Taani 1983n yelettaas. Ta deˈuwan koyro heeran, taani payya naˈa; shin taayyo tammu laytta gidiyo wode ta bolla ubban tana keehi sakkiyoogaa doommiis. Naaˈˈu layttaappe guyyiyan, issi galla guuran hiittaappe denddiyo wode qaaxxana danddayabeykke. Taani ay keena baaxetikkonne ta gedee qaaxxana danddayibeenna. He gallassaappe doommada, taani zaarettada hemettabeykke. Ta harggee taani diccennaadankka oottiis. Haˈˈikka taani guutta naˈa keena.

Taani sahettada sooppe kessaa agga simmin guutta aginatuppe guyyiyan naaˈˈu Yihoowa Markkati nu soo yiidosona. Asi tana oychchanawu yiyo wode darotoo qosettanawu malays, shin he gallassi he macca asatuura haasayanawu eeno gaas. Eti Gannatiyaabaa yootiyo wode, tawu layttay ichchashaa gidiyo wode siyidobaa hassayaas. He wode, Surinama heeran deˈiya Jetiro giyo misoonaawee aginaappe issitoo nu heeraa yiidi ta aawaa Geeshsha Maxaafaa xannaˈissees. Jetiroy tawu daro kehiis. Taani A keehi dosays. Qassi, ta aawaa aawaynne aayyiyaa, nu heeran deˈiya Yihoowa Markkatu shiiquwaa tana issi issitoo efoosona. Yaatiyo gishshawu, he galla tana oychchanawu yiida macca asatuppe issinna, Florenssa taani gujjada tamaarana koyiyaakkonne oychchin eeno gaas.

Florenssa ba azinaa Jasttesaara simmada yaasu; qassi eti tana Geeshsha Maxaafaa xannaˈissiyoogaa doommidosona. Eti taani nabbabeennaagaa akeekido wode, nabbabiyoogaa tamaaranaadan tana maaddidosona. Amarida wodiyaappe simmin, tarkka nabbabiyoogaa danddayaas. Issi galla, he aqo laggeti Surinaman haggaazanawu maddabettidoogaa tawu yootidosona. Oreelan, Geeshsha Maxaafaa tana xannaˈissiya issi urinne baynnaagee azzanttiyaaba. SHin, Yihooway tana dogibeennaagee ufayssiyaaba.

Hegaappe simmin takkennan, Floyida giyo dumma aqinyee Oreela yiis; yaatidi I sooppe soo haggaaziiddi tanaara gayttiis. I Geeshsha Maxaafaa xannaˈiyoogaabaa tawu yootin taani moocu gaas. I, “Ayssi moocu gay?” giidi tana oychchiis. Taani Xoossay Nuuppe Koyiyoy Aybee? giyo brooshuriyaa xannaˈidoogaanne Merinaa Deˈuwawu Kaalettiya Eraa giyo maxaafaa xannaˈiyoogaa doommidoogaa awu yootaas. * Xinaatiyaa essido gaasuwaakka qonccissaas. Floyidi he maxaafaa tana xannaˈissidi wurssissiis, shin guyyeppe ikka harasan haggaazanawu maddabettiis. Haˈˈikka Geeshsha Maxaafaa tana xannaˈissiya asi xayiis.

 Gidoppe attin, 2004n, Giranviliinne Jooshuwa giyo naaˈˈu dumma aqinyeti Oreela maddabettidosona. Eti sooppe soo haggaaziiddi tanaara gayttidosona. Eti taani xannaˈanawu koyiyaakkonne tana oychchin moocu gaas. Eraa giyo maxaafaa koyroppe doommidi tana xannaˈissanaadan eta oychchaas. Eti taani kase xannaˈidoogaara issi malabaa xannaˈissanaakkonne beˈanawu koyaas. Giranvili nu heeran gubaaˈe shiiqoti deˈiyoogaa tawu yootiis. Tammu laytta gidiyaagawu taani sooppe kiya erana xayikkonne shiiquwaa baanawu koyaas. Hegaa gishshawu, Giranvili nu soo yiidi goomman biya wombbaran tana SHiiquwaa Addaraashaa efiis.

