E vwiẹ vwẹ vwẹ 1983. Erọnvwọn eje shephiyọ ẹsosuọ, ẹkẹvuọvo, me vwọ hẹ ẹgbukpe ihwe, oma mẹ eje kọ miavwan ovwẹ mamọ. Ẹgbukpe ivẹ vwọ wan nu, mi vwo vrẹn vwẹ urhiọke rẹ ẹdẹ ọvo, mi rhe se kpogho awọ mẹ-ẹ. Me davwẹngba sẹ me sa yan, ẹkẹvuọvo awọ mẹ ghwu re. Rhanvwẹ ọke yena rhe, me rha sa yan ọfa-a. Fikirẹ ọga na, me je sa rho vrẹ oborẹ me hepha-a. Mi ji vwo oma rẹ omotete te ọke na.

Me vwọ dia evunrẹ uwevwin mẹ te emeranvwe ibro, Iseri ri Jihova ivẹ da kọn bru vwe rhe. Mi vwo ẹkuruemu mi vwo siomanẹ siẹrẹ erhorha da rhe, ẹkẹvuọvo me vwẹ uphẹn kẹ eya na nẹ ayen ta ota kẹ vwẹ ẹdẹ yena. Rẹ ayen vwọ vuẹ vwẹ kpahen Iparadaisi na, me da karophiyọ oborẹ mi nyori ọke me vwọ hẹ ẹgbukpe iyorin. Ọke yena, imishọnare ọvo re se Jethro rọ dia Suriname rọ vwẹ Baibol vwo yono ọsẹ mẹ, cha ọko rẹ avwanre obọ ọvo kemeranvwe kemeranvwe. Jethro nabọ dje ẹguọnọ kẹ vwẹ. Uruemu rọyen je vwe mamọ. Vwọba, ọsẹ vẹ oni mẹ rode je reyọ ovwẹ boma kpo emẹvwa rẹ Iseri ri Jihova evo re ruẹ vwẹ ọko rẹ avwanre. Kọyensorọ ọke rẹ Florence rọ dia ọvo usun rẹ eya ivẹ na vwọ nọ vwẹ sẹ me guọnọ yono Baibol na kpobarophiyọ, me da rhọnvwe.

Florence vẹ ọshare rọyen Justus de rhivwin bru vwe rhe, ayen de nene uvwe ton uyono ri Baibol phiyọ. Ayen rhi vwo noso nẹ me riẹn obo re se ẹbe-e, ayen de yono uvwe obo re se. O vwo te ọke ọvo, ki mi se se ẹbe komobọ mẹ. Ẹdẹ ọvo, ayen da vuẹ vwẹ nẹ e ji ayen nẹ ayen re ghwoghwo vwẹ Suriname. Ọ da vwẹ mamọ nẹ ohwo ọfa rha hẹ Orealla ro che yono uvwe Baibol na-a. Jẹ, oma vwerhen ovwẹ mamọ nẹ Jihova kpairoro vrẹ vwẹ-ẹ.

O kriri-i, ọkobaro ọvo re se Floyd da rhe Orealla, ọke ro vwo ghwoghwo nuwevwin kpo uwevwin yen ọ vwọ mrẹ vwẹ. Ọ vwọ vuẹ vwẹ kpahen uyono ri Baibol, me da hwẹ. Ọ da ta: “Die nẹrhẹ wọ hwẹ?” Me da vuẹ nẹ mi yono ibroshọ ri Die Ọyẹn Ọghẹnẹ Guọnọ mie Avwanre? re, me je ton uyono rẹ ọbe re se Knowledge That Leads to Everlasting Life * phiyọ re. Me da vuẹ oboresorọ uyono na vwọ dobọji. Floyd vwo yono uvwe ẹbẹre ochekọ rẹ ọbe ri Knowledge na nu, e de jo  kpo asan ọfa. Mi rhe vwo ohwo ro che yono uvwe-e.

Ẹkẹvuọvo, vwẹ 2004, e de ji Granville vẹ Joshua re dia ekobaro oghẹresan rhe Orealla. Ayen vwo ghwoghwo nuwevwin kpo uwevwin, ayen da mrẹ vwẹ. Ayen vwọ nọ vwẹ sẹ me guọnọre nẹ e yono uvwe, me da hwẹ. Me da vuẹ ayen nẹ ayen yono uvwe ọbe ri Knowledge na nẹ ọtonphiyọ rhe. Me guọnọ riẹn sẹ oborẹ ayen che yono uvwe cha fẹnẹ ọ rẹ ihwo ichekọ na yono uvwe wanre. Granville da vuẹ vwẹ nẹ ayen ruẹ emẹvwa vwẹ ọko na. Mi vwo ẹwẹn me vwọ ra, dede nẹ ọ joma te ẹgbukpe ihwo re, me vwọ hẹ uwevwin. Granville da rhe reyọ ovwẹ, o de mu vwe chidia agbara ukpono, o de ghorie uvwe kpo Ọguan Ruvie na.

