Bijandiljum ko 1983. berš. Prva nekobor berša, živinđum sar sa avera ćhave. Ama, ked pherđum deš berš, kotar jekhvar počminđum te osetinav bare dukha ko celo mo telo. Oko duj berš palo odova, jekh sabalje ked mangljum te uštav, naštinđum te pomerinav man. Kobor god trudinđum man te pomerinav me pre, naštinđum te pomerinav len. Kotar odova dive, više naštinđum te phirav. Sebepi mo nabormipe, naštinđum više ni te barjovav. Odolese, avdije hijum ućo kobor hem jekh tikno ćhavo.

Nekobor masek palo odova so naborsaljum hem so sebepi odova više naštinđum te ikljovav ando ćher, duj e Jehovase svedokija alje koro mande. Ked bi neko avela koro mande, me bi garavava man, ama odova dive vaćerđum odole duje romnjencar. Ði on vaćerđe ando raj, me setinđum man so odova šunđum ked hine man oko panđ berš. Ko odova vreme, o misionari kova vićini pe Džetro, kova živinđa ko Surinam, avela bi jekh puti ko masek ko amaro gav hem proučini bi i Biblija me dadeja. O Džetro hine but šukar premalo mande hem me but mangljum le. Isto ađahar, mi baba hem mo papo disavo puti legarđe man ko sastankija ando e Jehovase svedokija, kola ićerđe pe ko amaro gav. Odolese ked jekh ando odola romnja, i Florens, odova dive pućlja man da li mangava te đanav pobuter, phenđum so mangava.

I Florens palem alji pe romeja, e Džastaseja hem počminđe te proučinen i Biblija mancar. Ked haljilje so na đanava te čitinav, on pomožinđe man te sikljovav. Palo disavo vreme, sikljiljum te čitinav. Jekh dive, odova par phenđa maje so dobinđa te služini ko Surinam. Nažalost, ki Oriala na hine niko ko bi šaj te proučini mancar. Ama, bahtalo hijum so o Jehova na bisterđa man.

Sigate palo odova, o pioniri kova vićini pe Flojd, alo ki Oriala hem arakhlja man đi propovedinđa kotar koliba ki koliba. Ked pućlja man da li mangava te proučinav, me počminđum te asav. „Sose asaja?“, pućlja man. Phenđum lese so me već proučinđum i brošura Šta Bog zahteva od nas? hem so počminđum te proučinav i knjiga Spoznanje koje vodi do večnog života. * Isto ađahar, vaćerđum lese sose više na proučinava. O Flojd završinđa mancar i knjiga Spoznanje, ama palo odova hem ov dobinđa te đal ko aver than. Palem na hine ko te proučini mancar.

 Ama, ko 2004. berš, o Granvil hem o o Džošua, duj specijalna pionirija hine bićhalde te služinen ko Oriala. Ði propovedinđe, on arakhlje man. Ked pućlje man da li mangava te proučinav, me počminđum te asav. Pućljum len te proučinen mancar i knjiga Spoznanje kotar početka. Mangljum te dikhav da li on ka sikaven man ista buća kola me učiteljija sikavđe man angleder. O Granvil phenđa maje so ko mo gav ićerena pe o sastankija. Iako skoro deš berš na ikljiljum kotar ćher, ipak mangljum te đav ko sastankija. Odolese o Granvil alo palo mande, ćhivđa man ki invalidska kolica hem gurinđa man đi ki dvorana.

Palo odova, o Granvil podstakninđa man te upisinav man ki Teokratsko škola. Ov phenđa: „Tu našti te phire, ama šaj te vaćere. Jekh dive tu ka ićere javno predavanje. Ka dikhe, odova ćaće ka ovel.“ Olese ohrabrujuća lafija dinđe man phaka.

Počminđum te đav ki služba e Granvileja. Ama, o drumija ko gav hine neravna asi invalidsko kolica. Odolese pućljum e Granvile te ćhivel man ki građevinsko kolica hem ađahar te vozini man. Odova hine but praktično. Ko april, 2005. berš, krstinđum man. Sigate palo odova, o phralja sikavđe man te brininav man asi literatura hem te ćerav ko ozvučenje ki dvorana.

Nažalost, ko 2007. berš, mo dad doživinđa nesreća ko čamco hem palo odova mulo. Amari porodica hine but tužno. O Granvil molinđa pe amencar hem čitinđa amenđe nekobor utešna stihija andi Biblija. Duj berš palo odova, hine amen pana jekh tragedija, hem o Granvil doživinđa nesreća ko čamco hem mulo.

Amari tikni skupština koja hine la bari dukh, aćhilji bizo starešine. Aćhilo amenđe samo jekh sluga pomoćnik. Osetinđum bari dukh ked o Granvil mulo sose hine mo najšukar amal. Ov uvek dinđa sa pestar te brinini pe ando me duhovna hem fizička potrebe. Ko prvo sastanko, palo odova so o Granvil mulo, valjanđum te čitinav o članko ko sastanko Proučibe andi Stražarsko kula. Čitinđum prva duj odlomkija, a palo odova počminđum odobor te rovav so naštinđum te kontrolišinav man hem odolese morandiljum te huljav kotar i bina.

Hine maje pošukar ked o phralja andi aver skupština alje ki Oriala te pomožinen amen. Isto ađahar, i podružnica bićhalđa jekhe specijalno pionire kova vićinđa pe Kodžo. But hijum le bahtalo ked mi daj hem mo tikno phral počminđe te proučinen hem ked krstinđe pe. Palo odova, ko mart 2015. berš, hijum le naimenujimo sar sluga pomoćnik. Palo disavo vreme, ićerđum mo prvo javno predavanje. Odova dive, hem asandiljum hem runđum ked razmislinđum ando e Granvilese lafija kola phenđa maje beršencar angleder: „Jekh dive tu ka ićere javno predavanje. Ka dikhe, odova ćaće ka ovel.“

Ko amare masekose emisije, dikhljum so hem avera Svedokija tane ki slično situacija sar me. Iako tane naborme, on ipak pana šaj te ćeren but buća hem bahtale tane. Hem me pana šaj te ćerav but buća. Mangljum te dav e Jehovase sa so šaj, odolese uljum stalno pioniri. Ko septembar 2019. berš, iznenadinđum man ked šunđum so hijum naimenujimo te služinav sar starešina ki amari skupština kuri isi oko 40 objaviteljija.

But hijum zahvalno e phralenđe hem e phenjenđe kola proučinđe mancar hem kola pomožinđe man te služinav e Jehovase. Soj tano pana považno, hijum but zahvalno e Jehovase sose niked na bisterđa man.