Ndabalwa mu caka 1983. Ine ndikhadabalwa mwadidi, mbwenye pikhali ine na pyaka 10 ndatoma kubva kupha kakamwe manungo anga onsene. Pidapita pyaka piwiri, ine ndalamuka namacibese mbwenye nee ndikhakwanisa kufamba. Ine ndawangisira kakamwe toera ndifambe, mbwenye miyendo yanga nee ikhali na mphambvu. Kutomera ntsiku ineyi ine nee ndakwanisabve kufamba. Utenda unoyu wandicitisambo toera ndikhonde kukula. Mpaka lero ndisaoneka ninga mwanang’ono.

Pidapita miyezi mingasi ine nee ndakwanisabve kubuluka panyumba. Mbwenye akazi awiri akuti ndi Mboni za Yahova afika panyumba pathu. Ine ndikhali na nsambo wakubisala alendo angafika panyumba pathu, mbwenye ntsiku ineyi ine ndabuluka toera ndicedze na akazi anewa. Pikhalonga iwo thangwi ya Paraizu, pyenepi pyandikumbusa pinthu pidabva ine mu ndzidzi ukhali ine na pyaka 5. Mu ndzidzi unoyu, misionaryo unango akhacemerwa Jethro akakhala ku Suriname akhabwera mucisa cathu pa mwezi kabodzi toera kupfundza Bhibhlya na pai wanga. Jethro akhanditsalakana mwadidi kakamwe. Pontho ine ndikhakomerwa naye kakamwe. Kusiyapo pyenepi, ayavu anga akhandikwata mbitienda ku misonkhano ya Mboni za Yahova yakuti ikhacitwa mucisa cathu. Natenepa nkazi unango anacemerwa Florence andibvundza khala ndisafuna kupfundza pizinji, ine ndantawira ndisafuna.

Florence abwera na mamunace anacemerwa Justus mbatoma kundipfundzisa Bhibhlya. Pidaona iwo kuti ine nee ndikhakwanisa kuleri, iwo andiphedza toera ndileri. Mukupita kwa ndzidzi, ine ndatoma kuleri ndekhene. Ntsiku inango, banja ineyi yandipanga kuti iwo apangwa toera aende katumikira ku Suriname. Natenepa, ku Orealla nee kukhalibve na munthu toera kundipfundzisa Bhibhlya. Mbwenye mwakutsandzayisa, Yahova nee andiduwala.

Pidapita ndzidzi ungasi, mpainiya unango anacemerwa Floyd afika ku Orealla, pontho iye andigumana mu ndzidzi ukhamwaza iye mphangwa nyumba na nyumba. Pidandipanga iye kuti khala ndisafuna kupfundza Bhibhlya, ine ndatoma kuseka. Natenepa iye andibvundza: “Thangwi yanji ukuseka?” Ine ndampanga kuti ndamala kale kupfundza bhruxura ya nsolo wakuti Kodi Mulungu Asafunanji Kwa Ife? Pontho ndampanga kuti ndatoma kupfundza bukhu ya nsolo wakuti Conhecimento Que Conduz à Vida Eterna. * Kusiyapo pyenepi, ine ndanfokotozera mathangwi adandicitisa toera kulimira kupfundza Bhibhlya. Natenepa Floyd andiphedza mpaka kumala kupfundza bukhu ineyi, mbwenye iye aphembwa toera aende katumikira ku mbuto inango. Ndadzasowa pontho munthu wakundipfundzisa Bhibhlya.

 Mbwenye caka 2004, apainiya awiri akupambulika Granville na Joshua atumizwa toera kutumikira ku Orealla. Iwo andigumana mu ndzidzi ukhamwaza iwo mphangwa nyumba na nyumba. Pidandibvundza iwo khala ine ndisafuna kupfundza Bhibhlya, ine ndaseka. Natenepa ine ndaaphemba toera andipfundzise pontho bukhu ya Conhecimento. Thangwi ine ndikhafuna kuaona khala anandipfundzisa pinthu ninga pidandipfundzisa apfundzisi anga akutoma. Granville andipanga kuti misonkhano ikhacitwa mucisa cathu. Maseze papita pyaka 10 ine nee buluka panyumba, ine ndikhafuna kakamwe kuenda kumisonkhano. Natenepa Granville andikwata mbandiikha pa njinga ya anthu akulamala mbandikhuba mpaka ku Nyumba ya Umambo.

