Nyi velegidwe khu 1983. Ndrani nya myaga nyo pheye nya womi wangu nyi diri ni womi nya wadi, ganiolu, tepo nyi nga ba nyiri ni 10 myaga, nyi di pheya gupwa guvbisa givilini gyangu gyatshavbo. Hwane nya myaga mivili, litshigu limwedo nyi di wuga ni dzimindru na nyi si kodzi gu dzi khuta. Nyi di zama gu khutha-khutha mawundru yangu, ganiolu nyi diri mwalo tshivba gasi gu ma gira ma tiya nyi kodza gu gimbiya. Gukhugeya litshigu lolo, kha nya guti gambe gu gimbiya. Madwali yangu ma giride gu givili gyangu gi ema gu dandra. Muhuno nyi ngari mudugwana nga khatshi nyi gyanana.

Tepo ma nga pheya madwali yaya, nyi khade gaya nya mba duga khu migima nyo khaguri. Khu tepo yoyo, nyi endredwe khu Dzifakazi dzimbili dza Jehovha. Tepo va nga ba vata vathu nyo khaguri gasi guta nyi wuseya, nyi di gu tala gu sihala, ganiolu litshigu lolo kha nya sihala, nyi di gu vbweta gupwa esi vanyamayi vale va nga ba va si tisa. Tepo va nga ba va ganeya khu Paradhesi nyi di dundruga esi nyi nga ba nyi sipwide tepo nyi nga ba nyiri ni 5 myaga. Khu tepo yile, misiyonariyo moyo nyo pwani khu Jethro, a nga ba a vbanya Suriname, a di gu endreya gidhoropana gyathu gumogo khu ngima nigu dzude a ta hevbula Bhibhiliya ni papayi wangu. Jethro nyi pharide khu ndziya nya yadi ngudzu. Isoso si nyi giride nyi mu gola ngudzu. Nigu vavhovho vangu va nyi dzegide nyi hongola gumogo navo mitshanganoni nya Dzifakazi dza Jehovha yi nga ba yi giredwa gidhoropanani gwathu. Khu kharato, tepo Florence, moyo nya vanyamayi vale va nga nyi endreya a nga nyi wudzisa gu khuye ina nyi ngu si tsakeya gu hevbula Bhibhiliya, nyi di kheni ina.

Florence a di wuya mi mwama waye, Justus, ga liendro li nga landreya. Nigu va vavili va di pheya gu hevbula Bhibhiliya ni eni. Tepo va nga si tugula gu khavo kha nyi si kodzi gu leri, avo va di nyi phasedzeya gu hevbuleya gu leri. Hwane nya tepo nyo khaguri, nyi di gu si kodza gu leri nyabune. Litshigu limwedo avo va di nyi embeya gu khavo va vbindrugedzidwe nigu va rumedwe gasi gu ya thumeya Suriname. Egi gi nga nyi vbedzanyana tshivba khu gu gu diri mwalo muthu Orealla a nga hadzi simama gu hevbula ni eni Bhibhiliya. Ganiolu, nyo tsakise khu gu Jehovha gima kha nyi divala.

Gitepwana hwane nya isoso, piyonero moyo nyo pwani khuye Floyd a di vboha Orealla. Uye a di gimbiya a manana ni eni tepo a nga ba a tshumayela khu ndranga ni ndranga. Tepo a nga ganeya ni eni maningano ni gu hevbula Bhibhiliya, nyi di tsaka. Uye a di nyi wudzisa gu khuye: “Khu ginani u tsakago?” Nyi di mu embeya gu kheni nyi di hevbude ni Dzifakazi dza Jehovha bruxura O Que Deus Requer de Nós? nigu nyi di gu phede gu hevbula libhuku Conhecimento Que Conduz à Vida Eterna. * Nyi di mu tshamuseya gu kheni khu ginani nyi nga ema gu hevbula. Floyd a di vbedzisa gu hevbula ni eni libhuku leli, ganiolu khu landreya anuye a di vbindrugedzwa a rumedwa  guya thumeya wumbe wulanga. Nyi di tshala gambe nya mba na muthu gasi gu nyi hevbudza Bhibhiliya.

Ambari ulolo, khu 2004, Granville ni Joshua, vapiyonero vavili va di rumedwa gasi guta thumeya Orealla. Avo va di gu tshumayela khu ndranga ni ndranga nigu anavo va mananide ni eni. Tepo va nga nyi wudzisa gu khavo ina nyi ngu si tsakeya gu hevbula Bhibhiliya, nyi di tsaka. Nyi di va lomba gu kheni va pheledza gu hevbula ni eni libhuku Conhecimento Que Conduz à Vida Eterna. Nyi di gu vbweta gu wona gu kheni ina va na nyi hevbudza silo sasimweso nyi hevbudzidwego khu Floyd gani! Granville a di nyi embeya gu khuye yi di gu girwa mitshangano gidhoropanani gwathu. Ambari olu nyi nga ba nyiri ni tanga nya 10 myaga na nyi si khugi khu gaya nyi di gu vbweta gu hongola. Khu kharato, Granville a dita gaya gwangu, a ta nyi dzega a nyi khadzisa vbagikaderanatunu nya marodha, a hongola ni eni Salawuni nya Mufumo.

