Ne fanau au i te 1983. I tausaga kamata o toku olaga, ne ‵lei eiloa au, kae i te taimi ko sefulu oku tausaga, ne kamata o lagona ne au te ‵mae i toku foitino kātoa. E lua tausaga mai tua, ne ala aka au i se tafataeao kae sē mafai o gasue. Ne taumafai au o fakaga‵sue oku vae kae e se mafai. Talu mai te aso tenā, ne seki toe sasale eiloa au. Ne seki gasolo foki au o lasi ona ko toku masaki. Ke oko mai ki te aso nei, koi folikiliki eiloa au e pelā me se tamā tamaliki.

Ne seki mafai au o fanofano sāle, kae i se fia masina ki tua ifo ne āsi mai a Molimau a Ieova e tokolua. Kafai e isi ne tino ‵fou, e masani au o fano o ‵muni, kae ne talia ne au i te aso tenā ke fai‵pati mai a fāfine konā. I te taimi ne fai‵pati lāua ki te Palataiso, ne masaua ne au aku mea ne tauloto kae ko lima ei oku tausaga. I te taimi tenā, ne āsi mai se misionale e igoa ki a Jethro, telā e nofo i Suriname, ki te motou fakai kae suke‵suke mo toku tamana ki te Tusi Tapu. Ne alofa a Jethro ki a au. Ne fiafia malosi au ki a ia. Ne ave sāle foki au ne oku tupuna ki fakatasiga a Molimau kolā ne fai i te motou fakai. Tela la, i te fesilimaiga a Florence, se fafine tokotasi i fāfine kolā ne āsi mai i te aso tenā me fia tauloto au ki mea e uke atu, ne fai atu au, ao.

Ne toe āsi mai a Florence mo tena avaga ko, Justus, kae ne fai ne lāua taku akoga faka-te-Tusi Tapu. I te iloaga ne lāua me e se iloa ne au o faitau, ne fesoasoani mai lāua ke tauloto au o faitau. E seki leva, kae ko faitau au i a au eiloa. I te aso e tasi, ne fai mai lāua me ka olo atu lāua o ga‵lue i Suriname. Se mea fakafanoanoa me seai se tino i Orealla ke faka‵soko ne ia taku akoga. Kae se mea fakafiafia me ne masaua ne Ieova au i tena mafaufau.

E seki leva, kae oko mai se paenia e igoa ki a Floyd ki Orealla, kae ne fetaui maua i te faiga o tena galuega talai mai fale ki fale. I tena faimaiga e uiga ki se akoga faka-te-Tusi Tapu, ne fakamisikata au. “Kaia e fakamisikata ei koe?” ko ana pati. Ne fai atu au me ko oti au ne sukesuke ki te polosiua ko te Ne a Mea e Manako ki ei te Atua ke Fai ne Tatou? kae ko oti ne kamata i te tusi ko Te Iloaga Telā e Takitaki Atu ei ki te Ola Se-Gata-Mai. * Ne fai atu ne au te pogai ko se fai ei taku akoga. Ne faka‵soko ne Floyd taku akoga i te tusi ko te Iloaga, kae oti aka ko toe fano foki a ia o tavini i se isi koga. Ko seai foki se tino ke fai ne ia taku akoga faka-te-Tusi Tapu.

 Kae i te 2004, ne ‵mai a Granville mo Joshua, ne paenia fakapito e tokolua o tavini i Orealla. Ne fai te lā galuega talai mai fale ki fale maua ei ne lāua au. I te fesilimaiga me ko au e manako o fai taku akoga, ne fakamisikata au. Ne fakamolemole au ke fai ne lāua taku akoga i te tusi ko te Iloaga mai te kamataga. Ne fia iloa ne au me e mata, e ‵pau loa a mea e akoako mai ne lāua mo mea ne akoako mai ne oku faiakoga mua io me ikai. Ne fai mai a Granville me isi ne fakatasiga e fai i te fakai. E tiga loa e seki tiaki ne au toku fale i tausaga e tai katoa te sefulu, kae ne manako au o fano. Ne vau a Granville o puke au, tuku au ki luga i se nofoga fakatekateka kae usu ne ia au ki te Fale Tapuaki.

