Ndikuwa mu 1983. Ndeche mwana ndakuwanga umampha ŵaka. Kweni ndati ndafika vyaka 10, ndingwamba kuvwa urwirwi ukulu ukongwa liŵavu losi. Pati pajumpha vyaka pafufupi viŵi, zuŵa linyaki ndati ndayuka waka ndinguleka kwenda. Ndinguyesesa kuti panyaki ndingayenda, kweni ndengavi nthazi zakwende. Kutuliya pa zuŵa lenili, ndinguleke limu kwenda. Nthenda yo nditama, yachitiskanga so kuti ndilekengi kukuwa. Ndipu mpaka sonu ndeche kuwoneka nge mwana.

Pati pajumpha myezi yimanavi kutuliya po ndingwambiya kutama, kunyumba kwidu kunguza Akaboni aku Yehova ŵaŵi. Kanandi asani kunyumba kwidu kwaza alendu, ndabisamanga. Kweni pa zuŵa ili ndinguzomereza kuti akambiskani nani. Ŵanthu ŵenaŵa achikamba vakukwaskana ndi Paradayisu, ndingukumbuka vo ndinguvwa pa nyengu yo ndenga ndi vyaka vinkhondi. Pa nyengu yeniyo, mumishonale munyaki zina laki Jethro yo wajanga ku Suriname, wazanga muchigaŵa chidu kamoza pa mwezi, ndipu wasambiranga Bayibolu ndi ada. Jethro wachitanga nani vinthu mwachanju, ndipu ndamuyanjanga ukongwa. Kweniso nyengu zinyaki agogu alutanga nani ku maunganu nga Akaboni ngo ngachitikanga mumuzi mwidu. Yumoza mwa anthukazi ŵaŵi wo anguza kunyumba kwidu zina laki Florence wati wandifumba asani ndikhumba kuziŵa vinandi, ndinguzomera.

Zuŵa linyaki, Florence ndi mulumu waki Justus anguza so kunyumba kwidu. Ndipu angwamba kusambira nani Bayibolu. Yiwu ŵati aziŵa kuti ndikuziŵa cha kuŵerenga, angundisambiza kuŵerenga. Pati pajumpha nyengu ndingwamba kuŵerenga pakundija. Zuŵa linyaki, yiwu angundikambiya kuti aŵatumiza kuti akateŵetiyengi ku Suriname. Kweni vachitima kuti ku Orealla kwengavi so munthu munyaki wakuti wangalutirizga kusambira nani Bayibolu. Kweni vakukondwesa ukongwa kuti Yehova wangundiluwapu cha.

Pati pajumpha nyengu yimanavi, ku Orealla kunguza mpayiniya munyaki zina laki Floyd, ndipu iyu wangukumana nani panyengu yo wapharazganga nyumba ndi nyumba. Iyu wati wandikambiya kuti tisambirengi Bayibolu, ini ndingumwemwete. Iyu wangundifumba kuti: “Ntchifukwa wuli umwemwete?” Ini ndingumumuka kuti ndikumaliza kali kusambira kabuku kakuti Kumbi Chiuta Wakhumbanji Kwaku Isi? ndipu ndingwamba kusambira so buku lakuti Chidziŵitso Chotsogolera ku Moyo Wosatha. * Ndingumukambiya chifukwa cho ndinguleke kusambira. Floyd wangumaliza kusambira nani  buku la Chidziŵitso. Kweni pavuli paki, nayu angumutumiza kuti wakateŵetiyengi kunyaki. Yapa napu ndengavi munthu wakuti wangandisambiza Bayibolu.

Chinanga kuti venga viyo, mu 2004, ku Orealla kunguza apayiniya apade ŵaŵi, Granville ndi Joshua. Yiwu angukumana nani panyengu yo apharazganga nyumba ndi nyumba. Yiwu ŵati andikambiya kuti asambirengi nani Bayibolu, ndingumwemwete. Ndinguŵapempha kuti ayambi kusambira nani buku la Chidziŵitso kwamba pakwamba. Ndakhumbanga kuwona asani yiwu andisambizengi vinthu vakuyanana ndi vo angundisambiza ŵanthu wo andisambizanga pakwamba. Granville wangundikambiya kuti mumuzi mwidu muchitika maunganu. Chinanga kuti kwa vyaka pafufupi 10 ndatuwangapu cha panyumba, kweni ndakhumbanga kuluta ku maunganu. Mwaviyo, Granville wanguza kuzindito. Iyu wangundiŵika panjinga ya ŵanthu akupunduka ndipu wanguluta nani ku Nyumba ya Ufumu.

