Livokʼ ta 1983. Lek toʼox lichʼi talel, pe kʼalal la jtsak lajuneb jabile, lik kʼuxubuk tajek sjunul li jbekʼtale. Kʼalal echʼ xa ox chib jabile, oy jun sob kʼalal chilik xa ox kaʼie, mu xa xbakʼ li jbekʼtale. Akʼo mi ta jkʼan ta jbakʼes li koktake, pe muʼyuk xa kipal. Jech muʼyuk xa lixanav-o. Muʼyuk xa lichʼi-o yuʼun ta skoj li chamele. Jaʼ yuʼun, jaʼ noʼox jech jnatil likom kʼuchaʼal jun olol.

Kʼalal oy xa ox jayibuk u ti te bajalun ta jnae, ay svulaʼanunkutik chaʼvoʼ antsetik ti jaʼik stestigotak Jeovae. Ta jnakʼulan toʼox jba kʼalal oy buchʼu chtale, pe li vaʼ kʼakʼale, la jkʼan la jchiʼinik ta loʼil. Kʼalal lik yalbeik skʼoplal li Paraisoe, oy kʼusi vul ta jol. Kʼalal voʼob toʼox jabilale, oy jun misionero ti Jethro sbie xchiʼuk ti likem tal ta Suriname chtal toʼox svulaʼanunkutik jkoj ta u ta jlumalkutik xchiʼuk chakʼbe estudio li jtote. Toj lek toʼox chkilbe stalelal li Jethroe, yuʼun toj lek yoʼonton. Jech xtok, bateltike, li jmukʼtotake chikʼikun batel li ta tsobajeletik tspasik stestigotak Jeova ti bu nakalunkutike. Jaʼ yuʼun, kʼalal la sjakʼbun mi ta jkʼan ta jchan mas Vivlia li Florence ti jaʼ li ants kʼot ta vulaʼale, laj kalbe ti tanae.

Ta tsʼakale, tal svulaʼanikun li Florence xchiʼuk li smalal ti Justus sbie, vaʼun lik yakʼbeikun estudio. Laj yakʼik venta ti mu xitojob skʼelel vune, jech oxal la xchanubtasikun. Kʼalal echʼ kʼuuk sjalile, xkʼel xa ox kuʼun jtuk li vunetike. Ta tsʼakale, laj yalbeikun ti takatik batel ta xcholel mantal ta Surinam. Vokol laj kaʼi, yuʼun muʼyuk xa buchʼu laj yakʼbun estudio. Pe ximuyubaj tajek kʼalal laj kakʼ venta ti muʼyuk la xchʼayun ta sjol li Jeovae.

Mu ta sjaliluke, tal ta Orealla jun prekursor ti Floyd sbie. Ay svulaʼanun kʼalal jaʼo chchol mantal ta naetike. Litseʼin kʼalal laj yalbun mi ta jkʼan chkichʼ estudioe. «¿Kʼu yuʼun ti chatseʼine?», xiyutun. Laj kalbe ti laj xa ox jchan li foyeto ¿Kʼusi tskʼanbutik li Diose? xchiʼuk lik xa ox jchan li livro El conocimiento que lleva a vida enterna. * Jech xtok, laj kalbe ti kʼu yuʼun la jkechan li j-estudioe. Jaʼ xa la jtsutses xchanel xchiʼuk Floyd li livro Conocimiento, pe ta tsʼakale, yan-o bu laj yichʼ takel batel ta cholmantal. Jech oxal, chʼabal xa buchʼu chchanubtasun xtok.

 Li ta 2004, talik ta Orealla li Granville xchiʼuk Joshua ti jaʼik prekursor espesialetike. La staikun ta kʼoponel kʼalal jaʼo chcholik mantal ta naetike, litseʼin kʼalal la sjakʼbeikun mi ta jkʼan j-estudioe. La jkʼanbeik mi xuʼ jchankutik sliklej li livro Conocimiento. Jech laj kalbeik yuʼun ta jkʼan ta jkʼel mi koʼol li kʼusi laj yakʼbeikun jchan li yantike. Li Granvillee laj yalbun ti ch-echʼ tsobajeletik ti bu nakalunkutike. Akʼo mi stsak xa ox lajuneb jabil ti muʼyuk xilokʼ-o ta jnae, ta jkʼan chibat kaʼi. Jaʼ yuʼun, echʼ yikʼun ta jna li Granvillee xchiʼuk laj yikʼun batel ta siya de rueda li ta salone.