Ọke vwọ yanran na, Graville de jiro kẹ vwẹ nẹ mi vwobọ vwẹ Isikuru rẹ Iruo Ruvie Na. Ọ da ta: “Dede nẹ wọ sa ya-an, jẹ wọ sa ta ota. Ẹdẹ ọvo, wọ cha ta ota rotu. Ọ cha phia.” Eta rọyen na da kẹ vwẹ uduefiogbere.

Ki mi nene Graville kpo aghwoghwo. Ẹkẹvuọvo, idjerhe buebun rehẹ ọko na pha chohri chohri, i ghwe yovwin kẹ agbara ukpono mẹ na-a. Me da vuẹ Graville nẹ o mu vwe phiyọ iwibaro rere o ghorie uvwe. Ọyena wianre dẹn. Mi de bromaphiyame vwẹ April 2005. O kriri-i, iniọvo na de yono uvwe phiyọ iruo rẹ ẹroevwote rẹ ẹbe rẹ ukoko na, kugbe ekuakua uhworo rehẹ Ọguan Ruvie na.

Vwẹ 2007, ọsẹ mẹ de ghwu ọke rọ vwọ hẹ okọ vwẹ urhie. Ughwu rọyen da ihwo rẹ orua mẹ mamọ. Granville da vwẹ ẹkpo ri Baibol sansan vwo bru avwanre uche, o de ji nene avwanre nẹrhovwo kugbe. Ẹgbukpe ivẹ vwọ wan nu, ọfa da rhoma phia, Granville de ji ghwu ọke rọ vwọ hẹ okọ vwẹ urhie.

Ukoko avwanre rhe vwo ọkpako-o, odibo rowian ọvuọvo kọyen o vwori. Granville ghini uvi rẹ ugbeyan; ughwu rọyen da vwẹ mamọ. Ọ chọn vwẹ uko vwo sikẹrẹ Jihova, ọ je kẹ vwẹ erọnvwọn buebun re me guọnọre. Mẹvwẹ yen seri vwẹ Uyono rẹ Uwevwin Orhẹrẹ na vwẹ omẹvwa ẹsosuọ re ruru ọke ro vwo ghwu nu. Mi vwo se ẹkorota rẹsosuọ vẹ ọrivẹ nu, me rha sa yọnre oma mẹ-ẹ, ẹro mẹ ko suẹn ame pra pra. Mi de wontọ nẹ umukpe na.

Ẹwẹn mẹ de kpotọ emerha ọke rẹ iniọvo evo vwo nẹ ukoko ọfa rhe Orealla rhe chọn avwanre uko. Vwọba, oghọn ukoko de ji Kojo rọ dia ọkobaro oghẹresan bru avwanre rhe. Oma vwerhen ovwẹ mamọ ọke rẹ oni mẹ vẹ oniọvo mẹ ọmọshare otete vwo yono Baibol na ji bromaphiyame. Vwẹ March 2015 a da vwẹ ovwẹ mu odibo rowian. Ọke evo vwọ wan nu, me da ta ota rotu mẹ rẹsosuọ. Ẹdẹ yena, me da karophiyọ oborẹ Granville vuẹ vwẹ ikpe evo re wanre: “Ẹdẹ ọvo, wọ cha ta ota rotu. Ọ cha phia.”

Womarẹ JW Broadcasting^® me da rhe mrẹ iniọvo evo rẹ ẹdia rayen họhọ ọmẹ. Dede nẹ oma rayen ganre-e, jẹ ayen se ruẹ emu buebun, oma je ghwa vwerhen ayen. Mi ji se ruẹ erọnvwọn evo. Ọdavwẹ me vwọ reyọ ẹgba mẹ ro chekọ vwọ ga Jihova de mu vwe vwọ dia ọkobaro ọkieje. Vwẹ September 2019 mi de nyo iyẹnrẹn omavwerhovwẹn ọvo ri mi rhẹro rọye-en! Emeranvwe yena yen a reyọ ovwẹ vwo mu ọkpako vwẹ ukoko avwanre ro vwo ighwoghwota ri te omarẹ 40.

Me kpẹvwẹ iniọvo eshare vẹ eya ri yono uvwe je chọn vwẹ uko vwọ ga Jihova. Ma rho kparobọ, me kpẹvwẹ Jihova rọ kpairoro vrẹ vwẹ-ẹ.