Ayinon ta jaʼbil 1983. Lek chʼion talel-a, pero kʼalal ay lajuneb kaʼbilal-a, jajch skʼuxul spisil te jbakʼetale. Cheb jaʼbil ta patil, kʼalal jajchon ta sab, ma xjuʼ ya jtijix jba-a. La jpas tulan ta stijel te kakane, pero ma juʼ kuʼun. Jaʼto tal-abi, ma beenon-nix . La skombon jchʼiel te chamel ini, jaʼ yuʼun pajal jmukʼul bitʼil chʼin kerem.

Ayix tal cheʼoxeb u te ma xlokʼon ta jna-a te kʼalal chaʼtul antsetik testigoetik yuʼun Jehová la yulaʼtayotik. Kʼalal ya xtal ulaʼ kʼayemon-a te ya jnakʼ jbae, pero ta kʼajkʼal-abi kʼopojon sok te Testigoetik. Kʼalal yak scholbelonik ta swenta te Nichimal Kʼinal, jul ta koʼtan te kʼalal ay joʼeb kaʼbilal-a jtul misionero te Jethro sbiil te talem ta Surinam, jujunto u ya xtal yakʼbey nojptesel yuʼun Biblia te jtate. Te Jethro lek yoʼtan, jaʼ yuʼun lek la kil. Te jmamuch sok te jchuchuʼ meʼel jaʼnix jich ay la yikʼonik bael ta tsoblejetik te ya spasik liʼ ta jlumal. Jaʼ yuʼun kʼalal te Florence, te tal yulaʼtayotik ta kʼajkʼal-abi, la sjojkʼoybon teme ya jkʼan ya jnopxan te Bibliae, la kalbey te yake.

Ta yan buelta tal te Florence sok te smamalal te Justus sbiil, sok jajch snojptesonik ta Biblia. Kʼalal la yilik te ma jnaʼ skʼoponel te june, la snojptesonik. Jich nojp kuʼun. Ta patil la yalbonik te ya yichʼik tikunel bael ta Surinam yuʼun ya scholik skʼop Dios tey-a. Jich yuʼun maʼyuk machʼa jilix ta Orealla yuʼun ya snojptesonik ta Biblia. Pero tseʼel koʼtan la kaʼiy jba kʼalal la kil te maba chʼayon ta yoʼtan te Jehová.

Ma kʼax bayal tiempo kʼot ta Orealla jtul prekursor te Floyd sbiil. Kʼot yulaʼtayon te kʼalal yak ta scholel skʼop Dios ta nanatik. Kʼalal la sjojkʼoybon teme ya jkʼan ya jnop te Biblia, tseʼejinon. Jich la yalbon: «¿Bin yuʼun te ya stseʼejinate?». La kalbey te ay jnopojix te foyeto ¿Bin ya skʼanbotik te Diose? sok te kajonix ta snopel te libro El conocimiento que lleva a vida eterna. * Jaʼnix jich la jcholbey yaʼiy te bin yuʼun la jkejchan snopel. La jlajin snopel te libro Conocimiento sok te Floyd, pero jaʼnix jich tikunot ta yan parte yuʼun ya schol skʼop Dios. Yan buelta maʼyuk machʼa la snojpteson-nix.

Pero ta 2004 talik ta Orealla chaʼtul prekursor espesial, jaʼik te Granville sok te  Joshua. Ya scholik skʼop Dios ta nanatik, jich la staonik. Kʼalal la sjojkʼoybonik teme ya jkʼan ya kichʼ nojptesel yuʼun Biblia, tseʼejinon. La jkʼanbey te yakuk snojptesonik sok te libro Conocimiento kʼalalto ta sjajchibal. Ya jkʼan ya jnaʼ teme jichnix ya snojptesonik te bitʼil te yantike. Te Granville la yalbon te ya yichʼ pasel tsoblejetik ta jlumal. Jteb ma sta lajuneb jaʼbil te ma xlokʼon ta jna-a, pero ya jkʼan ya xboon-a. Jaʼ yuʼun te Granville bajt staon tal ta jna sok la yikʼon bael ta sNail Tsoblej ta siya de rueda.

