A dü mbi na ngu 1983. Na ngoi so mbi de kete mbi yeke lani na nzoni seni, me na ngoi so mbi wara ngu bale-oko, yâ ti terê ti mbi kue akomanse ti son ngangu. Ngu use tongaso na pekoni, na ngoi so mbi zingo na mbeni ndapre mbi peut ti bougé terê ti mbi ape. Mbi sara ngangu ti bougé gere ti mbi, me gbä. Depuis na lango ni so, mbi tambela encore ape. Kobela ni akanga lege na mbi ti kono. Laso, mbi ngbâ gï tongana kete molenge.

Na ngoi so awali use so ayeke aTémoin ti Jéhovah aga na ndo ti e ti fa tënë na e, mbi yeke gï na yanga-da a sara ambeni nze awe. Tongana azo aga na ndo ti e, mbi yeke honde ka terê ti mbi, me na lango ni so mbi yeda ti sara lisoro na ala. Na ngoi so ala yeke sara tënë na ndö ti Paradis, mbi dabe ti mbi na ye so mbi mä lani na ngoi so mbi yeke na ngu oku tongaso. Na yâ ti angoi ni so, Jethro, mbeni missionnaire so alango na Suriname, ayeke ga lani na kete kodro ti e lege oko na yâ ti nze, na lo yeke manda Bible lani na babâ ti mbi. Jethro asara ye lani na mbi na nzoni bê mingi. Mbi ye lo lani mingi. Nga, a-âta ti mbi ayeke mû mbi lani mbi na ala e gue na ambeni bungbi ti aTémoin so ala yeke sara na kete kodro ti e. Tongaso, tongana Florence, mbeni oko ti aTémoin so aga abâ mbi na lango ni so, ahunda wala mbi ye ti hinga ye mingi na ndö ti tënë ni, mbi yeda.

Florence na koli ti lo Justus akiri lani ti bâ mbi na ala komanse ti manda Bible na mbi. Na ngoi so ala bâ so mbi hinga ti diko mbeti ape, ala fa na mbi ti diko ni. Ambeni ngoi na pekoni, mbi komanse ti diko mbeti. Mbeni lâ, couple ni atene na mbi so a tokua ala na Suriname. Mawa ni ayeke so zo ti sara étude na mbi na Orealla ayeke dä ape. Me merci so Jéhovah agirisa mbi ape.

Kete na pekoni, mbeni pionnier so iri ti lo ayeke Floyd aga na Orealla, na lo wara mbi na ngoi so lo yeke fa tënë da na da. Tongana lo hunda mbi na ndö ti mandango Bible, mbi he kete ngia. Lo hunda mbi: “Mo he ngia ngbanga ti nyen?” Mbi tene na lo so mbi manda lani brochure Ye Wa Nzapa Ahunda na E? na mbi komanse ti manda buku Hingango Ye So Ague na Fini ti Lakue Lakue. * Mbi fa na lo ndani so étude ni aluti. Floyd ahunzi ti manda na mbi buku Hingango Ye, me lo kue a tokua lo na mbeni ndo nde. Ge encore, zo ti sara étude na mbi ayeke dä ape.

 Me na ngu 2004, a tokua apionnier spécial use, Granville na Joshua, na Orealla. Ala fa tënë da na da na ala wara mbi. Na ngoi so ala hunda mbi eskê mbi ye ti manda Bible, mbi he kete ngia. Mbi hunda na ala ti manda na mbi buku Hingango Ye a komanse na kozo chapitre ni. Mbi ye lani ti bâ wala ala yeke fa na mbi a-oko ye so angbene zo so amanda Bible na mbi afa na mbi. Granville atene na mbi so a yeke sara abungbi na kete kodro ge. Mbi ye lani ti gue, atâa so nduru na ngu bale-oko mbi bougé na yanga-da ape. Tongaso Granville aga amû mbi lo zia mbi na yâ ti puse ti azo so ayeke na kpale ti seni, na lo pusu mbi e gue na Da ti Royaume.

