De pai mi a di jaa 1983. Di mi bi dë wan piki mii, mi bi dë gösöntu. Ma di mi bi abi teni jaa, nöö hii mi sinkii bi bigi ta njan mi gaanfa seei. Söwan tu jaa baka di dë, hën wan daka di mi weki, nöö ma bi sa buli futu möön. Mi bi ta mbei möiti u buli dee futu u mi, ma de an bi ta buli möönsö. Sensi di daka dë, ma waka möön. Di siki di mi bi ko abi aki, bi mbei ma göö möön. Te kisi tide, ma göö möön.

Di mi bi ko kisi di siki aki, ma bi sa kumutu a wosu sömëni liba longi. Ma a di pisiten dë tu Jehovah Kotoigi ko a u pisi. Te sëmbë bi ta ko a u pisi, nöö mi bi lo’ u go tjubi, ma di daka dë mi bi haika dee tu mujëë. De bi konda soni u di Paladëisi da mi. Di soni dë bi mbei mi toona mëni andi mi bi lei di mi bi abi feifi jaa. A di ten dë, wan baaa de kai Jethro, di bi ta du di sëndëlengi wooko a Saana, bi ta ko wan pasi wan liba a di kamian ka u ta libi, u lei mi tata soni u Bëibel. Baaa Jethro bi ta libi bunu ku mi seei. Mi bi lobi ën gaanfa. Söseei dee avo u mi tata së, bi ta tja mi go a dee komakandi u dee Kotoigi. De bi ta hoi dee komakandi aki a di kamian ka u ta libi. Fëën mbei di wan u dee mujëë de kai Florence di bi ko a u pisi di daka dë, bi hakisi mi ee mi bi o kë ko sabi möön soni u Bëibel, hën mi piki aai.

Wan woto daka, Florence ku hën manu de kai Justus bi toona ko a mi, hën de bigi lei mi soni u Bëibel. Di de bi ko si taa ma bi sa’ u lesi, hën de heepi mi u mi ko sa’ u lesi. Baka wan pisiten, hën mi bi ko sa’ u lesi. Ma wan daka, di baaa aki ku hën mujëë piki mi taa de o go du di peleikiwooko a Saana. Wë di de go, na wan sëmbë bi dë a Orealla möön u lei mi soni u Bëibel go dou. Ma Jehovah an bi fëëkëtë mi.

An bi tei longi seei, hën wan baaa de kai Floyd di bi ta du di pioniliwooko, bi ko a Orealla. A bi ta peleiki a sëmbë pisi, hën a ko fan ku mi. Di a bi ta taki soni u lei soni u Bëibel ku mi, hën mi lafu mukii. Di baaa hakisi mi faandi mbei mi ta lafu, hën mi piki ën taa mi bi lei soni u Bëibel kaa a di brochure de kai Andi Gadu kë taa u musu du?, söseei taa mi bi bigi lei soni a di buku de kai Sabi di e tjari joe go na têgo libi. * Mi bi konda da di baaa unfa a waka taa ma bi ta lei soni u Bëibel möön. Baaa Floyd bi lei mi soni a di buku aki u te u kabëën. Ma hënseei bi musu go peleiki a wan woto kamian. Sö a bi ko pasa möön taa ma bi abi sëmbë u lei mi soni u Bëibel go dou.

 A di jaa 2004 dee baaa bi manda tu baaa di bi ta du di apaiti-pioniliwooko ko a Orealla. Dee tu baaa aki bi dë Baaa Granville ku Baaa Joshua. De bi nango a sëmbë pisi ta peleiki da de, nöö sö de bi dou a u pisi tu. Di de bi hakisi mi ee mi bi o kë lei soni u Bëibel, hën mi lafu mukii. Mi bi hakisi de u de lei mi soni u Bëibel ku di Sabi-buku. Mi bi kë u de bigi a baka futu, u di mi bi kë si ee de bi o lei mi dee seei soni di dee sëmbë dee bi lei mi soni a fesi, bi lei mi. Baaa Granville bi piki mi taa de ta hoi komakandi a di kamian ka u ta libi. Hii fa bëina teni jaa longi ma bi kumutu a wosu, tökuseei mi bi kë go a komakandi. Fëën mbei Baaa Granville bi ko tei mi. A bi buta mi a wan suwakima sutuu, hën a tötö mi go a di Könuköndë zali.

