Lakotɔ lo 1983. L’ɛnɔnyi w’etatelo ka lɔsɛnɔ lami, laki la yoonge ya dimɛna, koko etena kakimi l’ɛnɔnyi dikumi, lakatatɛ mboka demba diami di’otondo kandji kandji. L’ɔkɔngɔ w’ɛnɔnyi oko ehende, laketɔ la pindju kɛmɔtshi, koko dimi kokoka monɛɛ. Lakasale la wolo dia dimi monyiya ekolo ami, koko dimi kokoka monɛɛ. Oma ko lo lushi lɔsɔ, dimi kokoka nkɛndakɛnda nto. Hemɔ kami kakakonya nto diaha dimi mbola. Ɛlɔ kɛnɛ, lekɔ mondo oko ɔna dikɛnda.

Ngɔndɔ ngana l’ɔkɔngɔ etena kakimi paka la ngelo, Ɛmɛnyi wa Jehowa ehende wakaye ndjomembola. Etena kakayaka anto la ngelo, mbala efula dimi lakayashɛka, koko lushi lɔsɔ laketawɔ dia wamato asɔ nsawola la mi. Etena kakawatɛkɛta dikambo dia Paradiso, lakohɔ kɛnɛ kakamoke etena kakimi l’ɛnɔnyi oko etanu. L’etena kɛsɔ, misiɔnɛrɛ welɛwɔ Jethro, wakadjasɛka la Suriname, akembolaka ngelo kaso mbala ɔtɔi lo ngɔndɔ ndo nde akatatɛ mbetsha papa Bible. Jethro akasalɛka akambo la ngandji k’efula. Dimi lakɔngɛnangɛnaka efula. Ndo nto, watshɛmi wakatshɔka la mi lo nsanganya mɔtshi y’Ɛmɛnyi wa Jehowa yakasalemaka lo ngelo kaso. Diakɔ diele etena kakamimbola Florence, womoto ɔmɔtshi l’atei wa wanɛ wakaye ndjomembola lushi lakɔ, dia kana dimi nangaka mbeya akambo efula, lakate nte eelo.

Florence akayoya ndjomembola nde l’omɛnde, Justus ndo vɔ wakatatɛ mbeka la mi Bible. Etena kakawɛnyi dia dimi haleye mbadia, vɔ wakambetsha woho wa mbadia. L’ɔkɔngɔ w’etena kɛmɔtshi, lakayotatɛ mbadia dimɛ. Lushi lɔmɔtshi, wadi l’omi asɔ wakambitɛ dia wambaatoma dia tokamba la Suriname. Lonyangu ko, ndooko onto lo Orealla lakakoke ntetemala mbeka la mi Bible. Koko, dui di’ɔngɛnɔngɛnɔ ko Jehowa akaname lo yimba yande.

Yema tshitshɛ oma laasɔ, ombatshi mboka welɛwɔ Floyd akaye lo Orealla, nde akɛnana la mi etena kakandatasambishaka lo luudu la luudu. Etena kakandasawola la mi lo dikambo dia wekelo wa Bible, dimi lakamɔnamɔna. Nde akamimbola ate: “Lande na kamɔnamɔnayɛ?” Lakawotɛ dia lakashile mbeka biukubuku Kakɔna katɔlɔmba Nzambi? ndo lambotatɛka mbeka dibuku Ewo katɔla otsha lo lɔsɛnɔ la pondjo. * Lakoolembetshiya lande na kakayemala wekelo. Floyd akayeka la mi totshapita takatshikala ta lo dibuku Ewo, koko oma laasɔ nde la wɔ wakootome dia tokamba dihole dikina. Dimi komonga nto l’ombetsha wa Bible.

 Koko, lo 2004, Granville la Joshua, wanɛ waki ambatshi mboka ahende wa laande, wakatomama lo Orealla. Vɔ wakatasambishaka lo luudu la luudu, ndo wakatane. Etena kakawamimbola dia kana dimi lakalangaka mbeka, dimi lakamɔnamɔna. Dimi lakaalɔmbɛ dia sho mbeka dibuku Ewo oma l’etatelo. Lakalangaka menda dia kana awui wayowombetsha fɔnaka la wanɛ wakambetsha embetsha ami wa ntondo. Granville akambitɛ dia nsanganya yekɔ lo salema lo ngelo kaso. Lam’ele dimi komimɔ oma la ngelo l’edja k’ɛnɔnyi oko dikumi, lakalangaka mbɔtɔ nsanganya shɔ. Diakɔ diele Granville akaye la ngelo ndo akambahenya lo kɔsa k’etshimbi ko akapuse otsha lo Mbalasa ka Diolelo.

