Naavyelue mu muaka wa 1983. Lunaali nakili mwanike muniini, naalisie ni bukose bwali buino, inzi, lunaalukile ni miaka 10, naatendekele kunvua misa ikata mu mubili wane onse. Miaka ibili kisia paapo, lukele-keele lumo, naabuukile ni kwandua kwitensia. Anzia kine naaikwindile saana kutensia maulu, te aali na buviinde. Kutendekela bobo busiku, nsinaendepo kabili. Buluele bwane bwaalengele te kunti nkule. Loonu ndisie nga muana muniini.

Miezi kampanda kisia kuluala, kabili bila nafuma pa nsesi, Bakasininkizia Bakue Yehova babili baaizile kungendela. Musita baeni lubaali baiza kwetu, lingi naali nafyama, inzi, bobo busiku naaitabiile babo banakazi bandanzie. Musita lubaalandile palua Paradiso, naalangulukile bintu binaunvuile naali na miaka isano eevi. Mu ozo musita, misionere umo waali wakuutua Jethro, abanga waikala mu Suriname, waali waendela muzi weetu limo kila muezi ni kusambilila Bibilia pamo ni Baba wane. Jethro waandangiliile buwaame. Naamutonene saana. Kabili, ba babu ni bibi baali bantwama limo-limo ku kulonghaana kwaali kwakitika mu muzi weetu. Pakaako, musita Florence, umo pakati ka baalia bankazi baangendeele bobo busiku lwaangipuziizie kine kunti natona kusambilila bingi, naaitabiile.

Florence waabuelele pamo ni mulume wakue Justus, kabili baatendekele kusambilila Bibilia pamo ni neene. Musita lubainikile nangue nsimanine kusoma, baankwasiizie kumana kusoma. Kisia musita kampanda, naatendekele kusoma ne muine. Busiku bumo, babo ba mulume ni mukazi baambuilile nangue balandua babombele mu Suriname. Kya bulanda, mu muzi wa Orealla te mwaali muntu wa kutwalilila kusambilila Bibilia pamo ni neene. Inzi, kya nsaansa, Yehova waansuungile mu maano.

Bila kukokola, painia ali wakuutua Floyd waafikile mu Orealla, kabili waansaangile musita lwaali wasimikila kila katanda. Musita lwaalandile palua kusambilila Bibilia, naasekele. Waangipuziizie eevi: “Juu ya ki waseka?” Naamwanine nangue naasambiliile kale broshua Mungu Anataka Tufanye Nini? kabili naali natendekele kusambilila kitabu Ujuzi Uongozao Kwenye Uhai Udumuo Milele. * Naamubuilile kyaalengele lisambililo tekuti litwalilile. Floyd waasambiliile pamo ni neene kipitu kyaali kyasieleko kya kitabu Ujuzi, inzi kabili ni weene waatuminue aye abombele kunge. Naasiele kabili bila na muntu wa kunsambilizia Bibilia.

 Anzia evio, mu 2004, bapainia babili bebeleele, Granville ni Joshua baatuminue mu Orealla. Baansaangile musita lubaali basimikila kila katanda. Lubaangipuziizie kine ntonene kusambilila, naasekele. Naabalandile tutendeke kusambilila kitabu Ujuzi kubambila ku ntendeko. Naali nakebele kumona kine kunti bansambilizia beelia binasambiliziiziwe na bakasambilizia bane ba ku ntendeko. Granville waambuilile nangue kulonghaana kuli mukukitika mu muzi. Anzia kine naakitile miaka likumi eevi, nalisie ku nsesi, naatonene kuya ku kulonghaana. Pakaako, Granville waaizile ku nsesi ni kunteeka mu kakinga ka babilema ni kuntiinta wantwala ku Nsesi ya Bukolo.

Mu musita kampanda, Granville waankinkiziizie ngileembesie ku Masomo a Miilo ya Kiteokrasi. Waalandile eevi: “Teuviinda kwenda, inzi uli watenda. Busiku bumo wakalanda lyasi lya bantu bonse. Kakiine wakaviinda.” Milandu yakue ya kukoselezia yaampeele maka.

Naatendekele kusimikila pamo ni lupua Granville. Anzia evio, misebo ingi ya mu muzi yaali yaimbikile ni kakinga ka babilema kaali kaandua kupita. Pakaako, naamwanine Granville anteeke mu brueti ni kuntiinta. Kukita evio kwakwasiizie saana. Mu Muezi wa 04, 2005, naabatiziiziwe. Musita uniini kisia paapo, balupua baambeeleziizie miilo ya kusuunga mpapulo mu kilonghaano ni vya kubombia biombo bya kukuzia mazui mu Nsesi ya Bukolo.

Kya bulanda, mu 2007 baba wane waakitile aksida ku boti ni kufikiila kufua. Lupua lwetu lwaakisilue saana. Granville waapepele pamo ni fwefue ni kutusomena maleembo kampanda ali ateekia mutima. Miaka ibili kisia paapo, twaakisikile kabili na bulanda bunge​—Granville waafuile mu aksida ya boti.

Kilonghaano kyetu kiniini kyaali mu bulanda, kyaasielesie na mubombi umo ali wabombela bila mukote. Kakiine naali ni bulanda saana paantu kibuza wane mutonua Granville, waafuile. Lyonse waali wankwasia kimupasi ni kupata bintu binge bingi bya kimubili binaali nakabiile. Ku kulonghaana kwaakoonkelepo kisia kufua kwakue, naali ni miilo ya kusoma mafungu mu Lisambililo lya Lupungu Lwakue Kamwenenena. Naasomene mpaka ku mafungu abili a ntendeko, inzi, naatendekele kulila ni mensozi aali apitasie. Naafuminesie ku jukwa.

Naatendekele kwiunvua buino musita balupua kufuma mu kilonghaano kinge lubaaizile kutukwasia mu Orealla. Kabili, biro ya Musambo, yaatumine painia umo ebeleele ali wakuutua Kojo. Ndi ni nsaansa paantu mama wane ni mwalawane umo, baatendekele kusambilila ni kubatiziiwa. Kisia, mu Muezi wa 03, 2015, naalukile mubombi ali wabombela. Kisia musita kampanda, naalandile lyasi lyane lya mambo lya bantu bonse. Bobo busiku, naalangulukile naali mukuseka ni kulila mensozi a nsantilo palua milandu yaalandile Granville miaka ingi ntaanzi. Waalandile eevi: “Busiku bumo, wakalanda lyasi lya bantu bonse. Kakiine wakaviinda.”

Mu ntantiko ya JW Télédiffusion, ndi nasambilila palua Bakasininkizia bali mu aali ipaleene ni yane. Inzi, anzia kine balemeene, bali baviinda kukita bintu bingi kabili bali ni nsaansa. Ni neene kunti naviinda kukita bintu kampanda. Nkulu yane ya kumupeela Yehova maka ankili nao, yaankinkiziizie kwaluka painia wa loonse. Kabili mu Muezi wa 09, 2019, naapatile mpunda i nsiali naswapiile! Mu ozo Muezi, naapatile mpunda nangue naakitabilua kwaluka mukote mu kilonghaano kyetu kilimo bakasimika 40 eevi.

Ndi mukutasia balupua ni bankazi baasambiliile pamo ni neene ni kunkwasia kumubombela Yehova. Kikililepo, ndi mukumutasia saana Yehova paantu andangulukile.