Ndzi pswalilwe hi 1983. Na ndza ha hi mutsongwani ndzi wa hi n’wanana wa mu nene. Kanilezvi a cikhati ndzi nga hi ni 10 wa malembe ndzi no sangula kuzwa kubayisa ka hombe lomu mirini wontlhe. Andzhako ka cipimo ca malembe mambiri, ka siku go kari gi noca na ndzi nga ha zvi koti ku suka. Hambu loku ndzi zama ku suka, a minenge ya mina yi wa nga hi na ntamu. Kusukela siku lego, a ndza ha zvi koti ku famba. A wubabyi legi gi tlhelile gi maha ku ndzi nga ha kule. A miri wa mina wa ha hi wutsongwani a ku khwatsi wa n’wanana.

A siku hi nga endzelwa hi Vakustumunyu vambiri va Jehovha laha kaya, ndzi wa hi ni tihwetana na ndzi nga suki laha kaya. Loku kuta vapfhumba, a kutala ka zvikhati ndzi wa zama ku fihlala kanilezvi a siku lego ndzi no vhumela ku bhula ni vavasati lavo. A cikhati va nga wulawula hi paradhise, ndzi no alakanya lezvi ndzi nga zvi zwile na ndzi hi ni cipimo ca 5 wa malembe. Ka cikhati leco, ku wa hi ni murumiwa waku hi Jethro, a nga tshama le Suriname, a ngata lomu ka cidhoropana ca hina khati gin’we hi hweti a tlhela a ta gondza Bhibhiliya na papayi. Jethro i wa ndzi khoma khwatsi. Ndzi wa mu randza nguvhu. A vakokwani va mina va ku pswala papayi vonawu va wa famba na mina ka mitlhangano yo kari ya Vakustumunyu, yi nga mahelwa lomu cidhoropaneni ca hina. Hikwalaho, a cikhati Florence, ku nga mun’we wa vasati lava va nga tile laha kaya, a nga ndzi wutisa ku ndza zvi lava ku gondza zvin’wani ke, ndzi no hlamula ku ina.

Florence i no wuya na a hi ni nuna wakwe Justus va ta sangula ku gondza na mina Bhibhiliya. A cikhati va nga pola ku ndzi wa nga zvi tivi ku lera va no ndzi gondzisa. Andzhako ka cikhati co kari, ndzi no sangula ku zvi kota ku lera ha ndzoce. Ka siku go kari Florence ni nuna wakwe va no ndzi byela ku va rumelwe ku ya tira le Suriname. A ya hava hiku ku wa nga hi na mun’wani wa ku sala ndzi simama ku gondza naye Bhibhiliya. Kanilezvi a co tsakisa hiku Jehovha a nga ndzi rivakelwangi.

Cikhatanyana ndzhako ka lezvo, ku nota phayona lomu Orealla, gaku hi Floyd, a ndzi kuma na a chumayela hi muti ni muti. A cikhati a nga bhula na mina hi cigondzo ca Bhibhiliya ndzi no n’wayitela. A se ndzi wutisa ku “u n’wayitela hikuyini?” Ndzi mu hlamula ku ndzi gondzile a broxura Zini Lezi Nungungulu A Zi Lavako Ka Hina? ndzi tlhela ndzi sangula a bhuku Conhecimento Que Conduz à Vida Eterna. * Ndzi no mu tlhamusela ku hikuyini ndzi nga nyimile ku gondza. Floyd i no gondza na mina a bhuku Conhecimento  hi mbheta kanilezvi yenawu i no gumesa a rumelwa kuya tira kun’wani. Ndzi sala kambe na ndzi nga hi nga wa ku gondza naye.

Hambulezvo, hi 2004, ku no rumelwa a maphayona mambiri yo hlawuleka yaku hi Granville na Joshua lezvaku va ta tira Orealla. Va ndzi kuma na va chumayela hi muti ni muti. A cikhati va nga ndzi wutisa ku ndza zvi lava ku gondza ndzi no n’wayitela. Ndzi va kombela ku va tlhela va sangulisa ku gondza na mina a bhuku Conhecimento. Ndzi wa lava ku wona lezvaku va wa ta ndzi gondzisa zvalezvi ndzi nga sina ndzi gondzisilwe ke. Granville i no ndzi byela ku a mitlhangano yi mahelwa le dhoropeni. Hambu lezvi ndzi nga hi ni cipimo ca 10 wa malembe na ndzi nga suki laha kaya, ndzi wa zvi lava kuya yi wona. Hikwalaho Granville i nota a ta ndzi tlakula a ndzi tshamisa laha ka cikarinyana a ndzi chovha hiya Salawu ya Mufumo.

