Mbotshɔka lá 1983. Ɛnɔnyi esato wɛ ntondo wɛ lowiko lɔmi, ndjalaka la demba djɛ wɔlɔ, koko wina wɔ mawa ɛnɔnyi djomi, ntateyɛka ndjoka lolamatshi lɔ wolo lá demba djɛmi dj’otondo. M’ɔkɔngɔ w’ɛnɔnyi epe, nkɛsɛ mɔtshi wina wɔ mosashimɔ m’ilɔ, ndjokaka djɛ ntakoka nsasoka lonkina. Kaanga motshikitshɛka ekolo wopo wɔkɔnge wɔsɔ, wetakoka ntshikita lokina. Má lofu lɔsɔ ntakoka nkɛnda lonkina, olando wɔmi wɔsɔ wonkomɛka nsɛkɔ.

Ndjipamaka lá mvulu l’ilá kɛ ngɔndɔ imɔtshi tii wina wɔ Ewakɛ wɛ Yehova epe iyaye ndjombembola. Layalaki l’ekfumbo kɛ ndjisama wina wɛnami anto wayaye lakaso. Koko lofu lɔsɔ, ndjawolaka nsawola la wamato wasɔ. Wina wiyatepela n’kambo djɛ paradiso, nvungɔka n’kambo mɔtshi djɛ moke wina wɔ moyalaka l’ɛnɔnyi etano. L’etena kɛsɔ, misiɔnɛrɛ ketawɔ Jethro, kanga lintansɛki lá Surinam ayɛki lowembola mbandja kɛso ngɔndɔ inkfumɔ, edjinge ekaki Bible nya papa kɛmi. Jethro ananghelaki akambo la ngandji. Lemi ndjɔkɔpaki efula. Lonkina andoyi yɛmi wantɔlaki tá nsanghanyɛ imɔtshi y’Ewakɛ wɛ Yehova yenanghemaki lá mbadja kɛso. Djɛkondeke, wina wɔ Florence ɔmɔtshi l’anteyi kɛ wamato ape wayisa londenda lofu lɔsɔ ndandjopola ntsha nkɔpa ndjewa akambo efula, ntepelaka ente, ee.

Florence akalɔka ndjɛ nya womɛnde Justus edjinge watateyɛka ndjekɛ lemi Bible. Wina w’iyɛnyi ambɔ lemi mpewe mbala, iwɔ wandjekɛka wopo wɔ ndjewa mbala. M’ɔkɔngɔ w’etsho ɛmɔtshi, ntateyɛka mbala mɔmɛlɛ. Lofu lɔmɔtshi, antshukanyi wasɔ wanshimelaka ambɔ, wambatoma tokamba lá Surinam. N’kambo djɛ yɛnyi nde ntawa onto onkina lá Orealla wokokaki nkindjɛ ndjekɛ lemi Bible. Koko, mpeyi nde, Yehova atanvungɛ.

Lako ndjala ilá, yat’ekalo imɔtshi yɛ iyetaka Floyd ayɛka lá Orealla, edjinge andjisolaka wina wɔ ndotapoposanyɛka mvulu la mvulu. Wina w’indanshimela djɛ lemi ndjeka isande Bible, lemi mamɔnaka. Ko ndombondjopola ante: “omamɔnɛ mo?” Ndoshimelaka ente lamboshiyɛka ndjeka inkankanda Kakɔna katɔlɔmba Nzambi? Edjinge lambotateyɛka ndjeka Ewo Katɔla Otsha lo lɔsɛnɔ la Pondjo. * Momopakisola lamo motakindjɛ ndjeka. Nshiyɛka ndjeka onkanda Ewo isa Floyd, koko wayɛka ndotoma idjena inkina. Nsambaka lonkina wetsha wɔ Bible.

 Koko, lá 2004, watomaka Granville nya Yoshua, tat’ekalo totshikitanyi lá Orealla. Wayɛka londjisola wina wiyotapoposanyɛka mvulu lá mvulu. Wina wiyandjopola, ntsha lemi nkɔpaka ndjeka, lemi mɔnamɔnaka. Ndalɔmbaka dj’iwɔ ntateyɛ ndjeka la lemi onkanda Ewo. Nkɔpaka ndenda ntsha iwɔ wangondakanyɛ ngo akambo amɔ wakɔ wa wetsha wɛmi wɛ ntondo iyandakanyɛka. Granville anshimelaka ante nsanghanyɛ inanghema lá mbandja kɛso. Kaanga momonangha ɛnɔnyi nsuke la djomi mpapose má lopango, nkɔpaka ndjingela nsanghanyɛ yɛsɔ. Nghɔsɔ ndeke Granville nyaye lakaso edjinge nyandjile lá n’kalo dj’ase n’kɔmɔ ko nyantshinde tá Mvulu k’Onkfumi.

