Kiyariwe mwaakha wa 1983. Iyaakha soopacerya sa okumi aka miyo kaari ntoko anamwane akina, masi okathi kaarina aka iyaakha 10, erutthu aka yaanikiwereya vanceene. Iyaakha piili muhoolo mwaya, kaahivenya voosiisu ni nkaawerya weetta. Nto hata kaimananihale vanceene weeteteiha metto saka wira keette, nkaawenrye. Okhuma nihiku nne mpakha va, nkitthikenle-tho weetta. Oretta aka onnikiiriha ohinnuwa. Tthiri mpakha olelo-va kinikhala ntoko mwaana.

Myeeri vakhaani muhoolo mwaya, nlelo kiwereiwaka ni kihiweryaka okhuma owaani, Anamoona a Yehova anli yaahikixukurya. Okhala wene okathi yaaphiya aya aletto, miyo kaamwiipitha. Masi nihiku nne kaahiweemererya athiyana ale anli ovaanela ni miyo. Nto vaavo yaalavula aya sa Eparayiisu miyo kaahuupuwela etthu kaiwale aka okathi kaarina aka iyaakha 5. Okathi ole misionaario iihaniwa Jethro, yoowo aakhala oSuriname, aaniphiya muttetthe naakhala ahu ekwaha emosa vamweerini ni aanimusomiha paapa aka Biibiliya. Jethro aanikireerela murima vanceene. Nave axipiipi aka yaanikikuxa vaavo yaarowela aya mithukumano sa Anamoona saapakiwa muttetthe ahu. Nto, vaavo mmosa a athiyana ale iihaniwa Florence yaawo yaakilaleerya yaakivekenle aya akhala wira kaaniphavela omusoma Biibiliya, miyo kaaheemererya.

Florence aahirwa vamosa ni iyawe oniihaniwa Justus, nto oowanli aya yaahipacerya okisomiha Biibiliya. Okathi yoonale aya wira nkaasuwela osoma, awo yaahikikhaliherya wiixutta osoma. Nuuvira okathi, miyo kaahipacerya osoma mekhaka. Nihiku nimosa anamathelana ale yaahikilela wira yaahithanliwa wira yalaleeryeke oSuriname. Mooriipiha murima, khakhanle-tho mutthu mukina wOrealla yoowo aakhanle okisomiha Biibiliya. Masi moohakalaliha Yehova, nlelo khaakiliyanle.

Ohivinre okathi munceene, pioneero oniihaniwa Floyd aahiphiya wOrealla, nto owo ahikiphwanya vaavo aalaleerya awe empa ni empa. Okathi akivekenle awe wira okisomiheke Biibiliya, miyo kaahitheya nto owo aahikikoha wira: “Xeeni muntheya anyu?” Miyo kaahimuleela wira kaanisomihiwa ebroxura eni: Muluku Omphavela Exeni Wa Hiyo? Nave kaahipacerya osoma eliivuru eni: Conhecimento Que Conduz à Vida Eterna. * Nave-tho kaahimuleela nthowa naya kaahiyale aka osoma. Vano Floyd aahimaliha osoma ni miyo eliivuru Conhecimento. Masi muhoolo mwaya owo nave ahithanleliwa orowa olaleerya nipuro  nikina. Nto khaakhanle-tho mutthu mukina aakisomiha Biibiliya.

Mwaakha wa 2004, Granville ni Joshua, mapioneero manli a vameekhaaya yaahithanleliwa wOrealla. Nto yaahikiphwanya okathi yaalaleerya aya empa ni empa. Okathi yaakikonhe aya akhala wira kaaniphavela osomihiwa Biibiliya, miyo kaahitheya. Nto kaahaalela wira yaahaana okisomiha eliivuru Conhecimento okhuma wanipacerya, miyo kaaphavela woona akhala wira itthu yaarowa aya ookiixuttiha ti seiye kaixuttihiwaka ni Anamoona akina. Granville aahikileela wira sanipakiwa mithukumano muttetthe ahu. Nnaamwi saavinre iyaakha 10 kihikhumaka owaani kaaniphavela orowela mithukumano iyo. Nto Granville aahikiteexa okipweha ekhatera ya maroota onakirooha Empa ya Omwene.