Khu hwane nya tepo, Granville a di nyi kutsa gu dzi lovedzisa avba nya Xikola nya Wuthumeli nya Mufumo. A di nyi embeya khuye: “U gilima ganiolu u ngu kodza gu ganeya. Litshigu limwedo, u na gira ambari ganelo ya guagani. U nga kanakani, u na si kodza.” Malito yaye ma kutsago ma nyi ningide ngudzu tshivba.

Nyi di pheya gu tshumayela ni Granville. Ganiolu, kha sa nga ba si kodzega gu gimbiya khu kadera yangu nya marodha omu nya dziruwa nya dzingi dza gidhoropanani gwathu. Khu kharato, nyi di lomba gu kheni Granville a nyi khadzisa avba nya gikarinyana a nyi txovha khigyo. Isoso si nyi phaside ngudzu. Khu Abril nya 2005, nyi di bhapatiswa. Nigu gitepwana hwane nya isoso, vandriyathu va di nyi hevbudza gu khathaleya mabhuku nya libandla ni gu thumisa mitshini nya wutsendze hi nga ba hi yi thumisa Salawuni nya Mufumo.

Ya walo khu gu khu 2007, papayi wangu a difa avba nya mhango nya ngalava. Ndranga yathu yi di gu vbede ngudzu tshivba khu kotani nya esi si nga girega. Ganiolu, Granville gombede ni eni a bwe a nyi tiyisa khu milowo nyo khaguri. Hwane nya myaga mivili, gu di dugeleya yimbe mhango yi nga nyi vbedza ngudzu tshivba. Granville nuye a difa avba nya mhango nya ngalava.

Libandla lathu nya lidugwana li diri mwalo gambe lidhota, li di gu tshade basi ni muphasedzeyi moyo nya libandla. Gufa ga Granville gu nyi vbiside ngudzu monyo; uye a diri pari yangu nya yikhongolo ngudzu. Uye nyi phaside khu monyo waye watshavbo gu dandra khu liphuvboni ni gu khathaleya simbe si nga ba si nyi keneleya khu nyamani. Ga tshangano wu nga landreya hwane nya gufa gwaye, nyi di lombwa gu leri dzindrimana avba nya Gihevbulo nya Mukhedziseyi. Nyi phede gwadi gu leri ndrimana nyo pheye ni eyi nya wuvili, ganiolu nya wuraru kha nya yi gwetari, nyi di pheya gu liya ngudzu, marongo ma di gu gira khu gu vbalageya. Nyi di yede gu khuga khu vbagiluvelotunu.

Nyi phede gu dzipwa tshukwana tepo vandriyathu va limbe libandla va ngata vata hi phasedzeya gidhoropanani gyathu, Orealla. Gimbe gambe khu gu Bheteli yi di rumeya, Kojo, piyonero moyo nyo hathege. Nigu gimbe gambe gi nyi ningidego gutsaka nya gukhongolo khu tepo mamayi wangu ni ndriyangu nya nandra va nga hevbula lisine va bwe va bhapatiswa. Khu gu landreya, khu Março nya 2015, nyi di emiswa kha nga muphasedzeyi nya libandla. Hwane nya gitepwana nyo khaguri, nyi di vega ganelo yangu ya guagani nyo pheye. Litshigu lolo, nyi di dundruga na ma gu pfhurugeya marongo, malito nyi nga ba nyi embedwe khu pari yangu Granville: “Litshigu limwedo, u na gira ambari ganelo ya guagani. U nga kanakani, u na si kodza.”

Khu gu thumisa milongoloko nya JW Broadcasting^® nyi ngu hevbula khu simbe siyeyedzo nya vandriyathu va gomogo ga giemo nyo fane ni gyangu. Ganiolu, ambari olu va gu silima, avo va ngu gireya Jehovha silo nya singi nigu va tsakide. Aneni nyi nga gira sasimweso. Khu kharato, nyi di manega ni gudogoreya nya gukhongolo nyo thumise tshivbana yeyi nya yidugwana nyi gu nayo gasi gu gireya nya singi Jehovha. Khu kharato, nyi di pheya gu thuma kha nga piyonero nya tepo yatshavbo. Khu gu landreya, khu Setembro nya 2019, Jehovha a nyi ningide lithomo nya likhongolo ngudzu. Khu ngima wowo, nyi di emiswa kha nga lidhota nya libandla lathu, ilo li gu na ni tanga nya 40 vahuweleyi.

Nyi ngu va bonga kamo ngudzu vandriyathu va hevbudego ni eni Bhibhiliya va bwe va nyi phasa gu thumeya Jehovha. Nigu nyi ngu mu bonga ngudzu Jehovha kholu a nga mba nyi divala.