Natawo ako han 1983. Mahimsog ako nga bata tubtob han noybe anyos ako, pero pag-dyes anyos ko, inabat ako hin sobra nga kaul-ol ha akon bug-os nga lawas. Paglabay hin mga duha ka tuig, usa ka aga pagmata ko, waray na ako makakakiwa. Naniguro gud ako nga ikiwa an akon mga tiil pero waray ito kusog. Tikang hito, waray na ako makalakat. Tungod liwat han akon sakit, waray na ako tumubo. Yana, gutiay la gihap ako pariho hin bata.

Han pipira ka bulan nga waray na ako gawas-gawas ha balay, may duha nga Saksi ni Jehova nga binisita ha amon. Kon may bisita kami, kaurogan na nga natago ako, pero hito nga adlaw nakiistorya ako hiton duha nga babaye nga Saksi. Han nag-istorya hira parte ha Paraiso, nahinumdoman ko an akon nabatian han mga singko anyos pa la ako. Hito nga panahon, usa nga misyonero nga hi Jethro nga taga-Suriname, an nabisita ha amon baryo usa ka beses kada bulan ngan nagba-Bible study hira ni Tatay. Buotan gud ha akon hi Jethro; naayon gud ako ha iya. Danay, igin-uupod liwat ako nira Lolo ngan Lola ha pag-atender ha katirok han mga Saksi ha amon baryo. Salit han ginpakianhan ako ni Florence, nga usa han duha nga babaye nga binisita ha akon hito nga adlaw, kon karuyag ko mahibaro hin dugang pa, naruyag ako.

Binalik hi Florence upod an iya asawa nga hi Justus, ngan nagtikang kami pag-Bible study. Han napansin nira nga diri ako maaram magbasa, gintutdoan nira ako. Ha urhi, nahibaro ako pagbasa. Usa ka adlaw, ginsidngan nira ako nga igintoka hira ha Suriname basi didto na magsangyaw. Nasubo ako kay waray na magba-Bible study ha akon ha Orealla. Pero makalilipay kay waray ako hingalimti ni Jehova.

Waray pag-iha, inabot ha Orealla an payunir nga hi Floyd, ngan nakaistorya niya ako samtang nagsasangyaw hiya ha balay-balay. Han gintanyagan niya ako nga mag-aram ha Biblia, hiniyom ako. “Kay ano nga nahiyom ka?” nagpakiana hiya. Ginsidngan ko hiya nga nag-aram na ako han brosyur nga Ano an Ginkikinahanglan ha Aton han Dios? ngan natikangan ko na an libro nga Kahibaro nga Nagtutugway Ngadto ha Kinabuhi nga Waray Kataposan. * Igin-istorya ko ha iya kon kay ano nga waray na maipadayon an akon pag-aram. Iginpadayon ni Floyd an pag-study ha akon ha Kahibaro nga libro, pero waray pag-iha, igintoka liwat hiya ha iba nga lugar. Waray na liwat nag-Bible study ha akon.

 Pero han 2004, may duha nga espesyal payunir nga igintoka ha Orealla, hira Granville ngan Joshua. Nagsangyaw hira ha balay-balay, ngan nabilngan nira ako. Han ginpakianhan nira ako kon karuyag ko magpa-study, hiniyom ako. Ginhangyo ko hira nga pag-adman namon an Kahibaro nga libro tikang ha tinikangan. Karuyag ko hibaroan kon an ira mga igtututdo ha akon pariho han mga igintutdo han mga nag-Bible study ha akon. Ginsumatan ako ni Granville nga may ginhihimo nga mga katirok ha amon baryo. Bisan kon haros napulo ka tuig na nga waray ako baya-baya ha balay, karuyag ko umatender. Salit ginkuha ako ni Granville ha balay; ginsakay niya ako ha wheelchair ngan iginduso ito pakadto ha Kingdom Hall.

Waray pag-iha, gin-aghat ako ni Granville nga magpaenrol ha Teokratiko nga Eskwelahan ha Ministeryo. Hiya nagsiring: “Bisan kon baldado ka, nakakayakan ka. Maabot an panahon, magpa-public talk ka. Sigurado ito.” Tungod hito nga iya pagdasig, nagkaada ako kompyansa.

Nagtikang ako makigbahin ha pagsangyaw kaupod hi Granville. Pero tungod kay lubak-lubak an mga dalan ha baryo, makuri an pagduso han wheelchair. Salit ginhangyo ko hi Granville nga isakay ako ha kariton ngan igduso ito. Mas masayon gud ito. Han Abril 2005, nabawtismohan ako. Waray pag-iha, ginbansay ako han mga brother ha pagpanginano ha mga literatura han kongregasyon ngan ha sound system han Kingdom Hall.

Katapos, han 2007, makasurubo kay naaksidente hi Tatay ha pump boat ngan namatay hiya. Nasubo gud an amon pamilya. Nag-ampo hi Granville kaupod namon ngan nagbasa hin nakakaliaw nga mga teksto. Paglabay hin duha ka tuig, natigdaan kami han usa pa nga trahedya​—namatay liwat hi Granville ha usa nga aksidente ha pump boat.

An amon gutiay ngan nasusubo gud nga kongregasyon waray na tigurang ngan usa la an ministeryal. Masakit gud para ha akon an kamatay ni Granville kay hinigugma ko hiya nga sangkay. Pirme niya ako ginbubuligan ha akon espirituwal ngan pisikal nga mga panginahanglan. Ha siyahan nga katirok nga waray na hiya, ako an gintokahan nga magbasa han mga parapo ha Pag-aram ha Barantayan. Katapos ko mabasa an siyahan nga duha nga parapo, nagtikang manuro an akon mga luha ngan waray ko na ito mapugngi. Salit linusad ako ha entablado.

Nalipay utro ako han may mga kabugtoan tikang ha iba nga kongregasyon nga binulig ha amon ha Orealla. Nagpadara liwat an sanga nga opisina hin espesyal payunir nga hi Kojo. Ngan nalipay ako kay an akon nanay ngan manghod nga lalaki nagpa-study ngan nabawtismohan. Katapos, han Marso 2015, ginpili ako sugad nga ministeryal. Waray pag-iha, iginpresenta ko an akon siyahan nga public talk. Hito nga adlaw, nalipay ako pero nasubo liwat han nahinumdoman ko an ginsiring ha akon ni Granville mga tuig na an naglabay: “Maabot an panahon, magpa-public talk ka. Sigurado ito.”

Pinaagi han mga programa ha JW Broadcasting^®, nahibaroan ko nga may mga igkasi-Saksi ako nga pariho ha akon an sitwasyon. Pero bisan pa han ira kahimtang, damu an ira nahihimo ngan malipayon hira. May mga butang liwat nga kaya ko himoon. Tungod kay karuyag ko gud gamiton an akon kusog ha pag-alagad kan Jehova, nagregular payunir ako. Ngan han Septyembre 2019, may nahibaroan ako nga diri ko ginlalaoman! Nahibaroan ko nga ginpili ako sugad nga tigurang ha amon kongregasyon nga mga 40 an magwarali.

Mapasalamaton ako ha hinigugma nga kabugtoan nga nag-study ngan binulig ha akon basi matuman ko an akon ministeryo. Labaw ha ngatanan, mapasalamaton gud ako nga waray ako hingalimti ni Jehova.