1983 watapin nacerani. Wawa kaspaqa allillanmi kasharani, ichaqa 10 wataypi kashaspan cuerpoy nishuta nanayta qallariwaran. Iskay wata qhepamanmi juj tutamanta rijch’arispa mana kuyuriyta atiranichu. Kallpachakuraniña chakiykunata kuyurichinaypaq chaypas manan atiranichu. Chay p’unchaymantapachan mana puripunichu. Chay onqoyniyraykun mana wiñapuranichu. Chaymi juj erqeq sayaynillan kani.

Askha killakunañan wasillaypi kasharani, chayllamanmi Jehová Diospa testigonkuna iskay señorakuna visitamuwaranku. Pipas jamuqtinqa pakakuqmi kani, chay p’unchaymi ichaqa uyarikurani. Paraisomanta willawaqtinkun yuyarirani pisqa watayoq kashaqtiy, Jethro sutiyoq misionero Surinam nacionmanta killapi juj kuti jamusqanta; payqa Bibliamantan yachachiq papayta. Jethrowanqa rimallaqmi kayku, sumaqllan noqawanqa kaq. Chaymantapas, mayninpin abueloykuna juñunakuykunaman apawaqku. Chaymi chay kutipi Florence sutiyoq hermana, Bibliamanta yachachiwananpaq tapuwaqtin “arí” nirani.

Florence hermanaqa Justus sutiyoq qosanwanmi kutimuranku, Bibliamanta yachachiwanankupaq. Mana leey atisqayta reparaspan paykunaqa yachachiwaranku leeyta. Tiempowanqa yacharaniñan leeyta. Ichaqa juj p’unchaymi niwaranku Surinam nacionman Diosmanta willaq ripunankuta. Manan pipas kapuranchu Bibliamanta yachachiwananpaq. Chaywanpas kusisqan kasharani Jehová Diospa mana qonqawasqanmanta.

Chayllamanmi Orealla llaqtaman Floyd sutiyoq precursor chayamuran. Diosmanta willaspa purisqanpin chayamuran. Bibliamanta yachachiwananpaq tapuwaqtinmi, asirikurani. Chaymi tapuwaran: “¿Imaraykun asikunki?”, nispa, jinan willarani ¿Imatan Dios munan ñoqanchismanta? nisqa qelqata estudiay tukusqayta, El conocimiento que lleva a vida eterna nisqa qelqatapas qallarisqayta. * Chaymantapas willaranin imarayku manaña estudiashasqayta. Chaymi Floyd iñiqmasiwan Conocimiento librota estudiayta tukurani, ichaqa paytapas juj ladomanmi apachipuranku. Chaymi mana pipas yachachiqniy kapuranchu.

 Ichaqa 2004 watapin Orealla llaqtaman chayamuranku Granville, Joshua sutiyoq iñiqmasipiwan, paykunaqa precursor especialmi karanku. Paykunapas Diosmanta willasqankupi purispan tariwaranku. Bibliamanta yachanaypaq tapuwaqtinkun, asirikuspa Conocimiento librota jujmanta yachachiwanankupaq nirani. Reparaytan munarani ñaupaq yachachiqniykuna jinachus yachachiwanqaku icha manachus chayta. Granville iñiqmasiqa willawaranmi juñunakuykuna llaqtaypi aparikushasqanta. Chunka watañan mana wasiymanta lloqsiranichu chaypas, munaranin riyta. Chaymi Granville iñiqmasiqa jamuspa juñunakuna wasiman apawaran silla de ruedas nisqapi.

Tiempomantan Granville iñiqmasiqa kallpachawaran Allin Yachachiq Kanapaq Escuelapi kanaypaq. Niwaranmi: “Manaña puriyta atinkichu chaypas, atinkin rimaytaqa. Juj p’unchaymi iñiq t’aqapi yachachimunki, rikullankin”, nispa. Chay nisqanmi anchata kallpachawaran yanapawaran ima.

Paywanmi Diosmanta willaq lloqsiyta qallarirani, ichaqa llaqtaypi ñankunaqa manan silla de ruedaspi purinaypaq jinachu karan. Chaymi aswanpas carretillapi tanqaway nirani, allinmi chayqa karan. 2005 wata abril killapin Bautizakapurani. Pisi tiempollamantan yachachiwaranku iñiq t’aqapi qelqakunata rakispa yanapakunaypaq takikunata churanaypaqpas.

2007 watapin papay wañukapuran barcopi purishaspa juj accidentepi. Familiayqa llakikuypin tarikapuran. Granville iñiqmasin Diosmanta mañapuwaranku Bibliawan ima kallpachawaranku. Iskay wata qhepallamanmi Granville iñiqmasipas juj accidentepi, barcopi purishaspa wañullarantaq.

Juch’uy iñiq t’aqaykuqa sinchi llakikuypin tarikapuran, manan umalliqniyku kapuranchu, juj yanapakuq kamachillañan qhepakapuran. Granville wañusqanqa sinchi sonqo nanaymi noqapaqqa karan, payqa amigoymi karan, yanapawaranmi ima necesitasqaypi, iñiyniypipas. Wañusqan qhepallamanmi Qhawaq qelqata leenay karan. Iskay parrafota leeshaspan manaña atispa, waqayta qallarirani. Chayraykun chay p’unchayqa mana leeraniñachu.

Allinñan sientekurani juj iñiq t’aqamanta hermanokuna yanapaq jamuqtinku. Chaymantapas sucursalmi apachimuran Kojo sutiyoq precursor iñiqmasita. Kusikuranin mamay sullk’a wayqeypas Bibliamanta yachaspa bautizakuqtinku. 2015 wata marzo killapin yanapakuq kamachi kapurani. Tiempowanmi iñiq t’aqapi yachachirani. Chaypin kusikuywan waqasparaq yuyarirani Granville iñiqmasi niwasqanta, paymi niwaran: “Juj p’unchaymi iñiq t’aqapi yachachimunki, rikullankin”, nispa.

JW Canal^® nisqapin rikurani noqa jina tarikuq iñiqmasikunata. Sasaña paykunapaq onqoyniyoq kasqankurayku chaypas, paykunaqa Diosta servispan kusisqa kashanku. Paykuna jinan noqapas imaymanata ruwayta atini. Jehová Diospaq tukuy atisqayta ruwayta munaspan precursor regular kapurani. Anchatan kusikurani 2019 wata setiembre killapi iñiq t’aqaypi umalliq kapusqaymanta, chaypiqa tawa chunkan juñukuyku.

Agradecesqan kashani Diosmanta yachachiwaqniy iñiqmasikunata, Jehová Diosta servinaypaq yanapawasqankumanta ima. Astawanqa Jehová Diostan gracias nini, payqa manan qonqawaranchu.