Nateraky tamy 1983 aho. Nisalama soa tse aho tamy voalohany, fe lafa nifolo talo aho le nanomboky naharè raha mahararirary biby amy ty vatako iaby. Roe tao eo ho eo tafarani-zay, lafa zaho nifoha maray, le tsy afaky nihetsiky. Niezaky marè aho mba hampihetsiky ani-tomboko rey, fe tsy nety. Tsy afaky nandeha sasy aho nanomboky tamy andro io. Nanjary tsy nitombo koa aho tratsini-aretiko iny. Kelikely manahaky ajà io aho henanizao.

Vola vitsivitsy tafarani-namparary ahy noho nijanonako tan-trano ao, le nisy Vavolombeloni-Jehovah roe nitsidiky anay. Matetiky aho ro niezaky nivony lafa nisy vahiny niavy teo, fe tamy fotoa io nengako hiresaky amiko ampela iny. Lafa niresaky mikasiky Paradisa rozy, le avy le nitiaroko ty raha nireko tamy zaho limy tao eo ho eo. Tamy fotoa zay, le nisy misionera mana anara Jethro, baka a Suriname any zay, nitsidiky ani-tanànay toy indraiky sambola, le nampianatsy Baiboly ani-babako. Tena nisoa fanahy tamiko Jethro. Niteako biby ie. Kindraiky aho nandesini-bebeko noho dadabeko nanatriky ty fivoria nataoni-Vavolombeloni-Jehovah tan-tanànay eto. Ka lafa nanontany ahy amy zay Florence, raiky amy ampela nitory amiko rey hoe teako va ty hahazo fanazavà maromaro, le naneky aho.

Nimpoly Florence niaraky tamy Justus valiny, le nanomboky nianatsy Baiboly niaraky amin-drozy aho. Lafa nihain-drozy hoe tsy nahay namaky teny aho, le nampianarin-drozy namaky teny. Nihanahay namaky aho lafa nandeha ty fotoa. Ndraiky andro, le nivola tamiko mpivaly rey hoe voatendry hanompo a Suriname any rozy. Nampalahelo fa tsy nisy olo afaky nanohy ani-fianara Baiboly iny ta Orealla eto. Fe soa avao fa tsy nanalino ahy Jehovah.

Tsy ela tafarani-zay, le nisy mpisava lala kaihy hoe Floyd zay niavy ta Orealla eto. Nahita ahy ie lafa nitory santrano. Lafa niresahany mikasiky fianara Baiboly aho, le nihehy. “Ino”, hoasany, “mampihehy anao io?” Nivolaniko amy zay ie hoe fa nianatsy Baiboly tamy bokikely hoe Inona no Takin’Andriamanitra Amintsika? iny aho, le fa nanomboky nianatsy tamy boky Fahalalana Izay Mitarika ho Amin’ny Fiainana Mandrakizay * iny koa. Nihazavaniko hoe nanino fianara iny ro nijano. Namita ani-boky Fahalalana iny niaraky amiko Floyd, fe bakeo ie nivoatendry hanompo amy pilasy hafa koa. Tsy nisy nampianatsy Baiboly ndraiky aho.

 Fe tamy 2004, le nisy mpisava lala manoka roe nivoatendry ho a Orealla eto. Granville noho Joshua ty anaran-drozy. Nitory santrano rozy, le nahita ahy. Lafa nanontany rozy hoe ta hianatsy va aho, le nihehy aho. Nangatahiko rozy mba hampianatsy ahy amy boky Fahalalana iny baka amy voalohany. Teako ho hita hoe hampianatsy ahy raha mitovy amy nampianarini-mpampianatsy taloha iny avao va rozy. Nivola tamiko Granville hoe nisy fivoria natao tan-tanà eo. Fa ho folo tao zay ty tsy niboahako baka an-trano ao, fe naniry hanatriky any aho. Farany nalàni-Granville tan-trano eo aho, le napetrany tamy sezy misy larò bakeo nandesiny zisiky amy Efitrano Fanjakà any.

Nampirisihini-Granville handramby anjara amy Sekolin’ny Fanompoana aho lafa tafara atoy. Nivola ie hoe: “Kombo iha, fe afaky mivola. Ndraiky andro iha hanao lahateny ho ahi-ty maro. Tsy maintsy ho avy raha zay.” Nanome toky ahy safà mampahery nataony iny.

Nanomboky nitory niaraky amy Granville aho. Fe tsy mety amy sezy misy larò iny ty lala tany maro an-tanà eto. Farany nivolaniko Granville hametraky ahy anabo borety, le hanosiky ahy. Tena nimety raha iny. Natao batisa aho tamy Avrily 2005. Tsiela tafarani-zay aho, nampiofanini-rahalahy reo hikarakara bokini-fiangona noho fanamafisam-peo amy Efitrano Fanjakà ao.

Nampalahelo fa nirendriky tamy sambo babako tamy 2007, le nimaty. Nalahelo biby ty fianakavianay. Niaraky nivavaky aminay Granville sady namaky andinin-teny mampahery ho anay. Roe tao tafara atoy, le nisy loza hafa koa nahazo anay. Nirendriky tamy sambo Granville, le nimaty.

Nampalahelo fa tsy nana anti-panahy fiangona kelikely nisy anay iny, fa mpanampy amy fanompoa raiky avao. Nalahelo biby aho satria nimaty Granville, namako teako iny. Teo avao ie nanampy ahy hifandramby marìny amy Jehovah noho amy ze raha hafa nilàko. Nivory zahay tafarani-nahafatesany iny, le zaho ro nivoatendry hamaky fehintsoratsy tamy Fianara Tilikambo. Nivitako soa tse ty fehintsoratsy roe voalohany, fe bakeo aho nanomboky nitany le niraradraraky avao ty ranomasoko. Farany aho niala baka amy lampihazo eny.

Nanomboky nifalifaly aho lafa nisy rahalahy baka amy fiangona hafa niavy mba hanampy anay ta Orealla eto. Nandefasani-biròni-sampana mpisava lala manoka raiky, mana anara Kojo zay koa zahay. Nifalifaly aho fa nanomboky nianatsy Baiboly mamako noho zaiko lahilahy raiky zay, le natao batisa. Bakeo tamy Marsa 2015 aho, nivoatendry ho mpanampy amy fanompoa. Lafa nandeha ty fotoa, le nanao lahateny ho ahi-ty maro aho. Vo sambako tamy zay. Sady nihehy aho tamy andro io no nilatsa-dranomaso, satria nahatiaro ty raha nivolanini-Granville tamiko tao maro talohani-zay hoe: “Ndraiky andro iha hanao lahateny ho ahi-ty maro. Tsy maintsy ho avy raha zay.”

Nanjary nahay raha maro mikasiky ani-rahalahy noho anabavy mitovy raha iaina amiko rey aho tamy fandahara Tele JW rey. Ndre misy handra aza rozy, le mahavita raha maro sady falifaly. Mbo afaky manao raha sisany koa aho. Ta hanome ze farani-heriko ho ani-Jehovah aho, ka nanao mpisava lala maharitsy. Nisy vaovao bevata tsy nampoiziko koa tamy Septambra 2019! Nivoatendry ho anti-panahy tamy fiangonanay eo aho. Misy mpitory 40 ty ao.

Manao mahavelo bevata ani-rahalahy noho anabavy nampianatsy noho nanampy ahy hanompo ani-Jehovah rey aho. Fa ty bevata marè, le isaorako Jehovah fa tsy nanalino ahy.