Fakamuli ifo, ne fakamalosi mai a Granville ke kau au ki te Akoga mō Tino Talai. Ana muna: “A koe e se mafai o sasale, kae mafai ne koe o faipati. I se aso e tasi ka fai ne koe se lāuga mō tino katoa. Ka tupu eiloa te mea tenā.” Ne maua ne au te loto talitonu mai ana pati fakamalosi konā.

Ne kamata au o olo sāle mo Granville i te galuega talai. Kae ko tō uke a auala ma‵sei ke ‵taki i ei se nofoga fakatekateka. Ne fai atu au ki a Granville ke usu ne ia au i loto i se uilipalo. Ne magoi eiloa te faifaiga tenā. I a Apelila 2005, ne papatiso ei au. Mai tua ifo, ne akoako au ne taina ke tausi ki tusi a te fakapotopotoga mo mea faka‵lasi leo i te Fale Tapuaki.

I te 2007, se mea fakafanoanoa me ne mate toku tamana i se fakalavelave ne tupu ki tena pōti. Ne ‵poi malosi te motou kāiga. Ne ‵talo fakatasi matou mo Granville kae fai mai ne ia ne manatu fakamafanafana mai te Tusi Tapu. E lua tausaga mai tua, ne ‵poi matou i te suā fakalavelave—ne mate a Granville i se fakalavelave ne tupu ki tena pōti.

Te fakapotopotoga foliki kae fanoanoa a matou ko seai se lotou toeaina kae tokotasi fua te tavini fesoasoani. Ne logo‵mae ‵ki au i te mate o Granville; a ia se taugasoa pele. Ne fesoasoani mai a ia mo te fakamaoni o tausi ki oku manakoga faka-te-agaga mo te feitu faka-te-foitino. I te fakatasiga mai tua o tena mate, ne ‵tofi aka au ke faitau a palakalafa i te Sukesukega ki te Faleleoleo Maluga. E lua palakalafa ne faitau ne au, kae ne kamata au o tagi, ko se mafai o taofi aka te ‵sali o loimata. Ne fanaifo au ki lalo mo te tulaga.

Ne kamata o toe fiafia au i te ‵maiga a taina mai te suā fakapotopotoga o fesoasoani ki a matou i Orealla. Ne uga mai foki ne te ofisa lagolago a Kojo, se paenia fakapito. Ne fiafia malosi au i te taimi ne kamata ei o fai a akoga a toku mātua mo toku taina foliki kae papatiso. Kae i a Mati 2015, ne ‵tofi ei au ke fai pelā me se tavini fesoasoani. Fakamuli loa, ne fai ei ne au taku lāuga muamua mō tino katoa. I te aso tenā, ne mafaufau au mo te fakamisikata mo loimata o te fiafia ki pati ne fai mai ne Granville i se fia tausaga ko ‵teka: “I se aso e tasi ka fai ne koe se lāuga mō tino katoa. Ka tupu eiloa te mea tenā.”

E auala i Leo Fakasalalau o te JW^®, ne iloa ne au a nisi taina Molimau kolā e tai ‵pau olotou tulaga mo au. Kae faitalia te lotou tulaga sē katoatoa, e ola latou i se olaga aoga kae fakafiafia. Kae penei mo au, koi isi ne mea e mafai ne au o fai. A toku manakoga ke tuku atu a mu malosi o oku koi ‵toe ki a Ieova ne fakamalosi mai ki a au ke paenia tumau. Kae ne maua eiloa ne au se tala fakapoi i a Setema 2019! Ne iloa ne au i te masina tenā me ko oti ne ‵tofi aka au ke tavini atu e pelā me se toeaina i te motou fakapotopotoga telā e toko 40 tino talai i ei.

E fakafetai au ki taina mo tuagane pele kolā ne fai ne latou taku akoga kae fesoasoani mai ke tumau au i te tavini ki a Ieova. Kae sili i mea katoa, e fakafetai malosi eiloa au me ne masaua ne Ieova au i tena mafaufau.