Nuuvira okathi, Granville aahikitumererya wira kaahaana wiilepiha Exikola ya Orummwa wa Muluku. Owo aahimmye so: “Ekeekhai wira khamuniwerya weetta, masi munniwerya olavula. Muhoolo nyuwo munoowerya olavula mwaha wa atthu otheene. Tthiri nyuwo munoowerya opaka eyo”. Moolumo ale yaahikilipiha vanceene.

Kaahipacerya olaleerya ni Granville. Masi iphiro sinceene sa muttetthe ahu ti soothipakaseya nto khivaniweryaneya weetta ni ekhatera ya maroota. Nto kaahinvekela Granville wira okittukhule ni okipwehe ekhatera ya maroota okathi naarowa ahu olaleerya. Eyo yaahikikhaliherya vanceene. Kipatisiwe Abril 2005. Moohipisa anna yaahikiixuttiha moota wookhapelela iliivuru sa mmulokoni ni ikaruma sinrumiha masu Empa ya Omwene.

Mooriipiha murima 2007 paapa aka ohookhwa mwaha wa asitenti a ekalawa. Eyo yaahaaxankiha vanceene amusi aka. Granville aaninivekelela vanceene ni aanisoma soolepa soolipiha. Iyaakha piili muhoolo mwaya yaahinikhumelela etthu ekina yooripiha murima, Granville aahikhwa mwaha wa asitenti a ekalawa.

Vano muloko ahu mwaamukhaani khiwaarina axitokweene nnakhala murumeyi oorumeela. Tthiri okhwa wa Granville wookiwereya vanceene maana owo aari mpatthani aka muulupale. Owo aahikikhaliherya okhalana waataana wooloka ni Yehova ni itthu sikina saakithowa. Muthukumano waattharelana nuumala Granville okhwa, kaahithanleliwa osoma ittima okathi wa yoosoma ya erevista Owehaweha. Nuumala osoma ittima piili soopacerya kaahipacerya wunla ni maithori yaanimora. Nto kaahaana okhuma otripuna.

Kaahipacerya okhala saana nuumala anna a muloko mukina orwa onikhaliherya wOrealla. Nave anna a oBetheli ya oKojo yaahaaruma mapioneero a vameekhaaya. Ohiya-vo etthu yaakihakalaliha, okhala wira maama aka ni muhima aka yaahipacerya omusoma Biibiliya khupatisiwa. Moottharelana Março a 2015 kaahithanliwa okhala murumeyi oorumeela, nuuvira okathi kaahilavula mwaha aka woopacerya wa atthu otheene. Nihiku nne kaahipacerya wuupuwela ni otheya kimorihaka maithori mwaha wa omuxukhurela Granville yoowo iyaakha saavinre aakilenle wira: “Muhoolo nyuwo munoowerya olavula mwaha wa atthu otheene. Tthiri nyuwo munoowerya opaka eyo”.

Eprograma ya JW Broadcasting^® kaahoona wira aakhala Anamoona akina arina mixankiho ntoko sawaka. Masi hata ari ene mixankiho iyo awo anniwerya opaka itthu sinceene ni annihakalala. Ni miyo-tho kinniwerya opaka itthu sikina, miyo kimphavela onvarela itthu sinceene Yehova mpakha vaniwerya aka. Tivonto kipacenrye aka orumeela ntoko pioneero ookilaatheya. Ihapari sikina soohakalaliha saakikhumelenle Setembro a 2019! Mweeri ole kaahithanliwa okhala mutokweene muloko ahu yoowo ari aya anamalaleerya 40.

Kinnaaxukhurela vanceene anna ni arokora yaawo akisominhe Biibiliya ni akikhalihenrye omurumeela Yehova. Nave-tho kinnimuxukhurela ni murima wotheene Yehova yoowo ohikiliyanle.