Guyyeppe, Granvili Tiˈokiraase Haggaazo Timirtte Keettan mazgafettanaadan tana minttettiis. I hagaadan giis: “Neeni sila gidikkonne haasayana danddayaasa. Issi galla neeni dere haasayaa haasayaana. Hegee attennaba.” I minttettiyaabaa yootidoogee taani xalanaadan oottiis.

Taani Giranviilaara haggaaziyoogaa doommaas. SHin nu heeran deˈiya daro ogeti goomman biya wombbaran baanawu injjetokkona. Yaatiyo gishshawu, Giranvili tana he wombbaran uttisidi suganaadan A oychchaas. Hegee tawu keehi injjetiis. Hosppune 2005n, taani xammaqettaas. Hegaappe daro takkennan, SHiiquwaa Addaraashan xuufiyaa kifiliyaaninne cenggurssaa kifiliyan oottanaadan ishantti tana loohissidosona.

Ta aaway 2007n wolwoluwaa daafan hayqqidoogee azzanttiyaaba. Nu soo asay keehi azzaniis. Giranvili nunaara woossiis; qassi minttettiya Geeshsha Maxaafaa xiqiseta nuussi nabbabiis. Naaˈˈu layttaappe simmin, hara keehi azzanttiyaabay merettiis; Giranvili wolwoluwaa daafan hayqqiis.

Keehi azzanida nu guutta gubaaˈiyan gubaaˈiyawu oottiya issi uraappe attin, gubaaˈe cimi baawa. Taani keehi siiqiyo ta laggee Giranvili hayqqidoogan keehi azzanaas. Taani kaseegaappe aaruwan Yihoowakko shiiqanaadan I ubbatoo tana maaddiis; qassi tawu koshshiya darobaa immiis. I Hayqqi simmin shiiqido koyro gubaaˈe shiiquwan Wochiyo Keelaa Xinaatiyawu menttota taani nabbabaas. Taani koyro naaˈˈu menttota nabbabaas; shin hegaappe simmin yeekkiyoogaa doommada afuttaa tigaas. Yaatin madirakiyaappe wodhdhaas.

Hara gubaaˈiyaappe ishantti nuna maaddanawu Oreela yiido wode taani ufayttaas. Qassi macara biiroy Kojo giyo dumma aqinyiyaa maddabiis. Ta aayyiyaanne ta kaalo ishay Geeshsha Maxaafaa xannaˈidi xammaqettidoogee tana keehi ufayssiis. Guyyeppe, taani Laappune 2015n, gubaaˈiyawu oottiyaagaa gidada sunttettaas. Amarida wodiyaappe simmin, tawu koyro dere haasayaa haasayaas. He gallassi, Giranvili amarida layttaappe kase, “Issi galla neeni dere haasayaa haasayaana. Hegee attennaba” giidi tawu yootidoogaa qoppada ufayttaasinne yeekkaas.

JW Brodkastingiyaa^® prograametun, taagaa mala hanotan deˈiya ishanttubaanne michchonttubaa akeekaas. Eti sahettikkonne, darobaa oottana danddayoosonanne ufayttoosona. Taanikka issi issibaa oottana danddayays. Taassi danddayettida ubbaban Yihoowassi loytta oottanawu koyaas. Taani ubba wode aqinye gididoy hegaassa. Qassi Masqqalaa 2019n taani mule qoppabeennabaa siyaas! He aginan, 40 gidiya aassiyaageeti deˈiyo nu gubaaˈiyan cima gidada sunttettaas.

Tana Geeshsha Maxaafaa xannaˈissidanne Yihoowawu haggaazanaadan maaddida siiqo ishanttanne michchontta keehi galatays. Ubbaappe aaruwan, Yihooway tana dogibeenna gishshawu, A keehi galatays.