L’ɔkɔngɔ diko, Granville akakeketsha dia dimi fundja lokombo lo Kalasa k’olimu wa teokrasi. Nde akate ate: “Wɛ ekɔ l’ɛkɔmɔ, koko wɛ koka ntɛkɛta. Lushi lɔmɔtshi, wɛ ayosha sawo dia lo sɛkɛ. Dui sɔ diayosalema.” Ɛtɛkɛta ande w’ekeketshelo wakambisha dihonga.

Lakatatɛ nsambisha kaamɛ la Granville. Koko, toshinga ta lo ngelo kaso efula taki kɔlɔ dia kɔsa k’etshimbi mbeta. Diakɔ diele, lakatɛ Granville dia nde mbidjashiyami lo pusupusu ndo nde tapusaka. Dui sɔ diakonge l’etombelo w’amɛna efula. Lo Ngɔndɔ ka nɛi 2005, lakabatizama. Yema tshitshɛ oma laasɔ, anangɛso wakandowanya dia dimi kambaka lo lɔkɔtɔ l’ekanda la l’etshumanelo ndo lo sɔnɔrizasiɔ ka lo Mbalasa ka Diolelo.

Lonyangu ko, oma laasɔ lo 2007 papa akavu lo aksida wa lo masuwa. Nkumbo kaso kaki l’ɔkɛyi w’efula. Granville akalɔmbɛ kaamɛ la so ndo akatadiyɛ avɛsa amɔtshi w’esambelo. Ɛnɔnyi ehende l’ɔkɔngɔ, takonge l’ɔkɛyi w’efula nto, Granville akavu lo aksida wa lo masuwa.

Etshumanelo kaso ka tshitshɛ kaki l’ɔkɛyi efula, komonga nto l’ekumanyi, koko l’okambi wakimanyiya ɔtɔi. Nyɔi ka Granville kakatosha ɔkɛyi efula; nde aki ɔngɛnyi ami w’oshika. La kɔlamelo tshɛ nde akakimanyiya dia nkotsha ehomba ami wa lo nyuma ndo wa lo demba. Lo losanganya lakayelana la nyɔi kande, laki l’ɔkɛndɛ wa mbadia edingɔ lo Wekelo wa Tshoto y’Etangelo. Lakaadia edingɔ ehende w’etatelo, ko lakatatɛ ndela ndo asɔyi wakatetemala nkɛla. Ko lakaholɔ oma lo lɔyɛnga.

Lakatatɛ ndjaoka dimɛna etena kakaye anangɛso oma l’etshumanelo kekina dia ndjotokimanyiya la Orealla. Ndo nto, Bɛtɛlɛ akatome Kojo, ombatshi mboka wa laande. Laki l’ɔngɛnɔngɛnɔ, nɛ dia mama ndo kosɛmi ka pami wakatatɛ mbeka ndo wakabatizama. Oma laasɔ, lo Ngɔndɔ ka sato 2015, lakasɔnama oko okambi wakimanyiya. L’ɔkɔngɔ w’etena kɛmɔtshi, lakasha sawo diami dia ntondo dia lo sɛkɛ. Lushi lɔsɔ, lakohɔ l’ɔmɔnɔmɔnɔ ndo la asɔyi wa lowando kɛnɛ kakambitɛ Granville ambeta ɛnɔnyi efula ate: “Lushi lɔmɔtshi, wɛ ayosha sawo dia lo sɛkɛ. Dui sɔ diayosalema.”

Lo JW Televiziɔ^®, lakeye dia asekaso Ɛmɛnyi wa Jehowa ɛmɔtshi wekɔ l’okakatanu wele oko wami. Koko kaanga mbewɔ la dikɔmɔ, vɔ salaka awui efula ndo wekɔ l’ɔngɛnɔngɛnɔ. Lo wedi ami, dimi koka nsala akambo amɔtshi. Dimi nangaka mbisha Jehowa kɛnɛ kemi l’akoka, diakɔ diele lakatatɛ nkamba oko ombatshi mboka wa pondjo. Ndo lo Ngɔndɔ ka divwa 2019 lakalongola losango lakimi konongamɛka! Lo ngɔndɔ kɛsɔ wakambitɛ dia dimi lambɔsɔnama oko ekumanyi l’etshumanelo kaso k’apandjudi oko 40.

Lekɔ la lowando le anangɛso l’akadiyɛso wa ngandji wakeke la mi Bible ndo wakakimanyiya dia dimi kambɛ Jehowa. Ndo kɛnɛ koleki tshɛ ele, lekɔ la lowando le Jehowa lo woho wakandaname lo yimba yande.