Hi kufamba ka cikhati, Granville i no ndzi kuca ku ndzi ti tsalisa ka Cikola ca Wutireli ga Nungungulu. I te: “U cilima kanilezvi u nga zvi kota ku kanela. A siku gin’we u ta veka a kanelo ya vanhu vontlhe. Lezvo zvi ta maheka futsi.” A magezu yakwe yo tiyisa ma ndzi nyikile kutsumba.

Ndzi no sangula kuya kuchumayeleni na Granville. Hambulezvo a maruwa yo tala lomu cidhoropaneni ca hina ma wa hi ni makhele nguvhu kasi ku famba hi cikarinyana. Hikwalaho ndzi no kombela Granville a ku a ndzi peta lomu ka wilibhala a ndzi chovha. Lezvo zvi vhunile nguvhu. Hi Abril wa 2005 ndzi no bhabhatisiwa. Zvalezvo a vamakabye va no ndzi gondzisa a ku hlayisa a mabhuku ya bandla ni ku tirisa michini ya som ya Salawu ya Mufumo.

A ya kubiha hiku a papayi wa mina i nofa hi 2007 ka mhango ya ngalava. A ngango wa mina wu no karateka nguvhu. Granville i no khongela na hina a tlhela a hi gondzela a mitsalo yo kari yo tiyisa. Andzhako ka malembe mambiri hi no tlhela hi bayiseka nguvhu a cikhati Granville a ngafa ka mhango ya ngalava.

A cibandlana ca hina ci wa sele wusiwaneni ga hombe; hi wa nga hi na dhota, a kova ni nandza gin’we go vhunetela. A kufa ka Granville ku ndzi pandzile mbilu, i wa hi munghana wa mina wa hombe. Contlhe cikhati i wa ndzi vhuna hi tlhelo ga nyama ni ga moya. Ka mutlhangano wu nga landzela andzhako ka kufa kakwe, ndzi wa avelwe ku lera a tindzimana ta Cigondzo ca Murindzeli. Ndzi no kota ku lera a tindzimana timbiri basi to sangula, kanilezvi ndzi no gumesa ndzi sangula ku rila. Zvi lavile ku ndzi suka laha ciluvelweni.

Ndzi sangulile ku tizwa khwatsi a cikhati leci a vamakabye va bandla gin’wani va ngata Orealla va ta hi vhuna. A hofisa ya ravi yi no rumela Kojo, a nga hi phayona go hlawuleka. Ndzi tsakile nguvhu kambe a cikhati a ndzisana ya mina ya mufana na mamani va nga sangula ku gondza Bhibhiliya va tlhela va bhabhatisiwa. Hi Março wa 2015, ndzi no yimisiwa kota nandza go vhunetela. Andzhako ka cikhati co kari, ndzi no veka kanelo ya mina yo sangula ya vanhu vontlhe. Ka siku lego, ndzi no tsaka ndzi tlhela ndzi rila a cikhati ndzi nga alakanya lezvi Granville a nga ndzi byelile ka malembe ndzhako zvaku: “A siku gin’we u ta veka a kanelo ya vanhu vontlhe. Lezvo zvi ta maheka futsi.”

Lomu ka JW Broadcasting^® ndza wona vamakabye va nga ka ciyimo co fana ni leci ca mina. Kanilezvi hambu lezvi va nga ni wulima go kari va zvi kota ku maha mitiro yo tala va tlhela va tsaka. Minawu ndza zvi kota ku maha zvo kari. A kuxuva ka mina ka ku lava ku mu mahela zvo tala Jehovha ku ndzi kucile a ku teka wuphayona ga cikhati contlhe. Hi Setembro wa 2019 ndzi no kuma mahungu yo tsakisa ndzi nga kala ndzi nga ma rindzelangi! Ka hweti leyo, ndzi no tiva lezvaku ndzi yimisilwe kasi ndzi tira kota dhota laha bandleni ga hina gi nga ni cipimo ca 40 wa vahuweleli.

A ndzo ku va bonga a vamakabye lava va gondzileko na mina va tlhela va ndzi vhuna ku tirela Jehovha. A ca hombe ka zvontlhe, ndzi bonga Jehovha hi lezvi a kalako a nga ndzi rivali.