Μπιάντιλομ κο 1983. Κι αρχή τθεράβας λατσσί υγεία, αλλά κάνα ισινόμας ντεσέ μπρεσένγκο, σαρό μο σώμας αρχισάλο τι ντουκχάλ-μαν μπουτ. Ντούι μπρεσά πιο σοράν οντουλέ ντουκχάταρ, τζανγκάντιλομ εκ ντιβές ντα ναστί κουνιαβάβας-μαν. Προσπαθιντόμ τι κουνιαβάβ μο τσανγκά, αλλά ναστί. Οντουλέ ντιβεσέσταρ, να πφιρντόμ ατζέκ φαρ. Επίσης, ιτιρί μι νασφαλιμάσταρ, μο σώμας τσσιναντάς τι μπαριόλ. Αντιβές, τθεράβα ο σώμας εκχέ χουρντέ μαξιμίσκο.

Χάνικ μασεκά αφού νασφάλιλομ ντα ισινόμας πφαντό αντρέ κο κχερ, αβιλέ ντούι τζουβλιά σο ισινέ Μάρτυρες ι Ιεχωβάσκε. Κάνα αβένας μισαφίρια, ο πιο μπουτ φαρ γκεραβάβας-μαν, αλλά οντουβά ντιβές μπεσλόμ ντα ασουντόμ οντουλέ τζουβλίν. Καζόμ κερένας λάφι ι ζωγιάκε κο Παράδεισος, αβιλέ μι γκοντιάτε ο λάφια σο ασουντόμας κάνα ισινόμας περίπου παντζέ μπρεσένγκο. Αζομάν, εκ ιεραπόστολος σο βακερένας λέσκε Τζέθρο ντα μπεσέλας κο Σουρινάμ, αβέλας αμαρέ γκαβέστε εκ φαρ κο μάσεκ ντα κερέλας μελέτη μι νταντές. Ο Τζέθρο ισινέ μπουτ λατσσό μάντζαρ. Μανγκάβας-λες μπουτ. Επίσης, μο πάππους ντα μι μπάμπα μπάζιμα λένας-μαν πουμέντζαρ κο συναθροίσεις σο κερένας ο Μάρτυρες αμαρέ γκαβέστε. Οτθάρ, κάνα η Φλόρενς, εκ οντουλέ τζουβλίνταρ, πουτσλάς-μαν άμα μανγκάβας τι σικλιάβ πιο μπουτ, βακερντόμ «βα».

Η Φλόρενς αβιλί πι ρομέσαρ, με τον Τζάστις, ντα αρχισάλε τι κερέν-μαν μελέτη κατά Γραφή. Κάνα ντικχλέ ότι να αγαβάβας τι διαβάναβ, βοηθιντέ-μαν τι σικλιάβ. Σοράν από χάνικ καιρός, διαβάναβας κορκορό. Εκ ντιβές, βακερντέ μάνγκε ότι μπουτσσαντέας-λεν τι υπηρετίνεν κο Σουρινάμ. Δυστυχώς, να ισινέ καέκ γιαβέρ κι Ορεάλα για τι κερέλ-μαν μελέτη. Όμως, ο Ιεχωβά ποτές να μπισταρντάς-μαν.

Πριν τι νακχέλ μπουτ βακίτι, εκ σκαπανέας σο βακερένας λέσκε Φλόιντ αβιλό κι Ορεάλα, ντα αρακχλάς-μαν καζόμ κερέλας έργος καλύβα καλυβάτε. Κάνα βακερντάς μάνγκε τι κεράβ μελέτη, ασάντιλομ. «Σόσκε ασάσα;» πουτσλάς-μαν. Βακερντόμ λέσκε ότι κερντόμας μελέτη κατά βιβλιάριος Τι Απαιτεί ο Θεός από Εμάς; ντα γκιλόμας κο βιβλίος Γνώση Που Οδηγεί στην Αιώνια Ζωή. * Βακερντόμ λέσκε σόσκε τσσιναντόμας ι μελέτη. Ο Φλόιντ βοηθιντάς-μαν τι τελειώναβ ο βιβλίος Γνώση, αλλά αζομάν βοβ-ντα μπουτσσάντιλο για τι υπηρετίνελ γιαβερτθέ. Πάλι να τθεράβας καεκχές τι κερέλ-μαν μελέτη.

Όμως, κο 2004, ο Γκράνβιλ ντα ο Τζόσουα, ντούι ειδικοί σκαπανείς, μπουτσσάντιλε για τι  υπηρετίνεν κι Ορεάλα. Κερένας έργος καλύβα καλυβάτε, ντα αρακχλέ-μαν. Κάνα πουτσλέ-μαν άμα μανγκάβας τι κεράβ μελέτη, ασάντιλομ. Μανγκλόμ λένταρ τι κεράβ μελέτη πάλι σαρό ο βιβλίος Γνώση. Μανγκάβας τι ντικχάβ άμα κα σικλιαρένας-μαν ο ίδια πράγματα σο σικλιαρένας-μαν ο πφραλά σο κερένας-μαν μελέτη πιο τζανγκλέ. Ο Γκράνβιλ βακερντάς μάνγκε ότι αβένας-πες συναθροίσεις κο γκαβ σο μπεσάβας. Παρόλο σο τθεράβας τι νικιάβ περίπου ντες μπρεσά μι κχερέσταρ, μανγκάβας τι τζαβ. Οντουλέσκε, ο Γκράνβιλ αβιλό μι κχερέστε, τσσουντάς-μαν εκχέ ανηπηρικέ καροτσίστε ντα γκερντάς-μαν κι Αίθουσα Βασιλείας.