Kʼalal kʼaxemix jtebuk tiempo-a, te Granville la stijbon koʼtan yuʼun ya jnajkan jbiil ta Escuela del Ministerio Teocrático. Jich la yalbon: «Ma xjuʼ ya xbeenat, pero ya xjuʼ ya xkʼopojat. Yame xkʼot skʼajkʼalel te ya awakʼ jun diskurso. Yatome awil». Te bin la yalbone la yakʼbon yip koʼtan sok smukʼul koʼtan.

Kajon ta scholel skʼop Dios sok, pero te beetik ta jlumal kʼax chujkultik sba sok ma xjuʼ ya xkʼax tey-a te siya de rueda. Jaʼ yuʼun la jkʼanbey te yakuk yikʼon bael ta karretiya. Ta 2005 la kichʼ jaʼ. Ta patil, te ermanoetik la snojptesonik yuʼun ya kil te publikasionetik ta kongregasion sok te sonido ta sNail Tsoblej.

Ta 2007, te jpapa laj ta jun aksidente ta barko. Bayal la smel yoʼtan te jfamiliae. Te Granville la sjokinotik ta skʼoponel Dios sok la yakʼ smukʼul koʼtantik sok te Biblia. Cheb jaʼbil ta patil la jchaʼtatik yan wokolil, te Granville jaʼnix jich laj ta jun aksidente ta barko.

Te jkongregasionkotik bayal la smel yoʼtanik, maʼyuk ni jtuluk ansiano jaʼxanix jtul sierbo ministerial. Te bitʼil laj te Granville bayal la jmel koʼtan yuʼun, melel jaʼ kamigo-a te kʼux ta koʼtan sok te spisil-ora la skoltayon ta swenta te schʼuunel koʼtan sok te bin ya xtuun kuʼune. Te sbabial tsoblej te la jpastik te kʼalal lajemix-ae, joʼon ay ta jwenta skʼoponel-a te parrafoetik yuʼun Te J-ilkʼinal ta toyol. Jaʼnax juʼ kuʼun skʼoponel cheb parrafo, ta patil kajon ta okʼel. Ta skaj te ma kejchajon ta okʼele koon tal ta plataforma.

La yakʼbon stseʼelil koʼtan kʼalal talik ermanoetik te ayik ta yan kongregasion yuʼun ya skoltayotik ta Orealla. Te sukursal la stikun tal jtul prekursor espesial te Kojo sbiil. La yakʼbon bayal stseʼelil koʼtan kʼalal te jmama sok te kijtsʼin kaj snopik te Biblia sok la yichʼik jaʼ. Ta marso yuʼun 2015 la kichʼ akʼbeyel kaʼtel ta sierbo ministerial. Jun tiempo ta patil la jkʼases te sbabial jdiskurso. Ta kʼajkʼal-abi jul ta koʼtan te bin la yalbon te Granville: «Yame xkʼot skʼajkʼalel te ya awakʼ jun diskurso. Yatome awil». Jaʼ ini la yakʼbon stseʼelil koʼtan sok okʼon yuʼun.

Wokolayal te programa yuʼun te JW Broadcasting^®, jnaʼbeyoj sba ermanoetikte jaʼnix jich ayik ta wokol bitʼil te joʼone. Manchukme ay bin ma xjuʼ yuʼunik pasel, yakik ta aʼtel sok tseʼel yoʼtanik. Jaʼnix jich te joʼone ay bintik ya xjuʼ ya jpas. Ochon ta prekursor regular, jaʼ la stijbon koʼtan te ya jkʼan ya jpas ta stojol Jehová spisil te ban kʼalal ya xjuʼ kuʼune. Ta septiembre yuʼun 2019 la kichʼ akʼbeyel kaʼtel ta ansiano ta jkongregasion te ay 40 ta tul publikadoretik. Chajpnax la kaʼiy-abi.

Ya kalbey bayal wokol te ermanoetik sok te ermanaetik te la yakʼbonik jnop te Biblia sok te skoltayejonik yuʼun ya jpasbey yaʼtel te Jehová. Pero jaʼ ya kalbeyxan wokol te Jehová, melel maba chʼayemon ta yoʼtan.