M’ɔkɔngɔ, Granville ankeketshɛka djɛ lemi nfunda lokombo lá nkalasa kɛ Théocratie. Nde anshimelaka ante: “Kaanga oyɛ kanga ɛkɔmɔ, koko olekɔ l’akoka wa ntepela. Lofu lɔmɔtshi ɔngɔpɛyɛ djamba. Lofu lɔkɔ lolekɔ.” Etepela wɛnde wekembɛ wɛsɔ wenkeketshɛka.

Ntateyɛka ntshɔ t’olemo w’ipoposanyɛ lemi sa Granville. Koko, entayimbo welá mbandja kɛso wetayalaki wɔlɔ ndjeteta la n’kalo dj’ase n’kɔmɔ. Djɛko ndeke, malɔmbɛ Granville djɛ ndjila lemi lá pusupusu djɛ nde ntantshindaka. Iyawɔnge nde nghɔsɔ. Lá ngɔndɔ k’anɛyi 2005, Ndongolaka Batisimo. M’ɔkɔngɔ, atayala ilá, wananyɔ wankfumbaka djɛ lemi mbɛmba odjito wɔ mbombaka enkanda wel’otshumano edjinge nkamba lá sonorizasiɔ kelá Mvulu k’Onkfumi.

N’kambo djɛ yɛnyi nde lá 2007, papa kɛmi avɔka lá masuwa kenanghisa aksida lá ndjale. Nkfumbo kɛso keyalaka la paa efula. Granville ayɛki lɔlɔmba esanga láso edjinge atowalelaki avɛrse wa Bible wa keketshɛ. M’ɔkɔngɔ w’ɛnɔnyi epe, topomanaka la n’kambo nkina djɛ paa efula l’oloko, Granville avɔka lá masuwa wonanghisa aksida lá ndjale.

Otshumano wɔso wɔ daambi woyalaka la paa efula, ladjikɛnde totayala kaanga l’ikokolo lonkina edjinge totshikalaka ngo l’onkambi wokotshɛ ɔmɔ toko. Nyɔyi kɛ Granville kɛtɔpɛyɛka paa efula ladjikɛnde nde ayalaka ilongo yɛ ngandji efula leso. Nde ankotshɛki lá n’kɔmano nkfumɔ l’ehomba wɛmi wɛ nyuma la wɛ demba. Losanghanyɛ lɔwɔlamisa nyɔyi kɛnde, ndjalaka l’odjito wɔ nangha badji djɛ djamba dj’Etange k’Olami. Mbalaka totenyi tope timá bango, ko m’ɔkɔngɔ ntateyɛka ndela edjinge wisɔdji wakɛlaki efula. Ndjalaka ladjɛ nkita má ɛstradɛ.

Ntateyɛka ndjawoka wɔlɔ wina wɔ wɔnanyɔ ɔmɔtshi wim’otshumano onkina ndaye l’Orealla djɛ ndotokotshɛ. Lonkina, biro kɛ Filialɛ atotomelaka wɔnanyɔ Kojo yat’ekalo yetshikitanyi. N’kambo nkina djɛ mpɛyisa osasa nde, mama kɛmi nya wankfunɛmi w’olangala watateyɛka ndjeka Bible edjinge wayɛka ndolongola batisimo. Masɔ lá ngɔndɔ k’asato lá 2015, wansɔnaka etengo onkambi wokotshɛ. M’ɔkɔngɔ w’etsho ɛmɔtshi, mpɛyɛka djamba djɛmi djɛ ntondo. Lofu lɔsɔ, nkanelaka l’ɔmɔnɔmɔnɔ edjinge la wisɔdji w’osasa kɛnɛ kɛ Granville nyanshimela m’ɔkɔngɔ w’ɛnɔnyi efula ante: “Lofu lɔmɔtshi ɔngɔpɛyɛ djamba. Lofu lɔkɔ lolekɔ.”

Má JW Teledifiziɔ, ndjekaka akambo walendana la winami Ewakɛ walekɔ l’okakasano etengo wɔmi. Koko kaanga oyɛwɔ ase n’kɔmɔ, walekɔ la lowiko lɔtɔ mbambo edjinge l’osasa. Koko le lemi, nkoka nangha akambo ankina efula lonkina. Mposɛ kelekɔ lalemi kɛ mpɛyɛ Yehova wolo wɔmi kentshindaka djɛ ndjala yatekalo y’itenyi. Edjinge ɔsɔngo losango limotasangolaka limawa lá Ngɔndɔ kɛ djuwa 2019! Lá ngɔndɔ kɛsɔ, ndjalaka l’osasa wɔ ndjewa djɛ lambɔsɔnama etengo ikokolo l’otshumano wɔso wolekɔ l’ansakodji 40.

Ndekɔ la djedjɛ le wananyɔ l’ankana yɛ ngandji yekisa la lemi edjinge yenkotshisa djɛ lemi nkambela Yehova. Pekapeka, nkawoyɛ Yehova lokasa efula lá wopo wɔ nyotanvungɛ.