Pavuli paki, Granville wangundichiska kuti ndilembesi mu Sukulu ya Uteŵeti wa Ufumu. Iyu wangukamba kuti: “Chinanga kuti ukupunduka, kweni ulongoro. Zuŵa linyaki, wazamukamba nkhani yachisanisani. Vazamuchitika nadi.” Vo iyu wangukamba, vingundichiska.

Ndingwamba kupharazga limoza ndi Granville. Kweni nthowa zinandi mumuzi mwidu zenga ndi vibokuboku, mwakuti venga vakusuzga kuti njinga ya ŵanthu akupunduka yiyendi. Mwaviyo, ndingupempha Granville kuti wandipingengi mu wilibala pakuluta kuchipharazga. Venivi vinguwovya ukongwa. Ndingubatizika mu April 2005. Pati pajumpha nyengu yimanavi, abali angundisambiza kuti ndiwoneriyengi mabuku kweniso kuti ndiphweriyengi vakukuziya mazu mu Nyumba ya Ufumu.

Kweni vachitima kuti ada angufwa pangozi ya boti mu 2007. Banja lidu lingukwaskika ukongwa. Granville wangupemphere nasi limoza ndipu wangutiŵerenge Malemba ngakuchiska. Pati pajumpha vyaka viŵi, tingukwaskika so ukongwa chifukwa Granville nayu wangufwa pangozi ya boti.

Weyosi mu mpingu mwidu wenga ndi chitima ndipu mwengavi mura weyosi. Kweni mwenga ŵaka mteŵeti wakovya yumoza pe. Nyifwa yaku Granville yingundidumuwa nkhwamba chifukwa iyu wenga munyangu wapamtima. Nyengu zosi iyu wandiwovyanga kusaniya vinthu vo ndakhumbikanga kweniso kuja paubwezi wakukho ndi Yehova. Pa maunganu nga mpingu ngo tinguchita pati pajumpha mazuŵa ngamanavi iyu wati watayika ŵaka, ndachiŵerenganga ndimi pa Sambiru la Chigongwi cha Alinda. Ndingumaliza umampha kuŵerenga ndimi ziŵi zakwambiriya, kweni pavuli paki ndingwamba kuliya ndipu masozi ngadikanga ŵaka. Mwakuti ndingutuwapu ŵaka papulatifomu.

Ndingwamba kukondwa chifukwa kungwamba kuza abali a ku mpingu unyaki kuzitiwovya kunu ku Orealla. Kweniso ofesi ya nthambi yingutitumiziya mpayiniya wapade munyaki zina laki Kojo. Ndingukondwa ukongwa ama ndi mvurwa wangu ŵati ayamba kusambira Bayibolu ndipu pavuli paki angubatizika. Pavuli paki, mu March 2015, ndinguŵikika kuja mteŵeti wakovya. Pati pajumpha nyengu, ndingukamba nkhani yakwamba yachisanisani. Pa zuŵa lenili, ndinguliya chifukwa cha likondwa ndati ndakumbuka vo Granville wangundikambiya vyaka vinandi kuvuli. Iyu wangundikambiya kuti: “Zuŵa linyaki, wazamukamba nkhani yachisanisani. Vazamuchitika nadi.”

Kuziya mu pulogiramu ya JW Broadcasting^® ndaziŵapu abali ndi azichi wo ŵe ndi suzgu yakuyanana ndi yangu. Chinanga kuti yiwu akupunduka, kweni afiska kuchita vinthu vinyaki ndipu akondwa. Nani so ndifiska kuchita vinthu vinyaki. Chifukwa chakuti ndikhumba kuteŵete Yehova ndi nthazi zangu zosi, lekani ndikwamba kuchita upayiniya wa nyengu zosi. Mu September 2019, ndingulonde uthenga wakukondwesa ukongwa. Mu mwezi wenuwu, ndinguŵikika kuja mura mu mpingu widu wo we ndi apharazgi pafufupi 40.

Nditiŵawonga ukongwa abali ndi azichi wo asambiranga nani Bayibolu kweniso kundiwovya kuti ndite ŵetiyengi Yehova. Kweni chakuluska vosi, nditimuwonga ukongwa Yehova chifukwa chakuti wakundiluwapu cha.