Kua anauia au i te 1983. Te mataiti mua o toku oraanga, e meitaki toku oraanga i te tamariki anga, inara i te tai ngauru mataiti anga au, kua akamata te au mamae i roto i toku kopapa. E rua mataiti i muri mai, kua ara mai au i tetai popongi e kare e rauka iaku i te neke aere. Noatu eaa taku tauta anga i te akaneke i toku vaevae, kare e maroiroi i roto. Mei te reira rā mai, kare e rauka iaku i te aaere. No toku maki, kua akamutu toku kopapa i te tupu. I teia rā, te vai nei rai au mei te tamariki.

E noo ana au i te kainga no tetai au marama, te atoro mai anga te Au Kite o Iehova iaku. Me aere mai te au manuiri, ka pipini au, inara i tera mai rā, kua akaruke ua au i te nga vaine kia tuatua mai. Ia raua e tuatua ra i te Parataito, kua maara iaku i taku i akarongo ana i toku rima mataiti anga. I te reira tuatau, kua tae mai tetai mitinari ko Jethro te ingoa, tei noo ana i Suriname tei atoro mai i to matou oire i te okotai marama e kua apii i te Pipiria ki toku papa. Kua takinga meitaki tikai a Jethro iaku. E reka ana au iaia. Pera katoa, e apai ana toku nga ruau iaku ki te au uipaanga a te Au Kite, tei raveia i roto i to matou oire. Te ui anga mai a Florence kiaku, te vaine tei atoro mai iaku i te reira rā, me ka inangaro au i te apii maata atu, karanga atu au, ae.

Kua oki mai a Florence e tana tane ko Justus, e kua rave kapiti raua i te apii i te Pipiria kiaku. Te kite anga raua e kare au e kite i te tatau, kua tauturu mai raua iaku i te tatau. I muri roa mai, kua tatau au ko au anake. I tetai rā, kua akakite mai te nga tokorua e kua tukuia raua kia tavini i Suriname. Te mea maromaroa ra, kare e tangata i Orealla ei rave i taku apii Pipiria. Inara, mataora au e kua maara mai a Iehova iaku.

I muri mai, kua tae mai tetai painia ko Floyd ki Orealla, e kua aravei mai aia iaku i tona tutu aere anga mei tera are ki tera are. I tona tuatua mai anga kiaku no te apii i te Pipiria, kua katakata ua au. “Eaa koe i katakata ua ai?” i karanga ai aia. Akakite au kiaia e kua apii ana au i te poroutia Eaa ta te Atua e Umuumu Maira ia Tatou? e kua akamata maua i te apii i te puka Te Kite te ka Arataki ki te Ora Mutu Kore. * Kua akamārama au e eaa te apii i akamutu ei. Kua apii mai a Floyd i te puka Te Kite kiaku, inara kua tukunaia aia kia tavini ki tetai ngai ke. Kare oku puapii Pipiria akaou.

 Inara, i te 2004, kua tukunaia mai tetai nga painia takake ko Granville e Joshua ki Orealla. Kua tutu aere raua mei tera are ki tera are, kua kite mai raua iaku. Te ui mai anga raua me ka inangaro au i te apii, kua katakata ua au. Kua pati au kia raua kia apii mai i te puka Te Kite mei te akamata anga. Kua inangaro au i te kite me ka rauka ia raua i te apii mai iaku i taua apii rai, mei toku au puapii i mua ana. Akakite a Granville e ka raveia te uipaanga i roto i te oire. Kia akamanako au, kare au i akaruke ana i toku kainga no te tai ngauru mataiti, kua inangaro au i te aere. No reira kua aere mai a Granville i te tiki iaku e kua tuku iaku ki roto i te pereoo e kua opara iaku ki te Are Uipaanga Patireia.

I te reira tuatau, kua akamaroiroi a Granville iaku kia piri ki te Apii Orometua Teokaratiki. Karanga aia: “E pirikoki koe, inara ka rauka ia koe i te tuatua. A tetai rā, ka oronga koe i tetai akoanga ki te katoatoa. Ka tupu rai te reira.” Kua akamaroiroi mai tana tuatua iaku.

Kua piri atu au kia Granville no te angaanga tutu aere. Inara, e maata te mataara vaaruarua i roto i te oire no te pereoo. No reira, kua pati au kia Granville kia tuku iaku ki roto i te uirapa e kia opara iaku. Kua angaanga teia no maua. Ia Aperira 2005, kua papetitoia au. Kare i roa i muri mai, kua tereni te au taeake iaku kia akono i te au puka Pipiria a te putuputuanga e te au apinga akatangi i ko i te Are Uipaanga Patireia.

Te mea maromaroa ra, i te mataiti 2007 kua mate toku papa i roto i tetai tumatetenga poti. Poitirere tikai toku pamiri no teia i tupu. Kua pure a Granville no matou e kua oronga mai i te karere akapumaana mei te Pipiria. E rua mataiti i muri mai, kua takake atu a Granville—i roto i tetai tumatetenga poti.

Ma te mii, kare o ta matou putuputuanga meangiti tangata pakari, okotai rai tavini tauturu. Kua tupu te mamae te mate anga a Granville; e taeake piri mou tikai aia kia matou. E tauturu tiratiratu ana aia e te akono ia matou i te pae vaerua e te pae kopapa. I ko i te uipaanga i muri ake i tona mate anga, kua orongaia mai kiaku kia tatau i te au parakarapa no te Apii Punanga Tiaki. Kua tatau au i te nga parakarapa mua, e oti kua akamata au i te aue ma te taʼe ua toku roimata. Kua eke mai au mei mua mai i te paata.

Kua akamaroiroi mai te au taeake iaku mei tetai putuputuanga i Orealla. Pera katoa, kua tuku mai te opati Betela ia Kojo, e painia takake. I toku mataora, kua apii toku mama e toku teina e kua papetitoia. Ia Mati 2015, kua ikiia au ei tavini tauturu. I muri ake i tetai tuatau, kua oronga au i taku akoanga mua. I tera rā, kua oki toku manako i te akamaara ma te katakata e te aue no te au mea meitaki ta Granville i akakite mai kiaku i mua atu ana: “A tetai rā, ka oronga koe i tetai akoanga ki te katoatoa. Ka tupu te reira.”

Na roto i te au porokaramu JW Broadcasting^®, kua apii au no runga i te au taeake Au Kite tei aiteite te turanga mei toku rai. Inara noatu to ratou pirikoki, kua rauka te oraanga mataora. Te rave nei rai au i teia. Kua riro toku anoano i te oronga i toku maroiroi kia Iehova ei akakeu iaku kia painia tamou. Mei teaa atura te mataora i tetai nuti meitaki taku i kite ia Tepetema 2019! I te reira marama, kua ikiia au kia tavini ei tangata pakari i roto i ta matou putuputuanga e 40 papuritia.

Te akameitaki nei au i te au taeake e te au tuaine tei apii iaku e te tauturu iaku i te tutu aere. Tei maata rava atu, te akameitaki nei au ia Iehova no tei maara mai iaku.