Bakaten, Baaa Granville da mi taanga u mi buta mi në a di Teokalasia-siköö. A bi piki mi taa: „Ja sa waka, ma i ta fan. Wan daka o dou ka joo hoi wan taki. Joo du ën tuutuu.” Di soni di a bi taki aki, bi da mi taanga seei.

Mi bi bigi nango a di peleikiwooko makandi ku Baaa Granville. Ma sömëni u dee pasi u di kamian ka u ta libi an sima, nöö de bi abi baaku. A bi ta taanga u pasa ku di suwakima sutuu u mi. Fëën mbei mi bi hakisi Baaa Granville faa buta mi a wan kolowagi, nöö a tötö mi. Di dë bi nango bunu seei. A piki deewei-liba u di jaa 2005, hën mi dopu. Kölö sö baka di dë, dee baaa bi lei mi unfa mi bi sa seeka buku soni u di kemeente, söseei unfa mi sa seeka poku soni u di Könuköndë zali.

A di jaa 2007, mi tata bi ko lasi libi. A bi kisi gaan makei di a bi kai kumutu a wan boto. Di famii fuu bi ta tjali seei. Baaa Granville bi begi ku u, söseei a bi lesi wantu tëkisi u Bëibel di bi da u kötöhati. Ma a tjali taa tu jaa baka di dë, wan hogi bi miti u möön. Baaa Granville bi ko lasi libi di di boto di a bi dë nëën dendu bi singi.

Di piki kemeente fuu an bi abi gaanwomi möön. Wan dinai nöö bi dë. A bi hati mi seei di Baaa Granville lasi libi. Mi bi lobi ën seei. Hii juu a bi ta heepi mi u mi ko dë möön gaan mati ku Jehovah, söseei a bi ta heepi mi ku soni di mi bi abi fanöudu. A di komakandi di u bi hoi baka di a lasi libi, mi bi musu lesi dee palaklafu u di Hei Wakitimawosu-lei. Mi bi sa lesi dee fosu palaklafu, ma baka di dë mi bi bigi ta këë. Ma bi sa lesi go dou.

Di so baaa u wan woto kemeente bi ko heepi u a Orealla, ufö mi bi bigi ta fii möön bunu. Söseei di bëikantoo bi manda wan baaa de kai Kojo ko da u. A bi ta du di apaiti-pioniliwooko. Mi bi wai seei di mi mama ku mi piki baaa bi bigi lei soni u Bëibel hën bakaten de dopu. A gaanliba u di jaa 2015, mi bi toon wan dinai. Baka wan pisiten, hën mi bi hoi di fosu taki u mi. Di daka dë, mi bi wai ma mi bi këë tu, u di mi bi toona mëni di soni di Baaa Granville bi piki mi wantu jaa pasa. A bi taki taa: „Wan daka o dou ka joo hoi wan taki. Joo du ën tuutuu.”

Te mi ta luku dee JW Broadcasting^® fëlön, nöö mi ta si taa woto baaa ku sisa dë di dë kuma mi. Ma tökuseei de ta du sömëni soni, söseei de ta dë waiwai. Mi sa ta du so soni jeti. Mi bi kë du hii soni di mi sa du da Jehovah. Fëën mbei mi bi bigi du di kowoonu pioniliwooko. Nöö wan gaan piizii soni bi pasa a wajamaka-liba u di jaa 2019! A di liba dë, mi ko toon gaanwomi a di kemeente fuu, ka söwan 40 peleikima dë.

Mi ta tei ën u bigi seei taa baaa ku sisa bi ko lei mi soni u Bëibel, söseei taa de bi heepi mi u mi dini Jehovah. Ma di soni di mi ta möön tei u bigi, hën da Jehovah an fëëkëtë mi.