Kʼalal echʼ kʼuuk sjalile, li Granville la stijbun koʼonton sventa jtsak jbi li ta Chanob vun sventa Kabteltik yuʼun Diose. Xi laj yalbune: «Melel ti oy avokole, pe xuʼ xakʼopoj. Xakʼelavil, chavetʼes mantal junuk kʼakʼal». La spatbun koʼonton li kʼusi laj yalbune xchiʼuk laj yakʼ kil ti spas kuʼune.

Jmoj xa lik jchol mantal xchiʼuk li Granvillee, pe toj sokemik tajek li beetik bu chibatkutike, jaʼ yuʼun mu stakʼ xibat ta siya de rueda. Vaʼun laj kalbe ti xkuchun batel ta jkotuk karetiyae, la jkʼupinkutik tajek. Laj kichʼ voʼ ta avril ta 2005. Kʼalal echʼ kʼuuk sjalile, li ermanoetike la xchanubtasikun ta skʼelel li vunetik ta tsobobbaile xchiʼuk li sonidoe.

Toj kʼux kʼusi kʼot ta pasel li ta 2007, li jtote cham ta jun aksidente ta varko. Yayijem kom yoʼonton li kutsʼ kalale. Jmoj la jpaskutik orasion xchiʼuk li Granville xchiʼuk la spat koʼontonkutik ta Vivlia. Kʼalal echʼ chib jabile, oy kʼusi yan tsots la jnuptankutik: li Granville cham ek ta jun aksidente ta varko.

Yabinoj kom li kuni tsobobbailkutike, yuʼun chʼabal xa junuk mol ta tsobobbail, kʼajomal jun siervo ministerial. Toj kʼux laj kaʼi ti cham li Granvillee, yuʼun jaʼ jun jlekil amigo ti skotol ora la skoltaun ta mantale xchiʼuk li ta yan kʼusitik chtun kuʼune. Kʼalal echʼ jtsobajelkutik ti chʼabal xa ox te li Granvillee, jaʼo jtaoj xchanel Li Jkʼel-osil ta toyole. Kʼajomal vuʼ kuʼun xchanel chib parafo, laje lik tʼomuk kokʼel. Persa liyal ta plataforma, yuʼun mu xa xipaj ta okʼel.

Mas xa jun koʼonton likom kʼalal tal koltavanikuk junantik ermanoetik ta yan tsobobbaile. Jech xtok, li Betele la stak talel jun prekursor espesial ti Kojo sbie. Limuyubaj tajek kʼalal lik xchanik Vivlia xchiʼuk laj yichʼik voʼ li jmeʼ xchiʼuk kitsʼine. Li ta marso ta 2015, la sbiiltasikun ta siervo ministerial. Laje laj ketʼes ta sba velta li mantal sventa skotol krixchanoetike. Li vaʼ orae, xitseʼet xa likel xchiʼuk lokʼ yaʼlel jsat, yuʼun vul ta jol li kʼusi laj yalbun Granville leʼ xa ta sjayibaluk jabile: «Xakʼelavil, chavetʼes mantal junuk kʼakʼal».

Ep sbalil jtaojbe li kʼusitik oy ta JW Broadcasting^®, yuʼun kilojbe sloʼil ermanoetik ti jaʼtik jech xkuxlejalik kʼuchaʼal voʼone. Akʼo mi oy svokolik, ep kʼusi tspasik xchiʼuk xmuyubajik noʼox. Jaʼ jech li voʼon eke oy kʼusitik xuʼ jpas. Ta skoj ti ta jkʼan chkakʼbe Jeova ti bu kʼalal xuʼ kuʼune, jaʼ la stijbun koʼonton sventa xi-och ta prekursor regular. Labal to laj kaʼi li kʼusi kʼot ta pasel ta septiembre ta 2019, yuʼun li ta jtsobobbail ti oy van 40 jcholmantaletike, la sbiiltasikun ta mol.

Ta jtojbeik tajek ta vokol li ermanoetik xchiʼuk ermanaetik ti la xchanubtasikun ta Vivliae xchiʼuk ti la skoltaikun yoʼ xitun ta stojolal Jeovae. Pe mas to ta jtojbe ta vokol Jeova ti muʼyuk xchʼayojun-o ta yoʼontone.