jethro hem barava kaen lo mi. Mi laekem hem tumas. And tu, tufala grani blo mi savve tekem mi lo meeting blo olketa Witness, wea hem savve kamap lo vilij blo mifala. So taem Florence, wanfala lo olketa woman wea kam visitim mi lo datfala day hem ask sapos mi laek study, mi sei yes.

Florence hem kam bak witim hasband blo hem, Justus, and tufala start for studyim Bible witim mi. Taem tufala luksavve mi no savve hao for read, tufala helpem mi for lane for read. Bihaen samfala taem, mi savve read nao. Wanday datfala couple talem mi hao tufala kasem assignment for serve lo Suriname. Sorre nao, mi no garem eniwan lo Orealla wea savve gohed studyim Bible witim mi. Bat, gud samting nao, Jehovah hem no forgetim mi.

No longtaem bihaen wanfala pioneer wea nem blo hem Floyd hem muv kam lo Orealla, and hem kasem mi taem hem duim haos tu haos. Taem hem story abaotem wei for studyim Bible, mi smile. Hem askem mi, “Why nao iu smile?” Mi talem hem, mi studyim finis brochure Wanem Nao God Mas Kasem From Iumi? and mi start for studyim buk Savvy Wea Lead Go long Laef Olawe. * Mi explainim lo hem why mi stop for study. So Floyd hem gohed for study witim mi lo datfala Savvy buk, bat gogo hem tu kasem assignment for serve lo nara ples. So mi no garem moa eniwan for study witim mi.

 Gogo lo 2004, Granville and Joshua, tufala spesol pioneer, kam lo Orealla. Olketa preach from haos tu haos and olketa faendem mi. Taem olketa askem mi sapos mi laek for study, mi smile. Mi askem olketa for mifala startim bak moa Savvy buk. Mi laek for savve sapos wanem olketa teachim mi hem semsem witim wanem olketa Bible study conductor blo mi bifor teachim mi. Granville talem mi hao olketa meeting bae kamap lo vilij. Nomata mi no lusim haos for klosap tenfala year finis, mi laek for attend. So Granville kam tekem mi lo haos and putim mi lo wheelchair and pushim mi go lo Kingdom Hall.

Gogo, Granville encouragem mi for joinim Theocratic Ministry Skul. Hem sei: “Iu disable, bat iu savve toktok. Wanday, iu bae givim wanfala pablik tok. Bae iu duim datwan.” Disfala toktok hem barava encouragem mi for no fraet.

Mi start for share lo preaching waka witim Granville. Bat, staka lo olketa road lo vilij hem nogud tumas and hem no fitim wheelchair. So mi askem Granville for putim mi lo wanfala wheelbarrow and pushim mi raon. Datfala arrangement barava waka gud. Lo April 2005, mi baptaes. No longtaem bihaen, olketa brata trainim mi for lukaftarem kongregeson literature and saond lo Kingdom Hall.

Then lo 2007, wanfala sorre samting hem happen, dadi blo mi dae lo wanfala boat accident. Famili blo mi barava seke fogud. Granville prea witim mifala and storyim olketa scripture lo Bible for comfortim mifala. Tufala year bihaen, mifala seke lo nara nogud samting moa, Granville tu dae lo wanfala boat accident.

Evriwan lo smol kongregeson blo mifala sorre tumas. Mifala no garem nao eni elder and mifala garem wanfala ministerial servant nomoa. Mi barava sorre tumas bikos Granville hem barava gud fren blo mi. Hem evritaem faithful for helpem mi lo spiritual and lo physical saed. Lo firstfala meeting bihaen Granville hem dae, mi garem assignment for readim olketa paragraf lo Wastaoa Study. Mi duim tufala first paragraf, bat then mi start for krae, gogo mi mas go daon nao from platform.

Taem olketa brata from olketa nara kongregeson kam for helpem mifala lo Orealla, datwan mekem mi start for hapi moa. And tu, branch office sendem kam wanfala spesol pioneer wea nem blo hem Kojo. Mi hapi tumas taem mami blo mi and smol brata blo mi olketa start for study and baptaes. Then, lo March 2015, mi kamap ministerial servant. Gogo, mi givim first pablik tok blo mi. Mi smile and mi krae taem mi ting go bak lo toktok wea Granville talem mi staka year bifor: “Wanday, iu bae givim wanfala pablik tok. Bae iu duim datwan.”

Olketa JW Broadcasting^® program helpem mi for savve hao samfala brata and sista olketa kasem tu sem kaen situation olsem mi. Bat nomata olketa disable, olketa duim staka samting, and olketa hapi. So mi savve duim sem samting tu. Wei wea mi laek for givim lo Jehovah wanem mi fit for duim hem muvim mi for regular pioneer. And lo September 2019, mi kasem wanfala nius wea mi no expectim! Lo datfala month, olketa appointim mi for serve olsem wanfala elder lo kongregeson blo mifala wea garem samting olsem 40 pablisa.

Mi thankiu lo olketa brata and sista wea study witim mi and helpem mi for duim ministry blo mi. Winim evri nara samting, mi barava hapi hao Jehovah hem no forgetim mi.