Ni belekiwe hi 1983. Nkama na ni li mutsrongo a ni ni lihanyu ledzrinene, kambe a nkama lowu ni pfaliki 10 wa malembe ni sungule ku twa mizri wanga na wu vavisa lakakuvoo. Kambe siku dzrin’wana na ku khalute malembe mabidzri, loko ni dzringise ku pfuka ni mixo, a ni hluleka ku ndzruluka. Nambi loko ni dzringisa hi ntamu hinkwawu ku tlakula milenge yanga a ni nga swi koti. A ni nge na ntamu wa ku ndzruluka. Ku sukela ka siku ledzro a na ha swi kotanga ku famba. Mavabyi yanga ma tlhele ma yentxa leswaku mizri wanga wu nga ha kuli. Ku ta tlhasa namunhla na ha ni mizri wutsrongoo ku fana ni xin’wanana.

Ntsrhaku ka tihweti ta kukazri na ni tsrhama kaya, ni yendzreliwe hi Timboni ta Yehovha tibidzri, loko vhanu va ni yendzrela a ni talisa ku tumbela kambe siku ledzro ni pfumeleli Timboni leto akuva ti bula na mine. Nkama lowu a va bula na mine hi Paradeyisi ni dzrimuki leswi ni samiki ni swi yingela mayelanu na dzrone na ni ni kolomu ka 5 wa malembe. A nkameni wolowo, a ku ni muzrumiwa mun’wana lweyi a a vitaniwa Jethro, lweyi a a tsrhama a Suriname. A a talisa ku yendzrela muganga wezru kan’we hi hweti nakone a a dondzra Bibele na tatana. Jethro a a ni khoma hi ndlela ya lizrandzru nakone a ni mu zrandzra ngopfu. Nakone vakokwana a va famba na mine a mintlhanganwini ya Timboni ta Yehovha, leyi a yi yentxiwa a mugangeni wezru. Loko Florence, ku nga mun’we wa vavasati lava va ni pfuxeliki siku ledzriyani a ni vutisile leswaku a ni djula ku dondzra leswi yengetelekiki, ni pfumelile.

Florence a tlhele a ni yendzrela ni nuna wakwe Justus, nakone va sungule ku dondzra na mine Bibele. Nkama lowu va xiyiki leswaku a ni nga swi koti ku dondzra va ni pfunile akuva ni kota ku dondzra. Hi ku famba ka nkama ni sungule ku tidondzrela ha wuswanga. Siku dzrin’wana, vatekani volavo va ni byele leswaku a va nyikiwe xiyavelo xa ku ya tizra a Suriname. Lexi vavisaka hi leswaku a Orealla a ku nge he na mhunu lweyi a a ta sala a ni dondzrela. Kambe lexi nyonxisaka hi leswaku Yehovha a nga ni dzrivalanga.

Ntsrhakunyana ka leswo, phayona dzra kukazri ledzri vitaniwaka Floyd dzri zruzrele a Orealla nakone a ni kume nkama lowu na a zrezra hi muti ni muti. Nkama lowu a ni vutisiki leswaku a ni swi djula ku dondzra Bibele, ni sungule ku hleka. A game a ni vutisa leswaku ni ‘hleka yini’. Ni mu byele leswaku ni same ni dondzreliwa hi ku tizrisa broxura ledzri liki I Yini Leswi Xikwembu Xi Swi Languteleke Eka Hina? ni leswaku a ni sungule ku dondzra buku ledzri liki Wutivi Lebyi Yisaka A Wuton’wini Lebyi Nga Heliki. * Ni mu tlhamuxelile leswaku ha yini ni yime ku dondzra. Floyd a sungulise ku dondzra na mine hi ku tizrisa buku ledzri liki Wutivi, kambe na yene a game a yaveliwa ku  ya tizra mbangu wumbeni. Ni tlhele ni sala ni nge na mhunu wa ku ni dondzrela.

Nambitanu, hi 2004 Granville na Joshua, lava a va li maphayona ya ku hlawuleka va yaveliwe ku ta tizra a Orealla. Vone va ni kumile na va zrezra hi muti ni muti. Loko va ni vutisile leswaku a ni swi djula ku dondzra, ni hlekile. Ni kombele leswaku va tlhela va ni dondzrela buku ledzri liki Wutivi. A ni djula ku vona leswaku leswi va taka ni dondzrela swone swa fana kumbe im-him ni leswi ni samiki ni swi dondzra. Granville a ni byele leswaku a ku ni mbangu lowu a va khoma ka wone mintlhanganu kolomuyani mugangeni. Nambi leswi a ni ngi ngi huma kaya ku sukela loko na ha ni kolomu ka 10 wa malembe, a ni swi djula ku famba ka mintlhanganu yoleyo. Xileswo, Granville a buyile a ta ni tlakula a ni beka ka xitsrhamu xa lava ku limala a va a famba na mine a Ndlwini ya Mfumu.

