Ne mutandikwe mu kipya kya 1983. Mu bipwa byande bya kumpala, nadi nka na mbidi bukome, anka panalombeshe bipwa ekumi, nabangile kupusha mitanyo mu mbidi. Peepi na bipwa bibidi kunyima, nabukile ku nakashika, ami nkukutwa bukome bwa kusana. Natompele mwande moso, anka mu mikolo ta mubadi bukome nya. Kubanga nka dyadya efuku, ntshi mutambukye dimo. Uno mukumbo ngudekyeshe kukula, mpa na lelo uno, ne nka bu kana kakinga.

Myeshi ipeela kunyima kwa’mi kubanga kukumba, ntshi nadi natuuku mu nshibo nsaa ibafikile ba Temwe ba Yehowa kwande. Nadi nakamba kufwama nsaa ibadi ayifiki bantu, anka dyadya efuku, natadidile bwa’shi baba bana bakashi besambe nami. Nsaa ibabadi abakwila pabitale mpaladiso, nadi mutentekyeshe bi nadi mupushe pa nadi na bipwa bitano. Mu aa mafuku, ungi misionere abetaminaa bu Jethro badi mushale mu kibundji kya Suriname, badi mufikye mu ka kibundji ketu bwa mweshi na aye nkubanga kulonga Bible na nsha’mi. Jethro badi ankitshina myanda na kalolo, na nadi mumufule ngofu. Dingi, ba nsha’mi kulu abadi abende nami ku bisangilo bya Temwe ba Yehowa bibadi abikitshika mu ka kibundji ketu. Nsaa ibadi Florence umune a ku baba bana bakashi abadi bafikye kwande dyadya efuku mungipushe su nakumiina kulonga bi bungi, na kuminyine.

Florence balukile mukuntala na mulum’aye Justus, na boso bwabo nkubanga kulonga nami Bible. Pababamwene’shi ntanguku kubadika, abandongyeshe bya kubadika. Mafuku apeela kunyima, nabangile kwibadikila. Dingi efuku, abandungwile’shi abebatumu bwa kufubila mu Suriname. Mwanda wa malwa, takubadi muntu su ngumune mu Orealla badya kutungunuka na kulonga nami Bible. Anka, mwanda wa muloo, Yehowa ta mmungilwe.

Mafuku apela kunyima, ungi mbala-mashinda abetaminaa bu Floyd bafikile mu Orealla, na bampetele nsaa ibadi alungula mukandu wibuwa ku nshibo na nshibo. Nsaa ibadi mungipushe su twi kulonga Bible, nasepele. Aye kungipusha’shi: “Bwakinyi bosepe?” Namulungwile’shi, tanadi mupwe kubanga kulonga broshire a Ce que Dieu attend de nous; na ami nkubanga nyi kulonga mukanda wa La connaissance qui mène à la vie éternelle. * Nadi mumupatulwile bwa kinyi kulonga kubadi kwimane. Tubadi bapwe kulonga mukanda wa La connaissance na Floyd, anka naye namu abadi bamutume bwa nkafubila ingi mbalo. Nashadile dingi kushi muntu a kulonga naye Bible.

 Kadi, mu 2004, babadi batume Granville na Joshua ba mbala-mashinda babidi ba nsaa yoso mu Orealla. Abampetele nsaa ibabadi abalungula mukandu wibuwa ku nshibo na nshibo. Nsaa ibabangipwishe su nakumiina kulonga Bible, nasepele. Nebatekyele bwabadya kubanguula kulonga nami mukanda wa La connaissance. Nadi nakumiina kuuka su abandongyesha myanda i mumune na ibadi balongyeshi bande ba kumpala abandongyesha. Granville bandungwile’shi, bisangilo bikwete kukitshika muno mu Orealla. Takubadi bipwa ekumi kushi’mi kutuka lupango. Nyi bwakinyi, Granville bafikile kwande, nkunshadika mu ka kinga ka bishetshi na aye nkusukuma mpa na ku Nshibo ya Bufumu.

Kunyima, Granville badi munyingishe bwandya kwifundjisha mu Kalasa ka mudimo wa Teokrasi. Bandungwile’shi: “We mulemane, anka we bya kwakula. Dingi efuku, okele mwisambo wa bantu boso. Okebikitshi.” Mayi aye abadi anyingishe ngofu.

Nabangile kulungula mukandu wibuwa na Granville. Anka bilayi bi bungi ta bibadi buwa, na ta kubadi mushindo wa kukidila mwanka na ka kinga ka bishetshi. Nyi bwakinyi natekyele Granville bwadya kunsukuma mu brouette. Aa mayele abadi buwa. Mu mweshi wa 4/2005, nadi mubatshishibwe. Mafuku apeela kunyima, bakwetu abadi bandogyeshe bya kufuba ku mikanda na ku sono mu Nshibo ya Bufumu.

Mwanda wa malwa, mu 2007 nsha’mi abadi bapone na bwato, aye nkufwila mu mema. Kifuko kyetu kibadi kinyongole ngofu. Granville badi atekye netu na badi etubadikila bifundwe bibadi abitunyingisha. Bipwa bibidi kunyima, kubadi kukitshikye ungi mwanda ubadi witwinyongoshe ngofu​—Granville abadi nabo bapone na bwato, aye nkufwa mu mema.

Kakongye ketu kapela, kabashele bi lusa, kabashele kushi mukulu anka na penda mufubi a midimo umune. Lufu lwa Granville lubadi lunyinyongoshe ngofu, mwanda badi kuuku ande a p’eshimba. Badi apansukila ngofu mu kikudi mpa na ku mbidi. Bisangilo bibalondele lufu lwaye, abadi bantekye bwa kubadika bikoso mu kulonga kwa Kitenta kya Mulami. Nabadikile nka penda bikoso bibidi, anka ami nkubanga kudila na mpolo nkubanga kungika. Bibadi abitungu’shi nkatukye kumpala.

Nabangile kupusha kalolo nsaa ibadi bakwetu balume ba mu kangi kakongye abafiki mu kukwasha mu Orealla. Na dingi, filiale badi mutume Kojo, mbala-mashinda a nsaa yoso. Nadi na muloo wa kumona nyinami na mwin’ade mulume ababanga kulonga Bible na kubatshishibwa. Mu mweshi wa 3/2015 nafikile bu mufubi a midimo. Kunyima, nelele mwisambo wande wa kumpala wa bantu boso. Dyadya efuku nadi na muloo, anka nadi napusha bya kudila nsaa inadi natentekyesha bibandungwile Granville bipwa kumpala’shi: “Dingi efuku okele mwisambo wa bantu boso. Okebikitshi.”

Ku bukwashi bwa programe a Televizion a JW^®, ne mulongye myanda i bungi kwi bakwetu be na nshalelo e mumune na ande. Sunga byabadi na mikumbo, bakwete kukita myanda i bungi na be na muloo. Nami namu nenka bya kukita ingi myanda. Lukalo lwande lwa kupa Yehowa bukome bwande, ndutakule bwa kwikala mbala-mashinda. Mu mweshi wa 9/2019, napetele mukandu wibuwa ubadi unsankishe ngofu! Mu wawa mweshi, nekele mukulu mu kakongye ke balungudi peepi na 40.

Natumbula bakwetu boso balume na bakashi balongye nami Bible, na bankwashe bwa kukumbasha mudimo wande. Mu byoso, natumbula Yehowa ngofu, mwanda ta mmungilwe.