Ndakabarhwa mu gore ra 1983. Mumakore ekutanga e upenyu wangu, ndainga no upenyu uri nani, asi pendainga no makore gumi ndakatanga kurhwadziwa mwiri wangu. Kadarika makore mairi, zuwa rimweni ce macibesi, ndakamuka ndisikakwanisi kupurumuka. Kunyazi ndaiedza kupurumuka asi murenje dzangu dzainga dzisina simba. Kubva zuwa irona andizozi kuhambazve. Nhenda yangu yakandiitawo kuti ndisakure. Nanyamasi ndiciri mudoko hingana mwana mudoko.

Ndainga ndaa no mwedzi miiri ndisikabudi pa nyumba dakara petakavhakacirhwa nge Apupuri a Djehovha. Pese paiguma avhakaci, inini ndaifindara, asi pa zuwa irona, ndakasiya anakadzi aya kuti arekete neni. Paaireketa nge zve Paradhizo, ndakaedzurira zvendakazwa pendainga ndinomakore mashanu. Pa nguwa iyona, mu missionario umweni unozwi Jethro, waigara ku Suriname, waivhakacira maridheya edu kamwe pa mwedzi uye waifunda Bhaibheri na baba angu. Jethro waindibata zvakanaka. Ndaimupfarira maningi. Madzitsekuru angu aisonditorawo ku misangano ye Apupuri a Djehovha, yaiizwa mu mardheya edu. Hino Florence umwe we anakadzi akandivhakacira wakandibvunzisa kuti ndaida kufunda zvakawanda here, Inini ndakatendera.

Florence wakawhirira no mwamuna wake, Justus, uye ese akatanga kufunda na inini Bhaibheri. Paakaona kuti inini ndainga ndisikakwanisi kuerenga, akandifundisa kuerenga. Nge kuhamba ke nguwa, ndainga ndaaku kwanisa kuerenga. Zuwa rimweni, kazado ii yakandibvunza kuti ainga atumwa koseenzera ku mbuto imweni inozwi Suriname. Painga pasina munhu umweni mu Orealla waikwanisa kuenderera mberi neni tecifunda Bhaibheri.

Pasati padarika nguwa yakawanda, pioneiro umweni unozwi Floyd wakaguma ku Orealla, uye iyena wakandiziya paaiparidzira pa nyumba no nyumba. Paakareketa neni nge zve kufunda Bhaibheri, ndakasekerera. Iyena wakandibvunzisa kuti “Urikusekerera ngei?” Ndakamubvunza kuti ndainga ndakambofunda brushura Mwari Anodei Kwatiri? Uye no bhuku rinoti Zivo Inotungamirira Kuupenyu Husingaperi. * Ndakapanganidza cikonzero cakaita kuti ndimboima kufunda. Floyd wakafunda neni bhuku iri, asi wakatumwawo koseenzera ku mbuto imweni. Ndakasarazve ndisina unondifundisa Bhaibheri.

 Nge kudaro, muna 2004, Granville na Joshua, mapioneiro mairi akatumwa kuti aende ku Orealla. Iwona aiparidzira pa nyumba no nyumba uye akandigumira. Paakandibvunzisa kuti ndaida kufunda, ndakaseka. Ndakakumbira kuti atangise kundifundisa bhuku rinozwi Zivo. Ndaida kuona kuti aizondifundisawo here zviya zvandaifundiswa no afundisi angu. Granville wakandibvunza kuti misangano yaiizirhwa mu mardeyemo. Kunyazi ndainga ndisikabudi pa nyumba ke makore gumi, ndaida kupinda misangano. Hino Granville wakanditengura ondipakidzisa mukadera ye rodha uye waindunda dakara ku Nyumba ye Umambo.

Nge kuhamba ke nguwa, Granville wakandikohomedzesa kuti ndipinde cikora. Iyena wakati: “Iwewe wakaremara, asi unokwanisa kureketa. Ucazoita mharidzo zuwa rimweni. Izvi zvicaitika.” Masoko ake akandibambisa.

Ndakatangisa kubuda mu basa re mumunda na Granville. Asi makwanza ese e mu mardeiya ainga asikaiti kuti kadera ye rodha ihambe. Hino ndakakumbira village kuti andipakidzise mu cikarinho ce nyara uye kuti andindunde. Zano iri rakaseenza maningi. Mu mwedzi wa Mhingani 2005, ndakabhabhatidzwa. Pasati padarika nguwa yakareba, hama dzakandifundisa kuonerera mabhuku e ungano uye kuonerera basa re sistema sonoro mu Nyumba ye Umambo.

Zvinosiririsa kuti mu Gore ra 2007 baba angu akafira mutsaona ye bharko. Mhuri yedu yakarhwadziwa maningi. Granville wakanamata nesu uye wakaerenga tsamba dze Bhaibheri dzino nyaradza. Pakadarika makore mairi, pakaitika tsaona imwenizve—Granville wakafira mu tsaona ye bharko.

Ungano yedu doko, yakasara yakatsukwara, isina mukuru, uye ino museenzi anobatira umwe basi. Rufu ra Granville rakarhwadza maningi; Iyena wainga shamwari ye pamwoyo. Iyena wainga andibetsa zvandaida zvekumwiya uye zvenyama. Pa musangano wakaizwa pasure pe kufa kake, ndakapaswa basa rekuerenga ndima pa Kufundwa ke Murindiri. Ndakakwanisa kuerenga ndima mbiri basi, ndakatanga kucema uye misodzi yairumbwa yecindoerera. Ndakabuda pa cikuwa.

Ndakatanga kuzwa zviri nani hama dze ungano imweni pedzakauwa kuzotibetsera ku Orealla. Andizvopi zvega, firiari yakatuma Kojo, mupionero kamare. Zvakandipfadza nge zvekuti mai angu no munukuna wangu akatanga kufunda uye akabhabhatidzwa. Hino, mu mwedzi wa Nyaonga 2015, ndakagadzwa kuti ndigare museenzi anobatira. Pasati padarika nguwa yakareba, ndakaita mharidzo yangu yekutanga ya wose. Zuwa irona, ndangarangarira ndecipfara uye ne misodzi nge kutenda Granville nge zvaakandubvunza pa makore akadarika: “Ucazoita mharidzo zuwa rimweni. Izvi zvicaitika.”

Peciseenzeswa urongwa we JW Broadcasting^®, ndakafunda nge zve Apupuri a Djehovha amweni ari mu migariro yakatodzana no yangu. Kunyazi akaremara iwona anorarama upenyu wakanaka uye unopfadza. Asi inini ndingatomboita zviro zvimweni. Cido cangu cekupasa simba rangu rese kuna Djehovha cakandikohomedzesa kuti ndigare pioneiro we nguwa dzese. Ndisikakariri ndakatambira mhinduro mu mwedzi wa Mavhuvhu 2019! Mu mwedzi iwona, ndakaziya kuti ndainga ndagadzwa kuti ndiseenze hingana mukuru mu ungano yedu, no aparidzi anokwana kuita 40.

Ndinotenda hama no hanzvadzi dzinodiwa dzakafunda neni uye dzakandibetsera pa kuita basa rangu rekuparidzira. Kupinda zvese, ndinotenda Djehovha nge kurumbwa ana inini mu mundangariro dzake.