Mukupita kwa ndzidzi, Granville andiphemba toera ndicite khundu pa Xikola ya Utumiki wa Mulungu. Iye alonga: “Nakuti iwe nkhabe kwanisa kufamba, mbwenye usakwanisa kulonga. Pontho ntsogolo, iwe unadzacita nkhani yapakweca. Ine ndiri na cinyindiro cakuti iwe unadzacita pyenepi.” Mafala anewa andiwangisa kakamwe.

Ine ndatoma kumwaza mphangwa pabodzi na Granville. Mbwenye pikhali pyakunentsa kakamwe kufamba na njinga yanga, thangwi miseu ya mucisa cathu ikhali na madjenje kakamwe. Natenepa, ndaphemba Granville toera andiikhe mu karinya mbandikhuba toera kuenda mbuto zinango. Masasanyiro anewa akhali mwadidi kakamwe. Ine ndabatizwa mwezi wa Abril wa caka 2005. Buluka penepo, abale andipfundzisa toera kutsalakana mabukhu a mpingo na mitcini yakugaluza mafala mu Nyumba ya Umambo.

Mbwenye mwakutsukwalisa, mu caka ca 2007, pai wanga alobzweka na bharko mbafa. Ife tatsukwala kakamwe. Mbwenye Granville acita phembero pabodzi na ife, pontho atibalangaza mukuphatisira malemba anango a m’Bhibhlya. Mudapita pyaka piwiri tagwerwa na nyatwa inango, Granville alobzweka na bharko mbafa.

Natenepa mpingo wathu ung’ono wadzasala nee nkulu wa mpingo m’bodzi, basi ene akhadasala ndi ntumiki wakutumikira m’bodzi. Kufa kwa Granville kwanditsukwalisa kakamwe thangwi iye akhali xamwali wanga wapantima. Kusiyapo pyenepi, iye ndzidzi onsene akhandiphedza toera ndikhale na uxamwali wakuwanga na Yahova, pontho akhandiphedza na pinthu pinango pizinji pikhafuna ine. Pidapita ntsiku zingasi, ine ndaphembwa toera ndi leri Ncenjezi pa misonkhano. Ine ndakwanisa kuleri ndima ziwiri, mbwenye buluka penepo ndatoma kulira. Natenepa ndabuluka pa platifomu.

Ine ndatoma kukhala wakutsandzaya mu ndzidzi udabwera abale a mu mpingo unango toera kutiphedza ku Orealla. Kusiyapo pyenepi, Bheteli yatumiza mpainiya wakupambulika m’bodzi anacemerwa Kojo toera atumikire mucisa cathu. Pinthu pidanditsandzayisa kakamwe ndi pyakuti mai wanga na m’bale wanga wang’ono atoma kupfundza Bhibhlya mpaka kubatizwa. Kusiyapo pyenepi, mwezi wa Março wa 2015 ine ndakhazikiswa ninga ntumiki wakutumikira. Mudapita ndzidzi ungasi, ine ndacita nkhani yapakweca, pontho unoyu ukhali ulendo wakutoma. Pa ntsiku ineyi ine ndakumbuka mafala adalonga Granville kuti: “Ntsogolo, iwe unadzacita nkhani yapakweca. Ine ndiri na cinyindiro cakuti iwe unadzacita pyenepi.”

Kubulukira m’maprogramu a Broadcasting^®, ine ndaona abale anango akuti ali na makhaliro ninga anga. Mwakukhonda tsalakana utenda uli na iwo, iwo asacita pizinji kakamwe, pontho asakhala akutsandzaya. Natenepa ine ndaona kuti ndinakwanisambo kucita pyenepi. Nakuti ndikhafuna kakamwe kucita pyonsene pikhakwanisa ine toera kutumikira Yahova, natenepa ndatoma kutumikira ninga mpainiya wa ndzidzi onsene. Pontho mwezi wa Setembro wa 2019 kwacitika cinthu cakuti ine nee ndikhacidikhira, mu caka ceneci ndakhazikiswa ninga nkulu wa mpingo mu mpingo wathu wakuti uli na amwazi mphangwa 40.

Ndisapereka takhuta kakamwe kuna abale na alongo adandipfundzisa Bhibhlya, pontho na kundiphedza toera kutumikira Yahova. Mu pinthu pyonsene ndisapereka takhuta kuna Yahova wakuti nee andiduwala.