Na pekoni, Granville awa mbi ti zia iri ti mbi na Ekole ti kusala ti aChrétien. Lo tene na mbi, lo tene: “Ambeni mbage ti terê ti mo la abuba, me lo lingbi ti sara tënë. Mbeni lâ mo yeke mû ande diskur. Mo yeke sara ande ni.” Atënë ti lo so akpengba mbi na asara si mbi bâ so mbi lingbi ti sara ni ande.

Mbi na Granville e komanse ti fa tënë. Me mingi ti alege ti yâ ti kete kodro ni ayeke nzoni ape ti hon na puse ni dä. Tongaso, mbi hunda na Granville ti zia mbi na yâ ti brouette na ti pusu mbi si e gue, na a marché nzoni mingi. Mbi wara batême na avril, ngu 2005. Kete na pekoni, aita-koli afa na mbi ti bâ lege ti ambeti nga na sonorisation na Da ti Royaume.

Mawa ni ayeke so na ngu 2007 babâ ti mbi akui na yâ ti mbeni accident ti bateau. Sewa ti e ayeke lani na yâ ti vundu mingi. Granville asambela lani na e, na lo diko na e aversê ti Bible so adë bê ti e. Ngu use na pekoni, mbeni ye akiri azia vundu na bê ti e mingi: Granville akui na yâ ti mbeni accident ti bateau.

Kete congrégation ti e so ayeke na yâ ti vundu angbâ sân ancien, gï wakua ti mungo maboko oko la ayeke dä. Mbi sara mawa mingi ndali ti kuâ ti kamarade ti mbi Granville, so mbi ye lo mingi. Lakue lo aidé mbi ti ga nduru na Jéhovah nga lo mû na mbi ambeni ye so mbi bezoin ni. Na kozo bungbi so e sara na peko ti kuâ ti lo, mbi la mbi doit ti diko aparagraphe na ngoi ti Mandango Tour ti Ba Ndo. Mbi diko gï paragraphe use, na mbi komanse ti toto na ngu ti lê ti mbi ayeke sigi gï sigingo. Mbi descend na pupitre.

Mbi komanse ti wara ngia na ngoi so aita-koli ti mbeni congrégation nde aga ti aidé e na Orealla. Filiale atokua nga na e Kojo, mbeni pionnier spécial. A nzere na mbi lani so mama ti mbi na ngambe ti mbi ti koli akomanse ti manda Bible na ala wara batême. Na pekoni, mbi ga wakua ti mungo maboko na mars, ngu 2015. Ambeni ngoi na pekoni, mbi mû kozo diskur ti mbi. Na lango ni so, na ngia na yanga nga na ngu ti lê, mbi dabe ti mbi na tënë so Granville atene lani na mbi: “Mbeni lâ mo yeke mû ande diskur. Mo yeke sara ande ni.”

Na lege ti akapa ti JW Télédiffusion, mbi bâ so ambeni mba ti mbi aTémoin ayeke na mara kpale ti mbi. Atâa so ala yeke na kpale ti seni, ala wara lege ti sara aye mingi nga ala yeke na ngia. Mbi nga kue, mbi lingbi ti sara ambeni ye. Nzara so mbi yeke na ni ti sara na Jéhovah na tanga ti ngangu so angbâ na mbi apusu mbi ti ga pionnier permanent. Na septembre 2019, mbi mä mbeni tënë so mbi ku terê ti mbi na ni oko ape! Na nze ni so, a tene na mbi so mbi ga ancien na yâ ti congrégation ti e so awafango tënë ayeke dä 40 tongaso.

Mbi kiri singila na aita so mbi ye ala mingi so amanda Bible na mbi nga so amû maboko na mbi ti sara na Jéhovah. Me mbi kiri singila mingi na Jéhovah so agirisa mbi ape.