Hi ku famba ka nkama Granville a ni kutxe kuva ni titsralisa ka Xikole xa Wutizreli bya le Tilweni. Yene a te: “U limalile kambe wa swi kota ku vulavula. Siku dzrin’wana u ta beka wukaneli bya le livaleni. Swi ta yentxeka leswo.” Mazritu lawa ma ni tiyisile.

Ni sungule ku hlengemela a ntizrweni wa nsimu na Granville. Kambe tindlela tinyiki a mugangeni wezru a ti ni nsila nakone a swi kazrata ku khalutisa xitsrhamu xa lava ku limala. Xileswo, ni kombele Granville kuva a ni txhova hi karinya. Lulamiselo ledzro dzri ve dzrinene. Ni babatisiwe hi Abrili wa 2005. Ntsrakunyana ka leswo, vamakwezru va ni dondzrisi ku bekisa mabuku ya bandla ni switizro swa mpfumawulo a Ndlwini ya Mfumu.

Lexi vavisaka, hi 2007 ni ve ni khombo dzra ku feliwa hi tatana ka mhangu leyi humeleliki na va yendzra hi boti. Ndangu wezru wu vaviseke ngopfu swinene. Granville a khongote na hine a tlhela a hi komba tindzrimana ta Bibele leti hi tiyisiki. Ntsrhaku ka malembe mabidzri, hi weliwe hi khombo dzrin’wana, Granville na yene a file ka mhangu leyi humeleliki na va yendzra hi boti.

Bandla dzrezru ledzri a dzri li dzritsrongo ni ledzri khumbekiki ngopfu swinene, a dzri nge he na nkulu a ke sala nandzra wa wutizreli mun’we ntsena. Ni vaviseke ngopfu hi ku fa ka Granville. Yene a a li munghanu wanga wa ku zrandzreka. Minkama hinkwayu a ni pfune kuva ni tsrhindzrekela kusuhi na Yehovha nakone a a ni yentxela mintxhumu yinyingi leyi a ni yi vilela. Ka ntlhanganu lowu landzreliki ntsrhaku ka lifu dzrakwe ni nyikiwe xiyavelo xa ku dondzra mayava ka xidondzro xa Xihondzro Xa Ku Zrindzra. Ne kota ku dondzra mayava mabidzri ya ku sungula kambe ni sungula ku dzrila nakone minyembeti a yo tama yi xiririka, swi djule ni suka a plataforma.

Ni sungule ku twa na swi ni yampswela loko vamakwezru va bandla dzrin’wana va te va ta ta hi pfuna a Orealla. Nakone zrwavi dzri zrumela phayona dzra ku hlawuleka ledzri vitaniwaka Kojo. Lexi ni nyonxisaka, hi leswaku mamana ni makwezru lwentsrongo va sungule ku dondzra va tlhela va babatisiwa. Kutani ni yaveliwe ku tizra swanga nandzra wa wutizreli hi Marsu wa 2015. Hi ku famba ka nkama ni beki wukaneli bya le livaleni hi khambi dzra ku sungula. Hi siku ledzro ni dzrile hi ku nyonxa ni ku tlhangela. Ni dzrile hi leswi ni dzrimukiki leswi Granville a ni byeliki swone malembe ntsrhaku loko a te: “Siku dzrin’wana u ta beka wukaneli bya le livaleni. Swi ta yentxeka leswo.”

Ka minongonoko ya Wuhaxi bya JW ni dondzra hi vamakwezru lava nga ka swiyimu leswi fanaka ni swanga. Nambi leswi va nga ka xiyimu xa wulima ku fana na mine, va yentxa swinyingi nakone va ni wutomi lebyi nyonxisaka. Na mine ni nga swi kota ku yentxa mintxhumu ya kukazri. Ku navela kwanga ka ku yentxa leswi nga ntan’wini wanga a ntizweni wa Yehovha ku ni susumetele ku tizra swanga phayona dzra nkama hinkwawu. Nakone hi Setembru wa 2019 ni yamukele ndzrava ya ku nyonxisa leyi a ni nga yi yimelanga. Hi hweti leyo ni tivisiwe leswaku a ni ta tizra swanga nkulu ka bandla dzrezru ledzri a dzri ni kolomu ka 40 wa vazrezri.

Ni va tlhangela swinene vamakwezru va ku zrandzreka lava dondzriki na mine ni lava ni pfuniki akuva ni kota ku tizrela Yehovha. A henhla ka hinkwaswu ni mu tlangela swinene Yehovha hi leswi a kalaka a nga ni dzrivalanga.