Σοράν, ο Γκράνβιλ βακερντάς μάνγκε ότι κα μπορίναβας τι κεράβ ομιλίες κι Σχολή Θεοκρατικής Διακονίας. Βακερντάς μάνγκε: «Ναστί πφιρέσα, όμως μπορίνεσα τι κερές λάφι. Κα ντικχές ότι κα αβέλ ο ντιβές σο κα κερές δημόσια ομιλία!» Λέσκε λάφια ντινέ-μαν μπουτ ζορ ντα βοηθιντέ-μαν τι νταβ μπέσα μι νεαυτόστε.

Αρχισάλομ τι κεράβ έργος με τον Γκράνβιλ. Όμως, μπουτ ντρομά κο γκαβ ισινέ μπουτ μπέτι ντα ναστί νακχέλας ο αναπηρικός καρότσι. Οντουλέσκε, βακερντόμ κο Γκράνβιλ τι τσσουβέλ-μαν σε εκ καρότσι οικοδομής για τι ταρτίνελ-μαν. Ανταβά βοηθιντάς μπουτ. Κο Απρίλιος 2005, μπολντιλόμ. Σοράν ανταλέσταρ, ο πφραλά σικλιαρντέ-μαν τι κεράβ μπουτί κο έντυπα κι κχανγκιριάκε ντα τι βοηθίναβ κο ηχητικά κι Αίθουσα Βασιλείας.

Κο 2007, μο ντατ πελό κατά βάρκα ντα μουλό. Ισινέ κάτι σο να μπεκλεντίναας τι αβέλ-πες αμαρέ φαμιλιάκε. Ο Γκράνβιλ κερέλας προσευχή αμέντζαρ ντα διαβάνελας εδάφια σο κοβλιαρένας αμαρί ντουκχ. Ντούι μπρεσά πιο σοράν, πφαμπιλό αμαρό γκι κάνα αβιλό-πες πάλι κάτι ασακό​—η βάρκα σο τθερέλας ο Γκράνβιλ βουλιαξάλι ντα βοβ τασάντιλο.

Πφαμπιλό ο γκι σαρέ ι πφραλένγκο αμαρέ χουρντέ κχανγκιριάτε. Ντα ακανά να τθεράας πρεσβυτερόν, αλλά σάντε εκχέ διακονικέ υπηρετής. Ντουκχασάλομ μπουτ κάνα μουλό ο Γκράνβιλ σόσκε ισινέ εκ μπουτ λατσσό αμάλ. Πάντα βοηθίνελας-μαν τι αβάβ πιο λατσσό αμάλ ι Ιεχωβάσαρ ντα τι κεράβ γιαβερά-ντα πράγματα σο μανγκάβας. Κι συνάθροιση σο τθεράας σοράν λέσκε μεριμάσταρ, τθεράβας ο διάβασμας ι Σκοπιάκο. Διαβαντόμ σάντε ντούι παράγραφοι, ντα σοράν αρχισάλομ τι ροβάβ ντα ναστί ατσσικιαράβας μο δάκρυα. Γουλίστιλομ κατά βήμας.

Αρχισάλομ τι νιωθίναβ πιο λατσσές κάνα πφραλά εκχέ γιαβερέ κχανγκιριάταρ αβιλέ κι Ορεάλα για τι βοηθίνεν-αμέν. Επίσης, ο γραφείος τμήματος μπουτσσαντάς τον Κότζο, εκχέ ειδικέ σκαπανεάς. Χαιρισάλομ μπουτ κάνα μι ντάι ντα μο πιο χουρντό πφραλ αρχισάλε τι κερέν μελέτη ντα μπολντιλέ. Σοράν, κο Μάρτιος 2015, αβιλόμ διακονικός υπηρέτης. Πιο σοράν, κερντόμ πρώτη φαρ δημόσια ομιλία. Οντουβά ντιβές, ροντόμ κατά χαρά κάνα αντόμ μι γκοντιάτε ο λάφια σο βακερντάας μάνγκε ο Γκράνβιλ χάνικ μπρεσά πιο τζανγκλέ: «Κα ντικχές ότι κα αβέλ ο ντιβές σο κα κερές δημόσια ομιλία!»

Κατά JW Broadcasting^®, ντικχλόμ παραδείγματα γιαβερέ-ντα Μαρτυρένγκε σο ισί σαρ μάντε. Παρόλο σο ισί νασφαλέ, κερένα μπουτ πράγματα ντα ισί χαρούμενοι. Με-ντα μπορίναβα ατζέκ ατζέκ τι κεράβ μερικά πράγματα. Μανγκάβας τι νταβ κο Ιεχωβά ο πιο λατσσό. Οντουλέσκε αβιλόμ τακτικός σκαπανέας. Κο Σεπτέμβριος 2019 βακερντέ μάνγκε κάτι σο να μπεκλεντίναβας! Οντουβά μάσεκ σικλιλόμ ότι κα υπηρετίναβας σαρ πρεσβύτερος αμαρέ κχανγκιριάτε σο τθερέλα περίπου 40 πφραλέν ντα πφενίν.

Ευχαριστίναβα ι πφραλέν ντα ι πφενίν σο κερντέ-μαν μελέτη ντα βοηθιντέ-μαν τι υπηρετίναβ ι Ιεχωβάς. Πιο μπουτ σαριλένταρ ευχαριστίναβα ι Ιεχωβάς σαρέ μι γκίσαρ σο να μπισταρντάς-μαν ποτές.